生於現代嘅靚女武俠對我有興趣？: 序章

「唉仲要等幾耐。。。。」一堆豆大嘅汗珠係我塊面到好似賽跑咁鬥快不停向下滴，啱啱新換嘅恤衫亦都已經開始慢慢浸滿汗水。

我只能夠不停咁樣喺巴士站度張望我要等嘅車幾時到。

皆因今日係見工嘅日子，行年25嘅我大學畢咗業好幾年都仲未穩定咁有份工同收入，平時都只能做下散工同兼職。幸好有朋友介紹一份工作俾我去面試，仲話好大機會請。

但就搞到我太陽啱啱出就要梳洗落街等巴士。

而今日嘅天氣絕對唔適合著住恤衫企喺條街度超過10分鐘。





「又delay?有冇搞錯。。。咁搞法真係要截的士」我望住手機上面嘅巴士應用程式喺我班車隔離寫住延遲兩個字，我個心又沉咗一下，因為見工嘅地方都唔係近，所以如果要截的士費用都唔少。

又過咗大概5分鐘，啱啱係屋企定好嘅髮型都開始因天氣同我嘅汗水投降，有啲塌落嚟嘅跡象。

「咁落去遲到。。。。點算好呢。」我不停咁樣刷新巴士應用程式，但係上面就只係不停重複咁樣顯示班次受阻嘅訊息，面上嘅汗珠亦都越來越多，已經唔知道係緊張定係太熱。

「唉算。」我放棄再等，一個快步跑前出馬路，伸出手截停一架的士上車

「XX街15號XX大廈啊唔該。」的士司機冇應到我，只係嗯咗我一句然後快手㩒錶然後就離巴士站揚長而去。





終於踏上旅程嘅我心情都放鬆咗落嚟，戴上耳機準備心情見工，並望住車外嘅風景等待到達目的地。

車外嘅風景飛速走過，清晨嘅街道充滿住唔同嘅人熙熙攘攘，有嘅等車，有嘅快步行走，有嘅喺街邊食早餐。

「靚仔係咪呢到？」的士司機指住車窗外嘅大廈問我。

「ehhhhh，係呀冇錯，前面抌低我就得啦唔該」老實講其實我都未嚟過呢一區，所以對於周圍嘅環境都好陌生，幸好我見到街道名同我朋友比我嘅一樣。

我落車睇一睇時間，仲比見工時間早咗大概大半個鐘到，的士大哥手車真係快。





我趁住仲有時間就去附近便利店買咗碗麵食。並且搵下有冇舒服嘅地方俾我食早餐。

行出便利店迎頭對面有條巷仔，條巷仔俾我印象中嘅其他後巷乾淨，什至乎係乾淨到有啲離奇。

出於好奇心，我行咗入去。

條巷仔比起一般嘅內街窄，同時又比後巷闊，左右都有一啲商業大廈嘅後門。

我慢慢咁樣深入，直至行到最尾見到有一道商業大廈嘅後門特別奇怪，因為佢係鐵閘入邊有道木門，而望上去見到有兩層窗，個窗睇落十分殘舊，好似啲舊屋先會有嘅窗咁，但係延展上去又同其他大廈冇分別。

我用木筷子夾起一啖麵，打量住呢個奇怪嘅地方。

突然我聽到呢幢奇怪嘅建築入邊傳來聲響，帶着好奇心我靠近想知道發生咩事。

「啊。。。又。。。。失。。！」一道斷斷續續嘅人聲由內傳出並快速傳近。





正當我將耳仔靠近想仔細聆聽嘅時候，一樓嘅窗戶突然傳出一聲類似打風嘅聲音，然後窗戶碎裂，伴隨着玻璃碎片飛出嘅係一個人影。

我抬高頭睇清楚係，一個女性嘅人影，佢嘅姿勢好似。。。

好似俾人喺窗外面用繩拉條腰拉出嚟咁。

唔係，冇可能，佢好似係俾入用力打出嚟咁。

但係我嚟唔切分析究竟係發生咩事嘅時候，個人影已經重重咁樣跌咗落我成個人度，而我都比強大嘅衝力撞到瞓低咗。

「咩事。。。。。啊？」我回個神返嚟嘗試起身嘅時候發覺身上有物件壓住我，感受就好似兩個柔軟但係又重量嘅軟墊。

我本能咁樣用雙手觸摸壓喺我身上嘅嘢。





「咦？」呢個感覺我唔係未接觸過，但係熟悉嘅同時又好陌生。

好軟熟，冇錯，呢個手感作為男性絕對會知道係咩嚟。

「死變態！」坐喺我身上嘅女性突然一個翻身，就好似識飄浮咁樣喺我身上彈起。

正當我驚訝於眼前女性做出違反物理定律嘅動作嘅時候。

我就感覺到一陣天旋地轉，而喺我兩眼一黑之前望到最後嘅畫面就係一巴掌。

呢巴掌，都一下打到我入去一個未知嘅世界。