生於現代嘅靚女武俠對我有興趣？: 第一章

「你。。。冇。。。。」

「你冇嘢。。。。嘢啊嗎？」我感覺到有人用手輕拍住我塊面。

「發生咩事。。。？」我慢慢擘大對眼，眼前出現一個人嘅輪廓，伴隨住絲微嘅花香。

「你係？我。。。係邊？」我感覺到自己瞓咗喺一張床度。

「你終於都醒啦。嚇死我啦。」一把纖柔嘅女聲同我講。





眼前係一個女性坐係我側邊雙手放膝注視住我。

當我完全張開雙眼嘅時候佢先靠後返椅背。

女仔雙目大而有神，皮膚白皙，唇紅有光澤，長髮紮起高辮，仲有一點淚痣係左眼旁，妥妥嘅美人胚子，但同時又不失幹練嘅感覺。

「啊我個頭。。。」我想起身嘅時候感覺到個頭傳嚟痛楚，下意識跌返落枕頭上。

「你。。。見點啊？」個女仔問我嘅語氣中帶點避忌嘅感覺。





「我個頭。。。。發生咩事點解我會喺度？」

「你喺我門口。。。暈咗。見你不省人事我就帶咗你入嚟。」閃避嘅感覺更加重。

「暈咗？你門口？」

「係呀。」

我記起之前發生咩事，奇怪嘅建築，突然嘅聲響，同埋。。。。。





「咁我。。。係點樣暈㗎？」

「我唔知道。。。只係咁啱開門就見到你瞓咗喺度。」

「我瞓咗喺度？冇理由㗎，我應該係準備去。。。」

「大件事！依家幾多點？」

「而家12點啊。咩事啊？」

「12點！？唉啊呢次冇啦。。。。」我用手遮掩自己嘅額頭同雙眼，慨嘆我錯過咗嘅面試。

「我瞓咗幾耐？」

「差唔多。。。。。10幾個鐘。」





「10幾個鐘？！又話而家12點嘅？」

「係呀，夜晚12點。」

我從褲袋攞出手機打開一睇，真係已經半夜12點，而我今日朝早出門口嘅時候只係6點半。

手機上面亦都有好幾條朋友嘅短訊，詢問我面試成唔成功。

「你確定你唔知道我點解暈低咗？」我再次詢問。

「都係打開門。。。。就見到你。。。。」

「但係我記得我暈低之前，好似有人坐咗喺我身上，然後再打暈我？」





「。。。係。。。好對唔住，嗰個人其實係我，我一時下意識冇收到力先打暈咗你真係好唔好意思。。。」個女仔嘅語氣終於唔再有避忌嘅感覺。

「我好似掂到你。。。？」俾佢咁樣一講我瞬間記返起暈低之前嘅一刻。

「嗰下我覺得俾人非禮所以我先冇收到手。。。」我隱約見到女仔白哲嘅面上泛起少少紅暈，所以我都冇講落去。

「唔緊要啦，我都有錯嘅，係我唔好意思就真。」我慢慢咁樣喺張床度坐起身。

「都只不過係一時誤會啫。」女仔面帶尷尬嘅笑容回應我。

「我想問吓我而家喺邊。」我轉移話題。

「你而家喺我屋企，但都係我工作嘅地方。」

「你屋企都幾特別？」我環顧四週，望到有好多奇怪嘅東西。





有喺古裝片入邊先會出現嘅竹簡架，竹簡架隔離又有啲線裝書，隔離又有一個造型奇怪嘅架，上面放住一啲意義不明嘅道具同冷兵器。

但係同時室內嘅另一邊又有梳化電視同埋廚房等等現代嘅設備。

俾人嘅感覺就好似歷史展覽廳咁樣。

「特別？都係嘅。」個女仔都迅速環視一週。

「我諗我係時候都要返屋企。」滿足完我嘅好奇心之後，頭部傳來嘅痛楚都迅速將我拉返去現實。

「但係點解，仲咁痛。」我摸一摸我頭上痛嘅地方發覺原來腫咗一大塊，上面仲綁住一個冰袋。

「真係唔好意思。。。」個女仔見到我摸到自己個頭嘅時候立刻講咗一句。





頭的而且確好痛，但係令我好奇嘅係，點解一個睇落咁柔弱嘅女仔可以一掌打到我成個頭腫咗。

「啊。。。」我嘗試企起身，但係個頭好重，所以都不受控制咁樣坐返喺張床度。

「你再休息吓先啦，你咁樣唔係幾方便行動嘅。」

「係幾唔方便。。。」我摸住自己腫起嘅頭，只能無奈咁樣同意。

「ehhhhh….你叫咩名？我叫閰曉晴。」我知道佢係嘗試轉移話題，不過以我目前嘅狀態都別無選擇，只能繼續留喺度。

「我叫白勇。我啲朋友都叫我阿勇。」

「哦，你好阿勇。」曉晴略帶尷尬咁樣同我打招呼招，睇嚟佢仲係為打傷我而覺得唔好意思。

「你好。」為咗令場面唔好咁尷尬我語氣輕快咁樣回應咗佢。

「你喺暈低之前，點解會行入嚟我哋條巷度嘅？」

「我只係好奇點解條巷有咁奇怪嘅建築先停留咗一陣，估唔到一停就停咗一日。」

「咁你入嚟之前係去緊邊㗎，啱啱見你咁緊張咁樣問時間。」曉晴好快咁樣接我嘅說話。

「本來我諗住入嚟行一行就去見工㗎啦，點估到搞成咁。」我苦笑兩聲。

「唔好意思，我真係冇心。。。。」

「唔緊要啦，都過咗去啦，況且我都有唔啱嘅地方嘅。。。」我嘗試安慰曉晴。

「。。。。。」曉晴尷尬咁樣抿嘴。

「咁你呢，你間屋咁特別你又話係工作嘅地方，你係做咩工作㗎。」我嘗試轉移話題，希望令到曉晴再為打傷我呢件事介懷。

「我？我係武俠。」

「武俠？」我以為我自己聽錯。

「係，武功個武，大俠個俠。」

曉晴嘅眼神彷彿有光。