生於現代嘅靚女武俠對我有興趣？: 第一章。七
我當堂嚇到擰轉頭，出現喺我眼前嘅亦都如我所料係啱啱嘅奇怪男人。
孤星狩。
「喂。。。。你。。。究竟想點，做咩跟蹤我哋。。。？！」老文都同我同一反應，但係感覺上佢比我淡定，雖然語氣中都感受到佢係強裝鎮定。
但係孤星狩嗰對冷嶝嘅雙眼，就好似望住獵物咁樣望住我，而我俾佢嘅眼神嚇到身體僵硬。
「閻拳嘅人。。。都要死。」
孤星狩講完之後就開始慢慢靠近我，行近中我彷彿聽到佢握緊雙拳嘅聲音，佢嗰對皮手套都吱吱作響。
死？邊個死？我死？
「我諗我哋之間係咪有咩誤會？。。。我唔係啲咩閻拳嘅人。。！」我急忙舉起雙手澄清我唔係佢想搵嘅人。
問題係佢好似聽唔到咁樣不停靠近我。
「走啊傻仔！」老文下意識咁拉起我掉頭開始跑起來。
俾老文拉一拉我成個好似醒咗咁終於知道大禍臨頭。
「條友癡。。。癡線㗎救命啊！」我一路跑一路叫搞到上氣唔接下氣。
但係街上面嘅途人望到我同埋老文一路跑一路嗌救命就好似見到兩個傻嘅一樣。
我擰轉頭一望，孤星狩唔見咗。
「個男人。。。個男人唔見咗！？」我叫停老文。
「咩話？」老文都跑到喘晒氣咁樣問。
但係正當我諗住終於可以唞啖氣嘅時候，我聽到頭上傳來奇怪嘅聲音。
「佢。。。。佢係牆上面！」
「牆？！」
孤星狩佢以跑步嘅姿態「黐」喺唔同建築上面左右橫跳，打橫踏住建築物嘅牆面，眼神比起啱啱更加銳利咁盯實我。
輕功？
我瞬間諗起尋日曉晴喺佢屋企示範俾我睇嘅輕功。
但係同曉晴唔同嘅係孤星狩係每一步俾我嘅感覺唔似曉晴咁輕盈，而係好似想踩碎腳下所有嘢咁重。
「走。。。走啊！」嚟唔切考究佢同曉晴究竟有咩分別，我就已經同老文再次逃亡。
「附近。。。邊度有警局？」我一路跑一路問。
「我點知喎！」老文急忙回答。
「我記得嚟嗰陣。。。好。。」
喺我話都未講完嘅時候，我突然感覺到頭上孤星狩「跑步」嘅聲音停咗，當我想快速擰轉頭檢查一下咩情況嘅時候。。。
「阿勇！！！」我只能聽到老文大叫。
而我視線嘅水平都瞬間好似跌咗咁同地面貼平。
吓？咩事？
下一秒，我感覺到背上傳來強大嘅壓力伴隨着劇痛，然後中都突然感到一陣濃烈嘅腥味。
「救命啊！」我隱約聽到老文大叫，但係我視線因為啱啱突如其來嘅衝擊而開始有啲模糊。
「文。。。。。」我嘗試同老文講嘢，但係未等我講出一個字就比口中濃烈嘅腥液阻擋我發出聲音。
背脊上面嘅壓力消失咗之後，我見到眼前出現一對皮靴。
「果然。閻拳除咗你。。。。仲有邊個？」孤星狩企喺度俯視着我並用毫無感情嘅語氣問我。
「我。。。。。。唔。。。。知。。。。。。你。。。」我因為口中嘅鮮血而講唔到任何嘢。
「我再問多你一次，仲有邊個？」下一秒我俾孤星狩成個人拉住我件衫單手秤起咗，望到嘅係佢眼神中強烈嘅殺意。
「我。。。唔。。。」
「放。。。放低佢！我報咗警㗎啦！」我眼角望到老文係側邊向孤星狩展示電話已接通嘅頁面，以街上旁觀嘅途人都嚇到啞口無聲淨係望住我同孤星狩。
然而孤星狩不為所動，定係死死咁樣望住我。
「同我講閻拳仲有邊個。。。。我可以俾個痛快你。」
「。。。。」依一刻嘅我已經痛到講唔出一個字，只能無助咁用逐漸渙散嘅眼神望住極度慌張嘅老文。
就係呢個時候，街尾傳嚟響亮嘅警笛聲。
「立即放低嗰個男人！」警車到場，幾名警員瞬間喺警車上魚貫而出。
「阿勇。。。我會記住你。。。」孤星狩銳利咁盯咗我一眼然後用威脅嘅語氣同我講。
佢放手嘅下一秒我就瞬間癱軟跌返落地，然後口中嘅鮮血亦都忍唔住噴吐出嚟。
「企係到！」我聽到警員喺度大叫。
但係呢刻嘅我因為背部嘅劇痛連起身都覺得難。
「阿勇！」老文跑過嚟嘗試扶起我。
「白車！白車係邊？」
「你頂住啊勇！」老文喺旁邊焦急咁樣同我講，而到場救護人員都快手咁將我抬上擔架床運上救護車。
去醫院嘅途中我嘅意識都不停咁樣係醒同暈低之中切換住，只能微弱咁樣感受救護車嘅搖晃同埋救護人員喺我身上嘅各種急救行為。
而去到我意識清醒終於醒返嘅時候已經係第二日晏晝，瞓咗喺醫院嘅病床上面。
「你醒啦？嚇鬼死我哋。」
打開眼係老文同埋阿基佢哋。
「啊。。。」我嘗試坐起身但係背部再次傳來劇痛。
「睇住嚟啊你，醫生話急救嘅時候從未見過啲咁奇怪嘅傷痕，嗰個男人究竟用啲咩嚟踩傷你。。。」老文率先開口同我解釋發生咗咩事。
「我諗兩日比兩個唔同嘅人打暈兩次，我都係第一個。。。」我苦笑咗兩聲嘗試緩和氣氛。
「俾人踢到嘔血你仲可以講笑。」阿基反咗下白眼。
「仲有，醫生話佢其實只係做咗止痛，搵唔到具體係咩原因整傷你。。。」老文繼續同我講解我傷勢嘅情況。
「你唔係全程望住，你冇同醫生講咩？」
「我有講，但係佢哋話冇可能，所以直至佢哋搵到發生咩事之前佢哋都唔夠膽貿貿然俾任何療程你。」
我嘗試活動自己嘅背部感受住傳來嘅痛楚。
呢種感覺。。。。。
我腦入邊突然之間浮現出閻曉晴三個字。