生於現代嘅靚女武俠對我有興趣？: 第一章。六

「你好。。。。你。。。你係？」唔知點解我感覺到有股寒意係我背脊到，但係我都強行將自己僵直嘅身體擰轉頭過去望搭住我膊頭嘅人。

而頓時啱啱仲有講有笑嘅老文佢哋都嚇親，靜咗落嚟。

「我叫孤星狩，我想問你啱啱係咪提到過閻家拳館四個字？」男人帶着禮貌嘅語氣同我講。

但感覺好似係強行扮出嚟咁。

呢個有著奇怪名嘅男人身材高大，長銀髮及肩，雙目冷峻，鼻高面瘦，佢身穿漆黑嘅皮褸，內裏一件貼身上衣，下身著貼身牛仔褲，並且雙手帶着皮製露趾手套，就咁目測都有一米八或以上，差咗一架重型電單車，基本上就成個外國電影明星咁。





更離奇嘅係佢面上有好幾道唔知係由咩造成嘅疤痕。

「孤生。。。ehhh可能你聽錯。。。。我冇提到過咩拳館喎。。。。」出於本能我唔夠膽答我有提過。

「係啊？但係我聽到你哋一直都講得好大聲，尤其係你講咗閻家拳館同閻拳呢幾隻字。又話武功，又話識輕功等等，我有冇講錯？」語氣中孤星狩好似帶住點威脅嘅意味，而佢搭喺我膊頭嘅嗰隻手好似隱隱咁樣出緊力，令到我膊頭感到陣陣壓力。

「我哋講緊電影呀嘛，係咪啊？近排有套新嘅武俠電影幾好睇喎。」老文突然出聲嘗試幫我打圓場。

「哈哈。。。係啊，阿勇佢自己睇完話好好睇推薦我哋睇咋嘛。」阿基都幫忙附和，但係聽得出佢比老文把聲更加戰鬥顫抖。





「你叫阿勇？。。。。」

我見到孤星狩講出我個名嘅時候眼中閃過一絲寒光，背脊傳來嘅寒意更加強勁，語氣更隱約帶點敵意。

但係阿基好講唔講，咁樣講咗我個名出嚟。。。

「花名嚟嘅啫，哈哈朋友之間叫開嘅。」我即刻接上，但係我自己都忍唔住有啲膽怯。

「咁真係唔好意思，打攪晒你晒，你哋慢慢食。」





孤星狩突然一改語氣同我哋道歉並且轉身離開，而我僵硬嘅身體終於喺佢隻手離開我膊頭嘅時候放鬆到，我亦都不禁吞咗啖口水。

「佢邊個嚟？！點解我覺得佢有啲。。恐怖。。。」老文率先打破奇怪男人離開之後嘅沉默，我都感覺到老文係啱啱繃緊嘅情況下放鬆落嚟。

「我。。。唔知。」儘管個男人離開咗，我仲係驚魂未定，講嘢細細聲。

「阿勇。。。你冇事啊嗎？」阿基問我，佢同老文一樣都好似啱啱先放鬆到。

「我諗應該冇事啩。。。」我摸住啱啱孤星狩用手搭住我嘅膊頭，確保自己身體冇事。

突然背脊又傳嚟同啱啱好似嘅寒意，我下意識咁樣擰轉成個身。

孤星狩喺遠處望住我哋。

唔係，係望住我。。。





但係下一秒，佢就唔見咗。

係點做到。。。

我全身不自覺打咗個冷震。

「你哋食飽未。。。我想埋單走人。。。」我身體有強烈嘅感覺叫我唔好再留喺呢到。

老文佢哋都好快答應咗。

離開嘅時候阿基同埋另一位朋友就順路一齊走咗，而我就同老文順路走。

「搞乜嘢啊你。。。見工見唔成，又話遇到咩武俠識武功，跟住啱啱又俾個好似想殺人嘅男人搭膊頭。」老文一路行一路講。





「我點知。。。。我都想知發生咩事，見唔成工已經心情好差，跟住又遇着個怪人，唉。」

「仲有你啱啱食飯講咩拳館話？真係有啲咁嘅地方，你係咪發夢咋？」

「係閻拳。。。我發夢就唔會同你講得咁詳細啦係咪啊？」講到呢到我又諗返起曉晴同呢兩日發生嘅事。

「。阿。勇。果然，你係閻拳嘅人。」一把冷酷嘅聲音突然喺我背脊響起。

身上嘅寒意再度被勾起。