上個世紀末的一些人和事: 序

一九九八年夏天，
索羅斯大炒港元，沽空港股。
恆指大跌，
港府以任一招、外匯基金迎戰，
千億之巨入市，
成功擊退國際大鱷。
 
此時乃回歸之後一年，
馬真係照跑，舞真係照跳。
走得嘅一早走咗，留低嘅繼續一向嘅生活。




 
一如每年夏天，
太陽晒到落屋邨中庭，
球場水泥地開始散出熱氣。
 
阿俊、細強、阿豪同肥仔輝，
喺同一間中學讀書，亦都住埋附近幾座，
所以成日一齊返屋企。
每一日，書包一擺低，個個就即刻換返戰衣—
背心、短褲、人字拖，




然後衝落樓下籃球場。
 
屋企唔富裕，冇遊戲機打，所以打波就係佢哋嘅所有。
對佢哋嚟講，
樓下球場就係世界中心。
 
「快啲啦，日落之前打多場！」
細強一邊帶波一邊叫。
 
幾個同校嘅女仔坐喺場邊長櫈。




 
阿玲、瑩瑩、阿敏，
都係着住屋企衫，同埋唔同色嘅SF拖鞋，
一邊睇下「Yes! 」，一邊睇下男仔打波，
間中笑下、鬧下。
 
「你睇阿俊，又係咁獨食。」
瑩瑩細聲講。
 
「算啦，佢入到就得啦。」
阿玲笑住回應。
 
天色暗落嚟，屋邨開始亮燈。
 
邨裏面嘅年青人，冇一個會急住返屋企，




佢哋三五成群，行嚟行去——
去士多買包點心麵，行過街市拮串牛雜，
坐喺韆鞦吹吹風，企喺大廈門口傾偈。
 
講學校啲無聊嘢，講老師點樣煩，講隔離班邊個靚仔靚女。
 
夏天嘅風一啲都唔涼，仲帶住飯餸味同洗衣粉味。
樓上傳落嚟嘅電視聲——
新聞、粵語長片、卡通片，混埋一齊，
成個屋邨好似一個連結起嚟嘅生命體。
 
一班屋邨仔女，個個着住街坊裝，
過住平凡嘅日子，冇人覺得自己特別窮。
 
大家都一樣，




屋邨就係屋企，朋友就係世界。
 
嗰個夏天，
嗰啲喺籃球場流過嘅汗、
喺長櫈度笑過嘅聲，
為佢哋本書開序。