上個世紀末的一些人和事: 第十三章 | 忍無可忍

噚晚，阿誠重生。
 
有人叫佢個名。
有人拍佢膊頭。
有人笑住同佢講：「你得㗎。」
 
佢第一次覺得——
我唔係自己一個。
 
八年孤獨嘅黑暗，




終於完咗。
 
第二朝，天氣放晴。
雲散開，籃球場積水閃閃生輝。
 
阿誠企喺單位外面，
仍然濕透嘅校服裇衫，搭住喺佢赤裸嘅膊頭，
面上仲留住昨晚未退嘅笑意。
 
打開鐵閘，




「鏘——」
 
第一巴掌，
嚟得好快。
 
快到佢未意識到發生緊乜事，
身體已經飛咗埋牆。
 
臉頰先燒起，跟住係地心引力。
 




一跌，手㬹撞上冰冷嘅石屎地，
一下，腫痛即刻炸開。
 
佢未抬頭，第二下已經落咗嚟。
同樣咁重，打喺右臂。
 
冇時間思考，
身體只懂得本能反應——
蜷縮，
雙手護頭，
雙臂擋面。
 
佢知道，仲未完。
 
面、手臂，甚至屁股，一下接一下。




粗口同咒罵，混住沉重嘅空氣，
砸落嚟。
 
等一切靜落嚟，阿誠縮埋一舊，
面貼喺熟悉得不能再熟悉嘅地板上。
 
身體嘅痛，佢可以忍。
 
但真正令佢窒息嘅，
係現實返嚟得太快。
 
五分鐘之前，佢仲覺得自己重獲新生。
 
有朋友，有支持，有未來。
 




而家，佢都係喺返呢個地方——
灰色嘅牆，冰冷嘅地。
一個冇屋企人嘅屋企。
 
阿誠慢慢張開眼。
今次應該冇打腫。
 
阿爸企喺窗邊，背對住佢，面向窗，
食緊煙，
雖然佢知道，佢個仔對屋企有浸煙味，非常討厭。
 
阿誠將視線移向床。
 
床上，擺住一張紙。
 




會考成績單。
 
原來係自己冇首尾，掛住上去天台跳樓，
冇先收返埋。
 
唔怪得，斷正。
 
佢忽然諗起陳 sir 講過嘅說話：
「一張紙，從來唔可以寫定一個人嘅命運。」
 
原來，係一個笑話。
 
噚日，佢曾經幻想——
自己會唔會被人抬起，
拋向半空，




好似新聞入面嗰啲
九優狀元。
 
同日，腦海嘅畫面，熄咗機。
 
但今日有一樣嘢，唔同咗。
呢一次，身體嘅痛
燒起咗內心一啲嘢。
 
阿誠慢慢撐起，
雙腳嘗試企穩。
 
佢行去鐵閘前。
「鏘——」
 
佢冇入去攞衫，
只係行出去，著返拖鞋，
轉向樓梯，一步一步落。
 
冇回頭。
 
一次都冇。