上個世紀末的一些人和事: 第二十六章 | 我接住你

辦理身後事嘅日子，時間好似被拉得好長。
阿誠乜都唔識，文哥分身乏術，陳sir同婉兒就一齊幫佢攪。

醫院殮房、死亡証、殯儀館、火化場、墳場，
一道一道去，一路一路攪，
陳sir或者婉兒帶路，阿誠只係跟住去。

大家冇講出口嘅，係另一個更實際嘅問題——
阿誠其實連幫老竇辦一場身後事嘅錢，都冇。





祥哥一向手停口停，冇錢供保險，亦冇乜積蓄。
殯儀館嘅基本套餐、靈堂租用、棺木、法事、火化安排，每一樣都係現金。
 
阿誠第一次真真正正明白，點解成年人事事睇錢份上，為錢卑躬屈膝。
因為冇錢，就冇生活。

好彩嘅係，佢未開口，身邊嘅人已經行動。

「錢嘅嘢，你唔駛諗。」文哥第一個講，語氣唔係商量。





阿玲補一句：「殯儀方面我阿姨識人，可以幫手格下價。」

之後嘅事情，冇正式開過會，但一切就好自然咁運作起來。

陳Sir同婉兒聯絡殯儀館，揀咗一個簡單嘅靈堂；
阿玲阿姨搵咗相熟嘅殯儀經紀，清清楚楚講明做最基本；
文哥出手代墊訂金；
街坊鄰居伙記熟客，不乏靜靜塞信封俾陳Sir，話：「唔好同祥哥個仔講係邊個俾。」

冇人「施捨」，大家只係用一句又一句「佢老竇好好人」，「祥哥以前幫過我」作為理由。




 
於是，錢銀問題，都一一解決。
剩低嘅，就係安撫人心。

有日放咗學，陳Sir婉兒去阿誠屋企幫手整理祥哥留低嘅文件，發現一張舊住戶紀錄，上面有兩個名，佢頭一次見。
 
俾阿誠睇，佢一眼就認得——
係阿媽同細妹。

「咁駛唔駛，通知佢哋一聲？」婉兒好溫柔咁問阿誠。
 
阿誠皺眉，面有難色。
 
「我其實……唔知佢哋住係邊到。」
 




陳sir同婉兒對望，一人一隻手，搭住阿誠膊頭。
 
等佢慢慢喊出來。
 
——

守靈嗰晚，朋友輪流到殯儀館陪阿誠。
有人企喺靈堂門口接待；
有人負責派吉儀；
有人幫手記人情。

靈堂好細，但係街坊好多，
空氣好焗，但係冇人投訴，
大家都係嚟，見祥哥最後一面。





阿誠大多數時間都企喺靈堂前面，着住一身借返嚟嘅白衫白褲，披麻帶孝，面無表情。
但每次轉身，見到熟悉嘅面孔，佢都會安心一啲。

因為阿詩，幾乎冇離開過佢。

佢坐係家屬位後面，靜靜咁陪足阿誠一晚，
遞水、遞紙巾、提醒佢食嘢。
文哥係檔口準備白飯、簡單齋菜，拎到殯儀館俾阿誠同啲朋友；
文嫂亦提點阿詩：「呢啲時候，誠仔有人陪，最緊要。」

阿誠好多次想同大家講「唔駛再幫」，但每次望到靈堂前阿爸張相，
就乜都講唔出口。

——





法事完結，靈堂慢慢靜落嚟。

人散得七七八八，
班死黨留低幫手收拾，
瑩瑩就示意阿詩先走。
 
「我陪你返去。」阿詩拉阿誠起身。
 
兩個人一齊搭車，然後行返屋邨。
鐵閘拉開嗰刻，聲音特別響亮。

阿誠跪喺門口，好耐都冇入去。

「如果唔想入……」阿詩輕聲講，「我可以陪你喺樓下坐。」





阿誠搖頭，起身，慢慢行入去。

屋入面冇開燈。
廚房好乾淨，乾淨到好唔真實。
因為——已經好耐冇人企喺個爐前面。

阿誠坐喺床邊，雙手放喺膝頭，背脊彎晒。

「我而家……」佢停咗停，聲音好低。
「連幫老竇辦後事，都係靠人。」

阿詩坐喺佢隔離，冇急住否定。

「你知唔知，今日有幾多個人問我仲有冇嘢要幫手？」
佢輕聲講。

阿誠抬頭。

「你阿爸開檔咁多年，都幫過好多人。」
「我老竇話，祥哥到最後，最開心嘅事，就係發現，原來佢可以幫到自己個仔。」

「而你……你亦都唔係一個人。你唔駛一個人孭晒。」

阿誠眼眶即刻紅晒。

「我以前一直以為，只要我夠乖、夠努力讀書，就一定有前途，唔會再俾人拋低。」
「但原來唔係。」

佢望住阿詩。
「我好驚，有一日，你都會嫌我乜嘢都冇。」

阿詩深吸一口氣，捉住佢隻手。

「阿誠，我要你聽清楚。」
「我鍾意你，唔係因為你有啲乜，冇啲乜。係因為，我知道，你對我好。」

阿誠聲音顫抖：「但我唔想你跟我捱一世……」

阿詩眼淚湧出嚟。
「你有冇諗過，我一啲唔介意捱？」
「只要，係同你，一齊捱！」

阿誠再一次淚崩。

「如果……如果你肯等我……」
「等我企得穩，等我真係成為一個靠得住嘅男人……」

佢抬頭。
「我想娶你。」
「我想俾你最好嘅生活。」

阿詩喊住搖頭，又點頭。

「你唔使俾我最好。」
「你淨係要同我一齊。」

「就算一世守住冬菇亭，着街坊裝、成身大汗。」
「我都會開心。」

阿誠將阿詩緊緊抱住，
兩個人都係咁喊，但係喊得好開心。

喺呢一刻，阿誠終於明白——
老竇留低俾佢嘅，唔只係一個公屋單位，
而係一個會接住佢嘅地方。