上個世紀末的一些人和事: 第三十章 | 巧遇過去
細強要出邨，係因為要拎一抽鑰匙返屋企。
聽落好小事，但偏偏係夜晚九點幾先發生。
阿爸今日收工，留低咗屋企鎖匙係個客間屋。
佢過幾日會再去開工，阿爸本來覺得唔駛急。
「你唔係呀嗎？屋企鎖匙點可以係街外幾日咁耐㗎！」阿媽當然唔同意。
「抽鎖匙又冇寫住屋企地址，有人執到都唔會知開咩門啦？」
「喂，咁如果係你個判頭攞咗，跟住佢又俾咗你嗰班唔知咩底細嘅兄弟，話叫佢哋俾返你，抽鎖匙就會過完一手又一手，都只係你先到覺得冇事。」
「咁我打電話問下阿偉佢有冇攞到囉，你咁鬼嘈做乜撚嘢啫！」
「我唔嘈你鬼會郁咩！」
「我哋屋企又有鬼撚嘢比人偷呀，一係就你收埋啲私己係床下底囉。」
「我有私己就好喇！人哋做三行去裝修豪宅，做一單都搵十幾廿萬！你嗰個阿偉哥剩係做屋邨同啲舊樓生意，做成年都冇人哋一單賺咁多！」
「咁你不如去半島間中菜廳做待應，唔好又係樓下屋邨酒樓做傳菜囉，半島啲客可能叫埋你上去開房𠻹！」
「你個死佬！你係唔係出面有個女人，其實留低咗鎖匙喺佢到！」
「死婆，你係唔係痴撚咗線！」
咁係場面，細強真係好慶幸俾佢老豆駛咗出去。
上到巴士，行上樓上，坐低，望住窗外，
佢腦入面只係諗——希望抽鎖匙，仲係個客間屋。
直到前面幾個女仔出現。
佢哋一上車就嘻嘻哈哈，聲音清脆。
其中一個女仔望咗細強一眼，嘴角一藐，忍唔住笑。
「喂，你哋睇後面個極品！」
「佢可能係倒垃圾嗰時，度門俾風吹埋咗啫。」
「人哋著咩衫關你义事咩！」
「我一陣返屋企要洗眼喎。」
「駛唔駛咁誇張！我覺得佢俾老婆趕出家門就真。」
「佢個樣咁細路，點會有老婆啫。」
「可能就係細細個扑嘢攪大咗，攪成今日咁！」
細強一愣，望下後面，一個人都冇。
再低頭望下自己。
原來——自己一心掛住快啲撇，笠住件抓絨褸就踢拖走。
所以，𠵱家件褸裏面，仲係屋企著嗰套睡衣。
「𨳒你……唔怪得……」自己都不禁反眼。
眾女已經好唔客氣咁，一齊拎轉頭望住佢笑，
只有一個女仔一直望住窗外。
佢望咗細強一眼，又望返啲朋友，眉頭輕輕皺起。
「喂！佢又唔係你男朋友，關你哋乜事。」
佢細細聲講，語氣有啲猶豫。
但係，朋友冇停。
「你估佢住邊？」
「梗係屋邨啦，仲使問。」
「我哋上車之前嗰幾個站都係屋邨！」
細強冇出聲，只係望住車窗自己嘅倒影，
突然覺得自己變細咗。
「夠啦！」
個女仔終於出聲。
「人哋坐巴士，都冇諗過會俾人評頭品足。」
「如果有人咁講你哋，你哋又會點！」
眾女愣住。
「你咁認真做乜？」
「我哋同佢玩下啫。」
車廂靜咗落嚟。
細強一路冇望佢哋，但係心口仲好緊。
落車嗰刻，佢行快兩步。
「喂！」
背後有人叫。
係嗰個女仔。
「頭先……」佢停一停，「我覺得我要出聲。」
「係我啲朋友唔啱。」
細強轉身：「我冇嘢。」
「多謝你。」
個女仔呼一口氣：「我唔同佢哋。」
「我細個都住屋邨，不過後尾搬走咗。」
「我叫阿晴。」
「叫我細強。」
佢下意識補一句：「我有女朋友。」
阿晴笑咗下：「唔駛驚。」
「我唔係想識你。」
兩個人一齊行到街口。
「點解着成咁出嚟。」阿晴問。
「係唔係有急事？」
細強諗咗一秒，然後笑咗。
「係，我急住著草。拜拜！」之後就箭步起跑，對拖鞋啪啪聲，成條街都聽到。
三四十步，到個客棟樓，隨即開閘，閃入大堂。
㩒𨋢嗰時，個心仲係咁跳。
細強有啲怯，因為佢知道，
心跳，同跑步無關。
——
成功攞返抽鑰匙，細強搭車返屋邨。
返到熟悉嘅樓下，佢行入７-11諗住買幾粒燒賣食。
入面幾個街坊，都係著睡衣撻拖鞋。
細強感到心內一陣暖流——因為佢返到一個有歸屬感，
可以舒舒服服，做返自己嘅地方。
「喂，你阿媽今晚又冇俾飯你食呀？」阿敏從後突襲，見到燒賣，就即刻拮兩粒入口，細強差嘅俾佢嚇死。
「咁夜仲落街，聽日唔駛返工咩？」細強邊講，邊搶返兩粒燒賣。
「咁你聽日又唔駛返工咩？」阿敏駁住。可能因為有嘢到肚，當堂打咗個嘶嗝。
「我咪啱啱返完工囉！」細路講到冇氣冇力。
「吓，你唔係著緊你開工嗰條睡褲喎。」阿敏望一望，驗証一下。好多泥水師傅開工都會換條舊睡褲，整到幾污糟都冇問題。
「老豆漏低咗屋企鎖匙喺客個場到，叫我去攞返，咪即係返工囉。」細強一次過拮晒餘下嘅燒賣入口。
「小心鲠死你呀！」阿敏邊講邊揈頭。
細強將膠碗放入垃圾桶，一手搭住阿敏膊頭，兩個人慢慢行返屋企。
佢冇提及巴士上面嘅事，佢自己都唔知點解。
可能係，因為細強覺得——嗰個叫阿晴嘅，
係一個好靚嘅女仔。
諗起，個心又跳。
好彩阿敏聽唔到。
——
夜晚，阿晴喺夢入面返咗去。
返去屋邨，嗰個細細嘅單位。
走廊牆身斑駁，石屎滲出濕氣，每盞燈都同樣昏暗。
佢企喺門口——鐵閘之外。
鐵閘冇鎖，輕輕掩住，鉸位生鏽。
佢伸手想推，但手穿過閘。只可以睇，冇得參與。
屋入面好嘈。
「你又出咗去搵邊個！」
男人把聲既粗又裂，酒氣好重。
「我冇搵人，我只係去——」
女人未講完，就俾一巴掌打斷。
啪。
阿晴喺鐵閘外震咗一下。
屋內，女人踉蹌退後，撞到飯枱，碗筷落地，碎裂聲清清楚楚。男人指住佢，面紅耳熱。
「你當我傻㗎！成日夜晚先出街！你一定係出面勾佬！你以為我唔知？」
啪。啪。
連續幾巴掌打落去。
阿晴想叫，但喉嚨發唔到聲。
屋角，兩個細路坐喺地下。
一個女仔，一個大小小嘅男仔。
兩個人攬埋一齊，女仔膝頭貼住胸口，全身抖震。
「唔好打媽咪呀！」
「停呀！唔好打呀！」
一人一句，聲音沙啞，喊到幾乎斷氣。
女仔不停搖頭，男仔用雙手揞住佢對耳，但手掌唔會擋得住——
罵聲、巴掌聲、撞擊聲。
所有聲音，喺細細嘅單位入面，反彈，再反彈。
男人轉過頭，望住地下嗰兩個細路，眼神凶狠又陌生。
「你哋收聲！」
「大人嘅嘢，幾時到你哋出聲！」
跟住一腳踢開咗佢前面張膠凳。
啪。啪。啪。啪。
阿晴喺鐵閘外衝前一步，用力拍打。「阿爸，你停呀——！」
但係冇人聽到佢把聲。前面一道鐵閘，明顯地分開咗兩個世界。
屋入面嘅細路女抬起頭，望向門口，眼入面全係眼淚同恐懼。
阿晴猛然醒咗。
成身濕晒，心口起伏，指尖微微發抖。
佢記得——呢一晚之後，所有嘢都會變。
佢阿媽帶咗佢走。
佢嘅「屋企」，再冇男人。
佢學識嘢要自己做、唔好麻煩人、唔好多說話。
房入面黑麻麻。佢坐起身，抱住膝頭，呼吸好耐先慢返落嚟。
佢身處嘅地方，冇鐵閘，冇吵鬧聲，冇人俾人打。
但係嗰啲畫面，始終黐住喺腦入面，搣極都搣唔甩。
阿晴伸手抹走眼角嘅淚水，再深深吸一口氣。
佢已經就嚟十八歲。
但係，童年回憶，仍然會自己搵上門。