上個世紀末的一些人和事: 第三十七章 | 長洲賓客 II
落樓嗰陣，細強特別放輕腳步，等對拖鞋唔好啪啪聲咁嘈，因為樓梯窄，幢樓又矮，回聲會特別大，佢唔想嚇親人。
佢跟喺阿晴後面，望住條馬尾一下左一下右，個心都跟隨住，一下一下，盪漾起嚟。
呼吸不自覺地放慢咗，佢自己都唔知，可能係因為空氣裏面，彌漫住一種香氣，而來源，就係前方左右飄逸嘅頭髮。
細強用右手指甲大力鉗咗自己左手一下。
「你個死蠢，唔好亂諗嘢，人哋住私樓上等人，唔到你溝！」佢邊諗邊咪埋眼，以定心神，但係髮香仍然鑽入鼻孔。
「加埋佢而家仲係阿敏個friend，你有咩行差踏錯，一定即刻人頭落地！」細強腦海立即浮現出一個極度血腥嘅畫面——自己被五馬分屍，個頭甩咗出嚟，係地下一路轆，之後仲要被一班女仔當波咁踢。
突然，右腳重心一失，原來佢哋已經落到地下。細強立即睜開眼，但係都成個人向前一撞，好彩左腳仲有力，冇成個人趴落地，最緊要係，佢冇趴落去阿晴度。
阿晴聽到拖鞋刷地聲，都即刻擰轉頭，雙手伸出，扶住細強。「你有冇事呀？」
細強感到，自己比天使抱住，成身冇晒重量，好似係空氣中飄浮。
「唔好意思！我行路唔帶眼，有冇嚇親你？」細強企返直個人，但係唔敢望阿晴，只好低頭道歉。
「你唔駛送啦！」阿晴嗰個會𣪩人嘅微笑，又再出現係佢面前。「我問屋係前面幾步唧。」
「唔得唔得！𠵱到話晒都係東堤，行去邊都要有多啲人氣，唔係行行下，身邊突然多咗件，咁就唔好……」細強細細聲答，主要係因為對於夜晚係東堤落街，佢都有啲怯。
「再者，送你走係阿敏嘅指令，我一定要做。」𠵱個至係最重要嘅原因。
阿敏頭先係樓上畫阿晴對鞋，佢哋你一句我一句，傾圖案，傾顏色，最後仲傾下生活，差啲就講埋心事。到畫完交貨，阿敏就叫細強送人返屋企，自己就一嘢攤落床訓著咗。
「你哋一班人好開心，係唔係成日出嚟玩？」一邊行，阿晴一邊問。
「我哋其實好少一齊出邨，今次都係第一次一齊嚟長洲。我哋收入少，屋企又冇錢，由細到大，多數都係喺條邨裏面同附近打滾，出下旺角都好大件事。」細強耷低頭望地下，覺得自己有小小羞家。
「咁今次點解會嚟長洲嘅？」阿晴望住細強，又嚟一個殺死人嘅微笑。
細強眼尾見到，知道自己完全招架唔住，於是再耷低啲個頭，望住自己對拖鞋。「哦！講起嚟一匹布咁長，簡單嚟講，都係因為啲男女之間嘅瓜葛，我哋係陪人入嚟講數嘅，好彩講掂咗，如果唔係，大家都唔知點算。」佢自己都笑一笑。
阿晴都笑笑。「要入到嚟長洲講數，一定好大件事。」
「都係㗎……」細強覺得唔應該咁快同阿晴講自己人是非，決定轉話題。「咁你哋呢？你都係同你上次班friend一齊？」
「係，不過其實我同佢哋一齊，多數都其係跟隊。今次有人話想嚟長洲影水著相，我冇諗住影，不過都跟埋嚟，幫佢哋拎下衫，攞下三腳架，可以離開屋企四圍行下，都幾好。」阿晴目光向前，輕輕呼咗一口氣。
細強聽到『水著』兩個字，個心立即跳到上食道口，一堆日本四仔嘅片段，不能自拔咁喺個腦度重播——幻想中，阿晴著住三點式，喺海邊玩水，跳下跳下，濕濕嘅長髮，黐住彈下彈下嘅胸前，然後佢仲伸手向後，解開個扣……
「你個死扑街，好停囉喎！你送緊人返屋企㗎，𠵱啲嘢，你留返係屋企打飛機先好諗！」細強再咪埋眼，右手指甲再加重力度鉗多左手幾下。
神經錯亂之下，佢衝口而出：「你都可以影㗎！如果你肯影，啲相一定大把人要！」
阿晴又笑一笑。「儍啦！我唔似佢哋，鐘意扮呢扮路，我件泳衣仲係學校嗰件深藍色一件頭。我其實鐘意生活簡簡單單，好似佢哋會成日去尖沙咀同銅鑼灣食嘢，我跟住去食過一兩次，都唔覺得有乜咁好食。」
「講好食，我哋班人當中有個廚神，你一定要試佢啲手勢。不過佢今晚要睇檔冇嚟，下次我哋去開餐，我叫阿敏預埋你。」細強都有諗，咁樣為下次見面鋪路，會唔會令人誤會。
「睇檔？佢……」阿晴好奇起嚟。
「係呀！佢喺我哋邨口個冬菇亭做，好多人幫襯㗎，人多晚飯就多數冇位坐。我哋通常去宵夜，因為我哋返工嗰幾個，個個都好夜收工，讀書嗰幾個，又係夜鬼，所以其實都啱時間。」細強講完，就見阿晴個樣，有少少唔自在。
「啊……我都知我哋啲屋邨仔喺啲地踎開餐，你唔會食得唔慣㗎喇。」細強當堂好夢成空。
「點會呢，我細個都係住屋邨，屋企都係開大排檔，不過我已經好耐冇食過……」阿晴眼望遠方。
「嘩……咁你阿爸一定係嗰啲成功衝出屋邨，出去開舖，而家係幾間分店老闆嘅大廚……」細強小心試探，但係阿晴就停低腳步。
「呃……我到喇！多謝你陪我行返嚟，唔該再幫我多謝阿敏，我好鐘意對鞋。」阿晴再笑一笑，不過細強睇得出，今次𠵱嗰係一個禮貌式嘅笑容，用嚟遮住一啲唔想俾人知嘅心事。
「儍啦！多謝你俾機會我同你傾幾句就真。」呢一句，細強真心真意。
揮手之後，條巷仔剩低細強一個。佢大力吸氣，深深細味髮香嘅餘悸，佢知道，𠵱幾分鐘嘅出軌行為，會令佢畢生難忘，特別係，佢而家要一條友，係東堤嘅深夜，行返去自己間屋！
——
「你仲係唔係諗住今晚講？」阿玲忍唔住問，因為阿俊一臉茫然。
溫暖嘅海風，滿天嘅星斗，沙沙嘅海浪——完全同兩個人喺天台討論嘅話題，格格不入。
阿俊話過，如果阿豪瑩瑩今晚行返埋，佢同阿玲就應該趁人齊，同大家講佢哋嘅去向。不過，嚟到𠵱一刻，佢自己都唔知點開口。
「我……我……我覺得……」阿俊幾次欲言又止，最後終於抬起頭：「今晚喺度，聞住浸海水味同汽油味，食住燒腸仔同燒雞翼，聽住佢哋班人係下低開枱，我覺得好有歸屬感……」
「……仲有，今日晏晝，我哋幾個去睇啲細路打波，佢哋搏到盡咁打，睇住佢哋我都覺得好熱血，令我覺得，香港一定唔至得李麗珊同黄金寶，可能我都可做到職業運動員，有一日可以代表香港……」阿俊望住天，雙眼發光。
「咁……你係咪，唔再想走？」阿玲坐起身。
「我唔知……」阿俊閉上眼，深呼吸，頭再垂低。「因為我都知，今晚只係一晚，聽晚返到嗰個成日空無一人，就算有人都只係大家扮傾謁，扮乜事都冇嘅屋企，我就會返到現實，返到一個令人窒息嘅世界。」
「如果只係咁，其實你可以搬出去住，留返喺香港，屋企人，想見就見，唔想，就下次，好多人都係咁。」阿玲雙手接住阿俊緊握嘅拳頭，幫佢慢慢鬆開。
「我當然有諗過……」阿俊望住阿玲對手。「問題係，就算人喺香港，亦唔見會有咩前途。而家人人都係錢搵錢，炒股炒樓炒金炒外匯，我哋𠵱啲冇本錢嘅，就算俾你讀書叻入到大學，第時出嚟啲office工都俾啲海歸嘅擸晒。既然係咁，我覺得倒不如自己出去闖下，得就留低，唔得咪返嚟做海歸囉！」
阿玲笑笑。「你講就容易，啲海歸唔係上面高幹嘅子弟，就係有家底讀名校，所以啲銀行同啲乜師物師樓個個都爭咗請，唔似我哋……」佢縮開手，起身行去欄杆邊，望住個海，透一啖氣。
「……我哋𠵱啲住公屋嘅，成績幾好都好，人哋一睇個地址，或者見到你間中學校名，就自動將你張CV揼埋一邊。唔係我作，係我家姐講嘅，佢英文唔差，但係報空姐工嗰時，都要借個住港島嘅friend個地址申請，先至有人in……」阿玲講到有啲激動。
「……佢都話，我應該試下去美國留學，就算俾外國人歧視，都總好過係𠵱度俾自己人歧視！」
阿玲轉身，對返住阿俊。
「所以我真係報咗AFS，而LA真係有學校收咗我。不過，機票未定，家姐話，暑假尾都仲忙，多數唔可以直飛，可能要兜大圈經歐洲同美國東岸，至去到LA。」
「我……我一直以為，只係我迫你去美國……」阿俊起身，行去阿玲隔離。
「開頭係，而家我都洗濕咗個頭……唉！我知我哋兩個都心大心細，所以如果你真係有猶豫，我哋一定要坦坦白白講清楚。」阿玲認真望住阿俊。「徐英俊，你究竟係想走，定唔走？」
「你哋走去邊？」阿敏企係天台門口，隻眼開隻眼閉，個樣似仲訓緊。
「冇……我哋講緊，好唔好走去碼頭嗰邊食宵夜糖水。」阿玲俾阿敏嚇到打咗個突，唯有支吾而對。
「都好喎……」阿敏張大個口打個大喊露。「喂，阿俊，頭先有電話搵你。」
「吓？」阿俊窒咗一窒。「佢真係打嚟？」
「邊個佢？」阿玲轉望阿俊，雙目有啲仇視，因為佢都心裏有數。
「阿熏今日返到嚟，我同佢講我會入長洲過夜，所以俾咗阿敏個電話號碼佢，等佢可以搵到我。」阿俊嘗試解釋。
「阿熏係邊個？」阿敏皺晒眉。
「係佢條仔。」阿玲有氣冇力咁指住阿俊。
「喂！你儍嘅咩，我唔係基㗎！」阿俊即刻起晒弶。
「你去邊度識咗條仔返嚟呀？」阿敏一面迷惑。
「人哋呢，通常同人講自己叫Stephen，但係佢，就可以親密到叫人哋個中文名囉！而家仲一落機就搵你添，你記住遲啲約人出街，要拖實人哋隻手仔呀，如果唔係人哋會好傷心㗎！」阿玲邊講邊奸笑。
「哦！喺Band 1中學打籃球嗰個隊長呀。人哋又靚仔又大隻嗰喎，你咁嘅身世都肯俾你溝，你執到啦！」阿敏收到，一於加入。
「你哋啲女人都黐撚線嘅！」阿俊唔知係真嬲定扮嬲。「攞個電話嚟啦，大設計師！」
阿俊擰轉身覆電話，阿敏就拉住阿玲行去另一面。
「喂，你頭先講笑咋嘛？！」阿敏有啲替阿玲緊張。
「你當我係啦……不過，𠵱啲可能都係件小事……」阿玲轉頭望住傾電話傾到眉飛色舞嘅阿俊。「我唔知，我哋之間……算唔算係有問題。」
「不如落去搵埋瑩瑩阿詩傾下啦！」阿敏拉住阿玲隻手，落樓。
「喂！」阿俊叫住佢哋兩個。
「阿玲，我哋一齊去碼頭接阿熏。」
——
Stephen成程機都冇訓，因為佢太興奮。
一般出咗國嘅留學生，第一次過暑假返香港都會好興奮，離開屋企咁耐，就算唔係掛住屋企人，都會掛住屋企啲餸，會想訓返自己張床，搵返以前學校啲friend。
不過，Stephen訓唔著唔係𠵱啲原因。
佢係等咗成年，等返香港改頭換面，做另一個人。
佢點解會想咁，佢自己都唔知，佢剩係知，佢唔鐘意以前嘅自己。
讀中學嗰幾年，因為知道自己有少少天份，所以佢一心一意打籃球，除咗打波同讀書，就冇理過其他嘢。佢得閒就跟班波友四圍玩，佢哋個個屋企都有錢，但係大家嘅父母，都唔係忙生意，就係忙應酬，除咗個個月俾錢佢哋駛，一般都唔得閒理佢哋。
所以，佢哋生活揮霍，想買乜就買乜，想食乜就食乜，大搖大擺，目中無人，但係自己唔覺。
Stephen知道自己唔係𠵱種人，但係佢冇出聲。
嗰次佢喺波鞋街，同阿俊講完拜拜之後，大家就對佢，議論紛紛。
「Hey，Stephen！頭先個屋邨仔係邊個？」同學Ａ問。「佢係唔係窮到鞋都買唔起？我哋駛唔駛平平地求其買住對Reebok俾佢著住先？」
成班人一齊笑，Stephen都有，不過，佢個心唔想。
「佢係上次去人哋學校打波嗰隊個隊長，我之後同佢打過一次one-on-one。Man, he’s really good yah know！」Stephen講起都興奮。
「Shit man！You’re not hanging out with those people，are you？」同學Ｂ插一句。「唔好映衰晒我哋喎！My mom said啲屋邨三教九流，黑社會當道，你小心俾人知道你家底，之後俾人標參！」
「Shit yeah！你真係要小心啲！」一班人都附和。
Stephen想講：「黐線！」，但係冇講出口。
佢後悔到而家。
佢認識嘅阿俊，唔單止唔會搵人標佢參，仲會出手保護佢身邊所有嘅人。
幾個月嘅ICQ，阿俊俾佢知道，咩叫做真朋友，咩叫做交心。
特別係，阿俊阿爸阿媽嘅事，基本上同自己處境一模一樣。佢哋兩個身同感受，大家都明乜嘢叫做，有屋企等於冇屋企。
佢知，阿俊一早就當佢係兄弟，而佢自己都願意，死心塌地，為阿俊做任何事，包括幫阿玲搵到AFS𠵱條路。
佢仲叫阿俊，話係自己係喺車房聽返嚟，唔好俾阿玲知係佢報料。佢唔想阿玲誤會，以為係佢迫佢哋兩個過去美國，佢只係想，幫阿俊做到自己想做嘅事。
今次返香港，Stephen決心要試下過屋邨嘅生活，佢要話俾大家知，雖然背景唔同，但係佢係認真想同佢哋成班人做朋友。
阿俊都認承咗，仲話Stephen可以喺個朋友個單位住，橫掂個朋友間屋都係得一個人。
所以今晚開始，Stephen唔再係Stephen，佢係阿熏——一個以前佢覺得好娘嘅名，但係而家，俾阿俊日日咁叫，叫咗幾個月之後，已經變得好親切。
船到岸，阿熏孭起背囊，跟住同船嘅幾個人，行落碼頭。同佢哋唔同嘅係，佢哋係喺長洲住，而阿熏就係第一次嚟長洲。
落到樓梯底，阿熏就見到阿俊同阿玲。兩條仔一見面，即刻嚟個handshake，之後仲攬埋一嚿。
阿俊對住阿熏，笑到見牙唔見眼。「嘩，熏爺！你微服出巡呀！」事因眼前嘅阿熏，都係著住街市買嘅Ｔ裇波褲拖鞋，同阿俊一模一樣。
「唉！恭喜你哋有情人終成眷屬就真！」阿玲就拎頭兼反眼。
「玲姐，唔好玩我啦！」阿熏伸出右手，阿玲笑笑，都拍咗佢一下。
三個人起行返東堤。沿路，阿熏同阿玲講佢係美國嘅生活，介紹LA有咩名勝，幾時去迪士尼最抵，邊度有乜嘢好食，同埋返學要注意嘅嘢，由其係有邊種人要避開。見阿玲同佢有問有答，阿俊都放低心頭大石。
行到東灣，阿熏見到籃球場，就即刻衝落去，掉低個背囊喺籃底。「喂！有人留低咗個波，我哋嚟個one-on-one……」
「好夜囉喎，熏爺。」話就咁話，但阿俊都係一支箭咁跑落場。
阿玲坐喺場邊，見到兩對踢埋一邊嘅拖鞋，突然好似有種似曾相識嘅感覺。
幾年前，佢都日日係咁，坐係場邊，睇阿俊打波，自己都超級投入。嗰時嘅阿俊，力量同熱誠爆晒燈，同頭先喺天台嘅佢，完全係兩個人。
多得阿熏，舊時嗰個，有波打就連飯都唔食，跑足全場氣都唔喘嘅三分皇阿俊，而家返番嚟。
阿玲望住佢哋，突然覺得，三人行，其實都唔太差。
——
半個鐘之後，兩個打大赤肋，成身臭汗嘅男仔出現喺渡假屋門口。阿俊一入屋，就踢開拖鞋，大字型攤喺地下。
「喂！死開啦！成身臭汗。」阿敏即刻縮對腳上梳化，唔想掂到佢。
「地下最涼呀！」阿俊指住阿熏，向大家宣佈。「𠵱個見過啦！我哋啱啱打完波。」
細強同阿豪打個眼色，兩個人就一齊行去阿熏度，同佢嚟個handshake。肥仔輝打緊Gameboy，唔得閒應，但都有同阿熏揮下手。
「去打波唔叫人呀！Stephen哥，係唔係嫌棄我哋唔夠班先？」細強笑笑口講。
「梗係唔係啦！今次即興，聽日大家一齊落場。」阿熏好尷尬咁𢯎𢯎頭，對住全屋一眾：「大家唔好咁生外，我中文名叫何兆熏，叫我阿熏得喇！我今晚咁夜嚟插隊，你哋留返個地下俾我訓就得喇。」
「你遲啲再介紹吧啦，我哋仲有瑩瑩同阿詩兩個係樓下，加埋你哋兩個成身汗，不如去沖個涼先仲好啦！」阿敏冇辦法完全避開阿俊，唯有咁提議。
「個厠所咁細，唔夠佢哋兩個人鴛鴦戲水喎……」阿玲笑住口補句。
「玲姐，都話唔好玩我啦！」阿熏答得有啲驚。
阿玲邊笑邊伸手摷亂阿熏個頭。「唔玩你喇！益返你，帶你落樓下女仔嗰層個厠所沖喇。」
「我帶，我帶！」阿敏即刻舉手，然後指住阿俊。「我要避開呢件生化武器。」
阿熏都好想沖個涼，於是喺個背囊度攞條毛巾，跟阿敏落樓下。
「𠵱，熏哥，聽講你一落機就入嚟搵阿俊喎！真係夠兄弟。」阿敏喺樓梯度問。
「叫我阿熏得喇！係呀，橫掂我屋企都冇人，我阿爸阿媽兩個長期喺大陸。」阿熏一早決定，今晚豪無保留，有問必答。「我就算係香港都好少見佢哋。」
「哦，都好正常啫，佢哋係唔係上面有大生意？」阿敏繼續八掛。
「我阿爸係東莞有間電子廠，佢話係夕陽工業，所以要長期喺廠度𥄫實。」阿熏聲線平淡，繼續從實招來。「不過，我阿媽知，佢唔返落嚟，係因為佢係上面有另一頭家。」
阿敏聽到，個心都沉一沉。原來，有錢人，都只係風光於人前。
「到喇。」阿敏推開大門，阿熏跟住，不過，就俾門口嗰半級樓梯撠一撠，成個人一下扑向前，拖鞋大聲拍落地下。
入到去，厠所門就打開。
阿詩沖完涼，正用毛巾抆乾頭髮，一邊行出嚟，一邊講：「Shhh！瑩瑩係房訓緊，你哋唔好咁嘈……」
佢同阿熏四目交投，表情驚訝。
「Stephen？」「Wincey？」兩個人同時發聲。
「吓！你哋又識㗎！」阿敏覺得今晚，真係不可思議。