中醫成長之路 - 益泰傳: 第十三章(上)：回陽救逆 以破格救心

（本章內容涉及大劑量生附子的使用，情節純屬虛構，絕非真實醫療紀錄。大家務必遵守當地法規，切勿自行服用！）

—————————

海大富攔在門口，眼神陡然變得無比銳利並道：

「沈醫生，出面家吓橫風橫雨，你車上啲儀器又壞鬼晒。估計等得支援嚟，個老太婆已經香咗啦！」

「我同你講，佢入得嚟我海大富跌打館，就有命出得返去！」





「就由我哋嚟向閻羅王搶人！」

沈希文被海大富的威勢，鎮懾得倒退兩步。正要發難反擊，海大富卻已走開，轉向林志遠大聲下達指令：

「喂First Hon！」海大富以雄渾聲線喊到：

「先去攞30克高麗參分開急煎！落碗半水煎剩細半碗！！」
「好！」

「然後去入面檢查吓個『砲佬』！」(砲爐)





「跟手搵嗰個七升大嘅砂煲出嚟沖一沖水，要用佢嚟急煎主方！」

「跟住同我聽清楚藥方，唔準出錯！」

「係，師傅！」林志遠邊衝入廚房，邊高聲應到。

————————————————

「 之後講嘅，係全部一鑊過！」




「收倒！」

「首先係主菜，聽清楚！生附子 150 克、山萸肉 90 克！唔好攞錯咗炮附呀吓！！」
「係！」

「之後喱兩個超級無敵重要！」
「炙甘草 60 克、乾薑40克，記住可以落多！但絕對唔可以少！」
「得！！」

「 跟住！攞早幾日已經打碎咗嘅生龍骨、生牡蠣、磁石，各30 克！」「好！」

「再加瓜蔞 30 克、薤白 15 克、丹參 45 克！同我全部掉晒落去加兩足公升水，一鑊過用炮佬武火急煎，煎剩差唔多一碗！」
「知道！」

「最後，同嗰細半碗先煎嘅高麗參藥汁、連埋10克嘅三七粉 同 0.1克嘅麝香粉，全部溝埋佢！」




「無問題！！」

林志遠不敢怠慢，身形一閃，已從廚房躍到藥櫃，開始抓藥。

沈希文聽到這個藥方，職業本能讓她倒吸一口涼氣，並厲聲喊道：

「痴線嫁你哋！生附子 150 克？！噉樣會毒死呀婆㗎！」

「附子嘅烏頭鹼會直接引發致命嘅心室顫動（VF）! 更何況心栓未通，你哋噉樣用藥間硬谷血壓，絕對會攪到佢出血性中風！！」

————————————————

「定啲嚟沈醫生，妳剩係知生附子有烏頭鹼毒，但就唔知道某啲中藥，係能夠減緩某啲中藥嘅毒性喱回事！」

另一邊傳來林志遠不斷撞開藥櫃拉環的聲響，海大富則邊替老婦人把脈邊續道：





「重用炙甘草 60 克，就係要藉住當中嘅甘草酸同烏頭鹼結合，噉樣改變咗烏頭鹼嘅毒性結構之餘，可以同時保留住生附子回陽救逆嘅功效！」

「另外，將乾薑同生附撈埋一齊，用超高溫去急煎嘅時候，係能夠加速烏頭鹼水解既過程，變成毒性較低嘅次烏頭鹼。」
「喱兩個就係大大減低生附子毒性嘅方法！」

「再講，喱個大劑量生附子嘅用法，係我國著名老中醫李可，經過數百例臨床垂危急症所驗證過！」

「亦有當時醫院嘅正式記錄同後續研究，所以響危急病情用大劑量生附子，絕對唔係咩妄顧安全之舉！」

「至於用藥思路呢，我講你都唔會明嫁啦，廢事晒口水！第時你有興趣想知嘅，你自己約First Hon慢慢傾啦！」

「吓？！⋯」沈希文聽得一肚氣正欲搶話，但未及開口，廚房傳來「砰」的一聲巨響。

那是海大富專門用來熬膏藥的鑄鐵單眼瓦斯爐（砲爐），剛被林志遠點燃並調大火力。猛烈的藍火隨即狂暴地舔著那個七升大砂煲，而這場與閻王的決戰，亦正式展開序幕。





————————————————

「啲藥攪掂最快都要四個字至半粒鐘，但老太婆唔等得！」海大富闊步跨到擔架前，眼神沉穩如山：
「一定要用針幫佢頂住先！！」

海大富隨即備出一排獨立包裝長針，眼神瞬間變得極其專注。他一邊細心地用酒精搓手液搓手，並替老婦人將要落針之處消毒，一邊緩緩地向沈希文道：

「沈醫生，急性心臟病嚟講，西醫嘅病因，一般係冠狀動脈阻塞，係著眼於實質器官嘅結構同功能狀況。」

「至於我哋中醫，急性心臟病除咗要顧及實質器官嘅狀況之外，仲要治理埋嗰啲『你睇佢唔倒，但係實際存在既 氣血陰陽運轉』⋯」

話畢，海大富便出針如風，手起針落，指尖運起微不可察的暗勁，直刺老婦人雙手手腕處的內關穴，與雙足內側的公孫穴！

「首先，內關配公孫！使陰維合衝脈，直通心胸、暢利心神。」




內關與公孫雙針齊下、氣機交會的瞬間，老婦人原本微弱如絲的呼吸發出了一聲低嗚。

「路已開，老太婆家下氣血停擺心陽暴脫，一於用『回陽九針』隨證取穴，先救水土！」

再落針前，海大富先探老婦人之太溪脈 及 趺陽脈，雖極微弱，但指下確實尚存一絲搏動：

「噉鬼好彩！中陽同元氣未散得晒，仲有得掹！！」

————————————————