中醫成長之路 - 益泰傳: 第十四章：誘惑 與 抉擇（上）

自從林志遠於狂風暴雨之夜，用古典針法救了李師奶那位大崩漏的女兒後，他的名字及當晚事跡，在醫局街、以至整個油尖旺區徹底傳了開來。

現在，每日醫館一開門，便陸陸續續有人慕名而來，指名要由「小林醫師」看診。 有人甚至將林志遠拯救崩漏女生一事，向《東張西望》報料。製作組曾派人前來採訪，之不過登門拜訪多次，都吃了海大富的閉門羹。
 
——————————————————————————————
 
時值初伏以後，地面上已覺熱氣熏鼻，街道彷如一個大蒸籠。 午飯剛過，林志遠坐在案桌前，正埋首於《長沙藥解》之中。

當看到不明白處要找海大富請教時，醫館木門被輕輕推開。一陣極其精緻、帶有淡淡古龍水味的時尚香風，瞬間沖淡了館內濃郁的藥材味。





進來的人身穿筆挺西裝，梳著一個韓式 All Back頭 ，手上提著一個高檔真皮公事包。 林志遠抬頭一看，整個人愣了一下：

「Ronald？！你點會知我係喱道㗎？」

這位Ronald，是林志遠大學時期的同房。

如今，Ronald是大灣區最大連鎖中醫集團「顧生堂」，在香港區最年輕的明星中醫師。
 
——————————————————————————————
 




Ronald先是嫌棄地看了一眼鋪滿灰塵的藥櫃，又看了看蹲在藥斗上，懶洋洋地舔毛的「陳皮」。然後再把視線回到林志遠身上。

他嘆了口氣，走到林志遠對面坐了下來，一副痛心疾首的模樣道：

「阿遠呀，我真係服鬼咗你。堂堂一個港大一級榮譽畢業生，你都算係精英嚟。家吓居然匿喺間爛鬼跌打館做打雜、竟然仲要親手執藥！」

「你睇吓你，件白恤衫都黃晒啦，你唔覺得咁樣係糟蹋緊你自己咩？」

林志遠心有不悅地報以一笑，然後倒了杯龍井遞了過去，





並回應道： 「邊度睇症無分別嘅，都係醫人啫。」

「Ronald，你今日過嚟，唔係嚟探我班噉簡單掛？」
 
——————————————————————————————

 Ronald接過茶，沒喝。 隨手放在桌上。神色一正，並壓低聲音道：

「阿遠，我今日過嚟，係帶咗個超筍offer畀你。」

「我哋「顧生堂」香港區CEO，最近想開拓『古典經方派』嘅藍海市場，打算包裝一班有學院背景、又善用經方嘅年輕醫師，成為集團嘅經方明星。」

「因為你喱期出晒位，所以我哋高層極力想招攬你。只要你肯過嚟，以前「趙總」單醫療投訴*，集團會出面幫你攪掂！」
 
——————————————————————————————




 
*趙總一案，可參看第三及第四章
 
——————————————————————————————
 
「除咗中環新店嘅獨立診症室留咗畀你、嗰道仲有我哋集團自主研發嘅『抓主證經方系統』畀你用添。」

「至於底薪，係接近六位數，仲會額外有五位數嘅住屋津貼。」

「阿遠，呢個絕對係你翻身、重返中環嘅黃金機會！」
 

聽到「中環」二字，林志遠心跳不由自主漏了半拍。

「中環……獨立診症室、年薪百萬…」 摸著自己因粗活而磨出來的厚繭。他腦海裡不禁浮現出以前的生活：





「坐响冷氣大到要著外套嘅靚裝診室。」

「响系統輸入「脈、舌、症」，就會全自動彈出處方建議同配埋藥既自動化系統。」

「病人開開心心碌卡畀錢，我就收佣，到月尾人工袋袋平安。」 「精緻、乾淨、高尚。」

「完全唔似得依家咁，突然一個急症險症，就攪到成身臭 同 要冒超大嘅醫療風險…」


Ronald見林志遠有些動搖，立刻從公事包掏出一份合同，放到他面前。
 
——————————————————————————————
 
「阿遠，唔洗諗喇！呢個世界講嘅係包裝，同商業化！」





「中醫藥點都要與時並進嘅，用大數據套方，既安全又有效率，就算真係出咗事，都會有集團幫我哋頂住。」 

「你喺呢度跟住個日日飲孖蒸嘅亞伯，會有前途咩？佢教你嗰套叫『咩咩周流』話？」

「大數據幾秒鐘就出倒診斷同處方建議，仲洗鬼慢慢去摸脈、問診咩，更加唔需要嗰套『咩咩周流』。」


就在此時。「碰轟！」 後門那扇厚重的木門被一腳踢開。

「邊個响我醫館講大數據？！」「邊個喺度放屁！！」
 
 ——————————————————————————————