［重口味］罪與罰: 第十回 倒數開始
第十回 倒數開始
烈日當空嘅正午，熱浪逼人，正常人都會匿喺冷氣房或者室內避開個太陽。
不過總有例外。喺一個無遮無擋嘅室外球場外，一班唔怕曬嘅中學生正喺度打緊波。對呢班後生仔嚟講，有波打就乜都唔怕，始終係自己最鍾意嘅運動，熱成點都頂得順。
喺運動場外圍嘅跑道上，有一個女仔正在練跑。多數女仔都愛美、唔鍾意曬黑，絕對唔會喺呢種天氣之下練跑。淑貞都唔例外，只不過，依家係「唔到佢唔跑」。
跑道邊，有一個男人神情嚴肅咁企喺度，一隻手按住計時器幫淑貞計時。呢個男人不停搖頭，眉頭深鎖，塊臉黑過墨斗，好似極之不滿淑貞嘅表現。當淑貞面色蒼白、好辛苦先挨到終點嗰陣，個男人不但無上前扶佢，反而對住佢大聲呵斥：「妳有無搞錯呀？跑出個咁嘅成績！妳到底有無盡力㗎？！」
淑貞雙手按住膝頭哥，成個人弓到蝦米咁，一邊瘋狂喘氣一邊用沙啞嘅聲線話：「阿爸……我……已經……好努力……㗎啦……」
呢個男人正係淑貞阿爸，亦係高級警司人人都叫佢做「關 Sir」。
關 Sir 絲毫無動容，繼續大聲呼喝話：「努力？！妳睇下妳自己？連嗰啲打波嘅中學生跑得都快過妳呀！」
淑貞扯到個肺都就快裂開，仲未回到氣，但係關 Sir 完全無理會佢嘅痛苦，冷酷咁落命令：「休咩息？再跑多四個圈！Go！」
淑貞連啖水都未有得飲，唯有拖住灌咗鉛一樣嘅雙腿又再開始跑。三十幾度嘅高溫熱浪撲面而來，再加上劇烈運動，佢覺得自己個頭好脹、好重、太陽穴突突咁跳，好似隨時會炸開咁。不過佢只能咬緊牙關繼續跑，因為佢太清楚阿爸嘅性格——依家唔跑完，陣間嘅懲罰只會更加痛苦。
好辛苦、好勉強咁再挨多四個圈。就喺淑貞將近跑完最後幾步嗰陣，耳邊忽然傳來一聲極之刺耳、尖銳嘅高頻耳鳴聲。剎那間天旋地轉，眼前嘅景物全部扭曲，佢嘅手腳剎那間失去控制，半點力都使唔出。眼前一黑，淑貞終於體力不支，重重咁跌喺滾燙嘅石屎地上。
嗰班打緊波嘅後生仔見到有人暈低，立即停低走過去睇下發生乜事。成班人圍成一圈，其中有人一邊撥涼一邊話：「喂！佢睇嚟係中暑呀！大家散開少少，畀啲空氣佢！」
又有人大叫：「快啲！邊個有水？攞支水過嚟！」
好快，就有人遞咗支蒸餾水過去。其中一個男仔好心幫手扶起淑貞個頭，另一個就小心翼翼將水樽邊湊到佢口唇。
淑貞勉強飲咗一小啖水，喉嚨浸潤咗一下，神智好似清醒返少少。就在呢個時候，不遠處傳來一聲充滿威嚴同憤怒嘅大叫：「所有人行開！」
啲學生見到個阿爸口黑面黑、成個殺神咁走過來，當然嚇到即刻散開。
淑貞雖然醒咗少少，但係視線依舊模糊一片，耳邊只係不停傳來阿爸無情嘅大叫：「仲唔起身？！妳想偷懶到幾時呀？！」
嚴父嗰種近乎虐待嘅鞭策聲，好似厲鬼咁不停喺腦袋入面迴響，震耳欲聾，迫使原本連眼皮都重到撐唔開嘅淑貞再一次企起身——呢個係一種意志嘅磨練，無論幾惡劣環境都依然要堅持！
忽然一滴水珠打落淑貞面上，令到佢從夢中驚醒。
呢一滴唔係尿亦唔係精，而係一滴雨水。
呢一晚落住傾盆大雨，破屋嘅瓦頂早已經穿咗個大窿。
雨水不停從呢個窿流入屋內。
淑貞望住啲雨水有如天降甘露，佢企起身攞開咁喺身上嘅粗麻布。
雖然手腳依然被綁住，但係勉強可以行埋去雨水流落嚟嘅地方。
雨水落到好似花灑一樣，當水滴打係面上時，一分清涼冰冰感覺另淑貞精神為之一振，甘甜嘅雨水流入口中。淑貞大大啖盡情飲。
雨水將身上嘅污糟同尿嗅味一同沖走，淑貞精神為之一振。
咁多日嚟最清晰就係現在，呢一刻佢話比自己知，只要仲有一口氣都唔可以放棄。
到咗第二日（AM 07:30）
光頭原本打算同其他人一樣瞓到自然醒。點知瞓瞓吓，身邊忽然傳來陣陣刺耳嘅電話響聲。
光頭第一時間喺床上彈起身，迅速接通電話。
電話嗰頭傳嚟一把沙啞沉重帶有濃烈鄉音嘅嘅男人聲：「你哋準備好未？」
光頭連忙話：「隨時都走得㗎喇。」
男人冷冷問：「係唔係三個人？」
光頭話：「係。」
電話嗰頭靜咗幾秒鐘，隨即語氣一沉：「呢排風聲極之緊，水警查得好嚴。我要收多一倍價錢。」
光頭一聽火都嚟埋，大聲鬧：「乜話？！一倍？！你唔好去搶？！」
點知男人冷笑一聲，靜咗兩秒之後淡然道：「依家兩倍。你再嘈，就三倍。」
光頭嬲到想將電話扔爛，但依家肉隨砧板上，命脈喺人哋手，只好咬牙切齒話：「兩倍就兩倍！你唔好再反口啊！」
男人冷冷道：「總之你哋準時出現，我隻船唔等人。」講完即刻掛斷。
光頭狂罵了一句粗口，極之不爽咁收埋電話。隨後佢伸手入衫袋，摸咗一支銀色嘅 USB 手指出來。
望住呢支外表極之普通嘅 USB 手指，佢拉開 Type-C 插頭，直接駁入手機。
光頭睇住手機螢幕，面上露出一個陰險而貪婪嘅邪笑：「哼……只要有咗呢支嘢，老子呢幾世都洗唔晒啲錢！」
咸蟲被佢嘅吵鬧聲弄醒，伸個懶腰問：「乜事呀大佬？」
光頭將手指收落衫袋，黑埋張臉話：「準備走路。」
傻強第一時間眼神一閃，問：「咁……條女呢？」
光頭斜眼望一望傻強，跟咗自己咁耐，
當然知道呢條友諗緊乜。傻強嚇到唔敢再多言。
光頭此刻心情極差，急需搵嘢發洩。
未完待續