罪與罰 （暫定）

第一章 女警司

第一回 旺角黑夜

電視播放緊七點鐘晚間新聞。

失蹤多日的女警司關淑貞依然未搵返，警方發言人表示已經全力尋找，並公開呼籲如果有人有任何線索，請立即通知警方。

旺角警署內所有人都好緊張，希望可以盡快搵返Madam 關。可惜已經失蹤多日，大家都心中有數，作咗最壞打算。



喺大房入面，好多伙記已經日以繼夜、不眠不休咁搵咗好多日。有啲好疲倦咁瞓喺枱上休息，有啲依然盡最大努力，動員所有可以用嘅資源發散人手去搵。

就喺一片死寂嘅房間入面，忽然聽到急速嘅腳步聲從遠至近。
有個軍裝匆匆忙忙咁跑入房間大叫：「喺西貢沙灘搵到一具無頭女屍！」
當所有人聽到呢個消息，無人夠膽出聲。過咗一陣，開始聽到有女同事發出哭泣聲。
有幾個男同事更加係第一時間沖出去，要第一時間趕去現場。
到底 Madam 關發生咗乜嘢事？

（數日前）
旺角警署入面一個大廳，坐咗一班正準備出動嘅警員，入面有軍裝，亦有便衣。佢哋喺度等緊出發前準備嘅 briefing（會報）。



其中兩個坐後排嘅便衣警員，一老一少。老嘅係一個老差骨，人人都叫佢做「老鬼」，好明顯對呢啲例牌會報無乜興趣，只係低頭望住手中份馬經。後生嘅叫阿生，啱啱相反，佢表現得好興奮。主要有兩個原因：第一，今次係一個「掃黃」行動，對後生仔嚟講無嘢刺激得過捉雞，既可以八卦下有無靚女，有時仲會捉到啲偷食男女，滿足下好奇心。

兩個人不時交頭接耳、細細聲吹水。就喺佢哋傾得興起嘅時候，一個穿著一套深灰色西裝及膝裙、腳踏高踭鞋嘅女人行入嚟。
呢個女人就係佢哋嘅上司 Madam 關——關淑貞。亦係阿生開心嘅另一個原因。

Madam 關一頭烏黑嘅波浪長髮披肩，雖然無化妝，但搽咗淺紅色唇膏，襯托出佢雪白嘅肌膚。眼大大，成熟得嚟帶住一股極具侵略性嘅女人味，就算著住西裝外套都包唔住佢嘅火辣身材，所以有個花名叫「大波 Madam」。但因為身為高層，加上常年辦案，樣貌顯得有幾分嚴肅冷艷，令人不敢直視。

佢拿起手上嘅文件，用清脆而威嚴嘅聲音開始講解今晚嘅行動部署。
一老一少當然係無理會，繼續喺下面細細聲傾計。



阿生吞咗吞口水，對眼𥄫住關淑貞：「老鬼，你睇下 Madam 關，佢今日著晒成套老西，但係下面居然著住對三吋高嘅黑色漆皮高踭鞋，對絲襪腳不知幾修長……」

老鬼目光從馬經移一移，望一望話：「一陣完咗行動要開記者招待會呀，當然要執正啲啦。」

阿生一臉疑惑：「著裙同高踭鞋……一陣追捕起上嚟點做嘢呀？」
老鬼睥一睥阿生，沒好氣咁話：「你第一次掃黃呀？幾時有追過犯？有邊一次唔係乖乖咁男左女右企晒喺度呀？就算真係做嘢都可以換對波鞋啦。」

被老鬼咁樣一窒，阿生當堂無聲出，過咗一陣，阿生望住淑貞緊身西裝下隱約突顯嘅豐滿上圍，又忍唔住細細聲話：「Madam 關咁靚女，身材又咁正，做警察真係嘥晒，當年應該去選港姐啦。」

老鬼淡淡然話：「人地警察世家嚟架，我睇住佢入行，由見習督察做到今日嘅高級警司，都算係叻女。」
阿生八卦問道：「咁有無見過佢同邊個拍拖，或者有男朋友呀？」
老鬼又睥一睥阿生，好似睇穿呢個後生仔嘅心意咁：「佢以前同個伙記拍拖，之後散咗，就未見過佢話拍拖喇。」
阿生唔係好信話：「係真唔係呀？做見習時……咪十幾年前？咁耐無掂過男人，唔知會唔會好餓？」
老鬼偷笑話：「自摸唔得咩？」


阿生繼續講：「咁靚女，身材又咁惹火，無理由無人追架。」
老鬼冷笑一聲：「你未被佢鬧過咩？佢發起威上嚟兇狠過老虎。畀你，你夠唔夠膽做佢男友、降伏呢隻胭脂虎？」

呢樣阿生心知肚明，Madam 關出晒名惡。要喺一班臭男人入面生存、帶領下屬，女人絕對唔可以示弱。不過一個女人太過強勢，在現實中確實係好難搵男朋友。

忽然，阿生腦海浮現起一絲邪惡嘅幻想，開玩笑話：「唔知佢咁嚴肅嘅西裝入面，會唔會著住啲好性感嘅蕾絲內衣呢……」

老鬼聽完，微微偷笑，無出聲。

阿生繼續話：「對腳咁長一定好滑好正，再加埋性感蕾絲內衣真係殺死人。」
老鬼話：「你小心畀佢聽到，到時調你去守水塘，你就日日對住啲牛幻想。」

正當阿生想回應老鬼時，忽然聽到淑貞好大聲好惡咁鬧：「你兩個嘈夠未呀！小學生呀！」被 Madam 關一鬧，兩人立即唔夠膽再出聲。

淑貞講解完大隊就正式出發。今晚行動無風無浪，一如以往咁順利，成功搗破咗個賣淫竇口，拘捕咗一班非法入境賣淫嘅北姑。



正如老鬼所講，行動嗰陣淑貞換咗一對波鞋，表現精明幹練；到開記者招待會面對傳媒時，佢又著返對黑色高踭鞋，將雙腿線條拉得極為誘人。再強勢、再威嚴嘅女人，骨子裡始終都係鍾意扮靚。

做完一輪大龍鳳收隊返到警署。可惜行動成功並不代表工作完結，之後仲有排山倒海嘅口供同文件工夫要跟進。好彩呢啲手尾唔使淑貞親自做，佢見無乜特別突發嘢，就同下屬交代咗幾句然後準備收工。

此時夜色已深，佢同平日一樣，揸住自己部黑色 BMW 320i 跑車返西貢屋企。當佢開到去清水灣道時，前方一部灰色嘅七人 Van 忽然吸引住佢嘅注意。

呢部七人 Van 揸得極快，而且左搖右擺。雖然呢條路平日最出名多非法賽車，但甚少人會用七人 Van 咁樣揸法。部七人 Van 沿途一直狂飆無減速，淑貞憑住多年做警察嘅敏銳直覺，強烈覺得部車一定有問題。心念一動，就熄咗大燈、開住底燈，靜靜地喺佢哋後面。

七人 Van 一直揸，由大路轉入咗一條偏僻嘅無燈小路。淑貞緊隨其後。去到一個荒僻位置，佢見前面部車開始收慢，睇嚟應該快到目的地。

淑貞知道呢附近非常荒涼，行前少少仲有幾個隱蔽嘅私人沙灘，佢心諗：「通宵開架七人 Van 嚟呢度……唔通係大飛走私？」

於是打算打電話通知下屬，點知呢度太偏僻居然收唔到信號。
淑貞大罵：「有無搞錯呀，垃圾中移連一格都無。」


就喺佢打唔通電話時，見到部七人 Van 最後停咗喺一間破爛嘅廢棄村屋附近。
Madam 關立即拉起手掣，將車停喺遠處嘅樹蔭下，落車偷望。佢看見車上下來三個男人孭住背囊鬼鬼祟祟咁東張西望，但奇怪嘅係，佢哋無喺車尾箱搬任何貨物出嚟。

Madam 關眉頭一皺，心想可能佢哋係嚟「接貨」，多數係內地走私香煙或毒品入境。
三個男人慢慢行向沙灘方向。但當去到沙灘時，佢哋並無聚埋一齊，反而分開向唔同方向散開，好似喺度巡邏把風咁。

淑貞覺得更加奇怪，正常接走私貨都係等船到、一齊搬貨，絕對唔會咁樣四圍走。
由於今晚天黑加上烏雲密佈，在完全無燈光嘅海灘下好難睇得清楚。
正常情況應該call返上總台搵支援，但係淑貞覺得，三個走私客自己應該攪得掂，而且現在call得嚟佢地都已經走咗。

於是淑貞決定落車壓低身，憑著夜色靜靜行近，想睇下呢班人到底搞乜鬼。

當接近村屋時，淑貞搵咗一個隱蔽嘅草叢作為有利位置望向沙灘，見到其中一個男人喺岸邊用電筒閃爍打訊號，而另外一個男人喺遠處拉開帆布——原來下面藏有一隻大馬力嘅改裝快艇。佢哋又唔似接貨，又唔係走私，到底喺度想做乜？

就喺淑貞猶豫緊要唔要搵增援時，忽然聽到背後草叢傳嚟一陣微弱嘅腳步聲！佢心頭一驚正想轉身，但已經遲咗。



一隻粗壯、散發著尿臭味嘅手臂，以迅雷不及掩耳之勢，從後面狠狠地勒住咗佢條白嫩嘅頸項！咁樣被人從後襲擊，想甩身都難。

未完待續