《怪事》二(B)、〈中學時，我切過的牛眼〉9月8日更新: 二、〈中學時，我切過的牛眼〉

二、〈中學時，我切過的牛眼〉
 
講這件事之前，做了大量有關牛的資料搜集，由牛的生理特性，牛在食物鏈的獨特位置，到鬥牛運動，金牛像故事等等。但在此先說明，大量的資料搜集不代表這件事是 「老作」的，而是因為在中學時我的一些經歷在最近有了一些新發展，所以才不得不找一些資料，希望藉此解釋我心中的疑團。
 
這事要由上個月說起。
 
上月，我收到一封電郵，電郵由我中三時的一名綜合科學老師──周鐵發出。
電郵內容提及一件發生在我中三時，在周鐵老師的科學課堂的事，對於那事，我印象都有點模糊了。
 
於是，我立即登入當年的 Weblog，重新回憶一遍當年發生的事。




 
當日網誌如下：
 
今日上Science，Bio session，上一堂講好咗今堂係切牛眼，上星期已經同組長去咗街市買好，放咗入冰格，雪到硬繃繃，朝早放入書包帶翻學校，有 d 驚會砸爆隻眼，所以行路都特別小心。
 
Lunch後連續3節都喺bio,周sir喺第一節嘅時間用圖加影片解釋切牛眼時要注意嘅地方。
 
周Sir 話牛眼同人嘅眼喺好相似，而分別只喺牛眼比人眼大，同牛眼有四組肌肉包圍；人眼就有六組，牛眼嘅郁動同人差唔多，只不過無咁靈活。所以解剖牛眼可以幫我地了解人類嘅視覺神經。
 
佢話我地切嗰陣要先帶上眼罩同手套，用鉸剪先剪走附喺眼球後面嘅肌肉，而揸鉸剪喺有特別嘅方法，一定要用中指加母指扣住鉸剪嘅兩個圓環，不可以用食指加母指，好似勞作剪紙咁，因為咁樣唔可以大幅度咁展開鉸剪，會影響去除牛眼外部肌肉，令有多餘嘅肌肉殘留，影響準確咁搵出嘅牛眼連去腦部嗰條視覺神經。




 
去除咗眼球嘅肌肉我地就可以清楚睇到成個完整嘅眼球，分別由鞏膜同角膜包圍住。

我地嘅任務係喺一堂之內搵出虹膜、晶狀體同視網膜，將佢地分開放好係盤度，而且要晝圖記錄低佢地嘅形狀。
 
周Sir分派咗手套、眼罩同鉸剪畀我地，第二節就開始切。
 
由於隻眼一抽二lung，連着肌肉，我嗰組就猜包剪揼，最終我輸咗，所以我就負責操刀。
 
一開始，剪走肌肉好容易，好快就剪好，露出一個乒乓波咁大既牛眼，好似去咗Halloween ，又好似怪獸大學咁。




 
由於Lunch 嗰陣，打咗陣波，加埋 Lab為左通風，唔准開冷氣，所以啱剪走肌肉就勁大汗，搞到眼罩有一層霧氣，而且 d 汗滴咗入眼，好唔舒服，於是咪除開眼罩放咗檯面，抹下汗同捽咗幾下，點知好衰唔衰畀周 Sir 見到，佢即刻係全班面前開我名，話再唔戴翻就扣 10 分，勁激氣。
 
於是我咪教到索住眼罩同頭嗰條膠繩最鬆，好似戴老花眼鏡咁。
我咪住對眼，咪成條線，趁機揸咗幾下，好似搓魚蛋或者湯圓咁，大家笑到肚孌。

我繼續切，個眼角膜勁靱，我用絞剪尖喺咁篤都篤唔穿，見到隔離組已經切到虹膜，勁心急。

於是我咪同企隔離嘅一個 Lab助理Miss講，我把鉸剪太鈍，剪唔開，佢過黎我張檯望咗陣，行開左，之後攞咗把好利嘅手術刀畀我，我第一次見佢，於是望一望佢左胸嘅名牌，叫 ：Natas Lu：「唔該Miss Lu。」

一用手術刀，方便好多，簡直削鐵如泥，即刻割開咗眼角膜，流左 d “墨汁” 出黎，之後立即搵虹膜、晶狀體。虹膜係 “墨汁” 下面一層，要用刀挑出黎。
 
呢個時候，周Sir 行咗埋離，指一指我地組：「你地組，扣 10 分。 」
 
我呆咗呆：「點解？」




 
周Sir立即鬧我：「點解？我頭先講咗唔戴翻眼罩扣 10 分，你聽得唔清楚阿？我剛才已經講得好大聲嗱禾！」
 
我扯一扯我嘅「老花眼鏡」：「你睇唔到我戴咗眼鏡咩？」

周 Sir ：「你咁叫戴咗眼鏡？你平時着褲會唔會幽到膝頭就話着好？」
 
我：「你副眼鏡究咁戴，又唔見你成日條褲幽到膝頭？」全班都笑了。

周Sir 開始更嬲，塊面紅到關公咁。
 
「得──你放咗學留低，我慢慢解釋你聽點解。」
 
我唯有收咗聲，繼續切眼，再無理佢。周Sir 就氣沖沖咁行開咗，去隔離組巡。
 




「哎！」心急得濟，一下唔小心捉唔實隻牛眼，把手術刀一下削咗落食指第二節，一時間都唔覺痛，見住白色嘅一道切口，慢慢滲出血。
 
Groupmate 霎時方寸大亂。有個同學跑出去話比周 Sir 聽。
 
佢行到埋離，見我血都流得好多，立即就一手拉咗我入 Lab 教員室入面，幫我消毒同止血，消毒酒精乸到我幾乎暈低。
 
之後，周Sir 好奇怪而又有點嬲咁問我：「你點解私自走去用手術刀？手術刀係畀高年級生物科同學解剖青娃用！」
 
之後佢不斷質疑點解我用手術刀，係咪自己走去工具櫃度攞，因為佢喺切牛眼之前講明工具係鉸剪，而且淨係派發咗鉸剪畀我地做工具，話我擅自使用實驗室工具，不服指示，以至受傷，要懲罰，Blah, Blah, Blah 。
 
我即刻抗議，因為明明因為我問准咗 Lab Assist Miss Lu ，而且係佢主動攞畀我，周 Sir 講到我偷咁，事必因為見我見紅，驚畀人投訴，所以卸個波畀我。
 
我極之唔忿氣：「頭先我明明問准咗 Lab Assistant ，係佢攞手術刀畀我。」
 
周 Sir 起初唔信我講嘅野，之後我原原本本咁講到一個 Miss 幫我攞刀，周Sir 嘅面色就開始改變。




 
佢好詳細咁問我個 Miss 點樣嘅，我咪一五一十咁話佢知。
 
我記得個 Miss 叫 Natas Lu，Natas 尼個名好少人用，但我最近去過澳門，我記得去食葡撻，個 Waiter 就係咁講 Natas, Natas，原來葡文 tarts 就叫 Natas。
我對佢個樣已經無咩印象，一來因為不過望咗一兩眼，二來無刻意記住。
所以我就同佢講，咪正正常常、有眼耳口鼻、長頭髮、着白袍嘅 Lab Miss 囉。
 
周Sir 見我講得咁含糊，一定以為我唔係吹水就係玩野。
 
佢問我：「咁你知唔知 Miss 叫咩名？」
「Natas Lu ， Miss Lu。」好彩我記得個名，唔係死無對證。
 
周Sir聽到我講，行出咗教員Lab問人搵呢個 Miss Lu 。
 
我切親手，攞正牌唔使上堂，出面同學繼續切牛眼。





隔咗兩三個字，周Sir 行反入。
 
「你將你點樣自己攞手術刀，老老實實講出黎，我會從輕發落，記個缺點，小懲大戒；但如果你再講大話，我唯有叫你家長黎學校，你自己同家長解釋點切親手指。」
 
我當堂勁激氣，佢擺明屈我，又唔信我，最憎畀人屈。
所以衝口而出：「你都傻，我話知你叫我阿爺黎傾！」
 
周Sir 哼左聲，激到鼻歌窿擴張，凸眼凸脷。
「好！你坐係度等我，千其唔好行開，否則，我立即記你小過。」
 
於是，佢又走反出 Lab 上埋嗰半堂。