《怪事》二(B)、〈中學時，我切過的牛眼〉9月8日更新: 二(B)、〈中學時，我切過的牛眼〉9月8日更新

我坐喺度悶到傻，
 
過咗三四個字，同學都執書包放學，我一個人坐喺度，喺道門既玻璃窗望住 d 同學走，簡直豈有此理。
 
同學走哂之後，周 Sir 行出行入，入左教員 Lab 幾次，望都無望下我，擺明要我等下先，玩我。
 
佢逐叠叠工作紙慢慢叠好，甚至仲攞咗其中一叠改，之後，慢慢整理好至過尼睇我。
佢一埋離就同我講：「我地Lab 全部助理assistant 都係男同事，無一個係Miss，更加無一個姓呂，叫 Natas Lu，頭先我搵assistant Mr Lee 數過 Lab 嘅手術刀，的而且確少咗一把，得49把，計埋你用嗰把，岩岩好50把，你點解釋尼 D 情況？」
 
我諗咗諗，實在唔知點解。但又覺得好冤枉，於是，唯有唔出聲。




 
周 Sir 於是乘機發功，以為我開始軟化：「每個人都會犯錯；每個人都試過講大話，但只要懸崖勒馬，知錯能改，知道自己錯嘅地方，咁一定可以得到人地嘅原諒，所以有錯，只要認，就一定能夠改過，聖經唔係話『忘記背後；努力面前』咩？」
 
我即刻反感，講到尾，佢都係覺得我講大話。
「我無講大話，你逼我認都無用，你記我小過咪記，我唔怕，反正我上你堂切親自己，係我自己黑仔死蠢，累你揹穫，你鍾意記小過咪記飽佢，我係唔會認自己去偷刀！」
 
周Sir 見我咁硬頸，都無可奈何，的咗我去訓導室。(據專家考據「的」正寫為：上四下勺)
 
一入訓導室，啱啱好靈修主任當值。周Sir 帶咗我入一間房坐低。佢出咗去，同靈修主任李 Sir 傾咗陣，李 Sir 隔住玻璃頻頻望咗我好多次，搞到我好唔自在，唔知佢地要點整我。
 




過咗無幾耐，李Sir 一個入咗房，又再重新問我一次頭先我係 Lab 嘅經歷。佢講野都好有禮貌，所以我都客客氣氣咁同佢講反一次。
 
李Sir 聽到我講 Natas Lu，佢聽到尼個名，好似好突然咁，唸唸有詞，重覆咗個名幾次……
 
李Sir 又再走咗出房，再同 周 Sir 講咗兩句，兩個人一齊望咗我一眼，皺咗皺眉。
 
隔咗陣，李Sir又行反入房。用又平靜，又認真既聲線同我講：「我相信你無講大話，但我必須話你知，你所經歷既，可能唔係一件普通既事, 裡面可能別有內情……」
 
我雖然聽到一頭霧水，但諗深一層，可能佢指既內情係有同學整蠱我，又或者個教學助理Miss係假扮既之類，總之聽到李Sir 信我, 我已經無咁激氣，而且有點多謝佢，佢不嬲係訓導老師入面算好人，唔太罰人嘅。我咪點咗點頭，表示對佢信任。
 




佢繼續講：「有點野，我地都未搞清楚，我係讀神學既，對比起神創造嘅事物，人類係非常渺小，但你唔需要奇怪，亦唔使問原因，只要相信就得，呢個世界知識可以分為known known, known unknown，unknown known, unknown unknown, 你宜家面對既就係一d事，一d自己知道唔識嘅事， 甚至乎係一d我哋唔知道自己唔識嘅事，但你唔需要驚，亦唔使問點解，只要我地一齊面對，以上主嘅大能，一切都可以迎刃而解，我地陣間會一齊誠心咁祈禱，你只要跟隨住我，咪埋雙眼，唔好諗其他野，你就可以得到平靜同安心……」
 
我更加唔知佢想講咩，但既然佢信我，我又似乎唔使罰，咁佢話點話點好。
 
佢跟住打開本聖經：「你宜家對手十隻手指交叉握緊，低頭，合埋眼，陣間我會開始祈禱，你咩都唔使諗，跟著我嘅禱告，心入面跟住唸一次，最後誠心咁禱告：阿門，咁就可以。]
 
我咪埋眼，聽到幾幾下揭書聲，李Sir 就開始祈禱。
 
「全能嘅主，
請聽我哋誠心誠意嘅禱告，有關辛同學嘅遭遇，我地雖然未必知道因由，但亦不受試探，對耶穌基督嘅權柄從無懷疑。『耶和華──我的磐石是應當稱頌的！他教導我的手爭戰，教導我的指頭打仗…離他們很遠，有一大群豬吃食…去吧！進入豬群，投在海裡淹死吧！』。我以主嘅命，將你趕離舨昵片土地，我祈求主給予辛同學一夥堅定平和嘅心，願辛同學從此得到平和，不受敵基督嘅滋擾。誠心誠意祈禱，奉耶穌基督名求，阿門。」
 
我仲未黎得切諗消楚李 Sir 嘅說話咩意，唸口黃跟住佢講咗聲「阿門」，大功告成。
 
雖然我聽得一知半解，但都估到佢對我喺 Lab 嘅事好重視，好似好大件事咁，而且我又隱[隱約約覺得佢有點野好似刻意喺我面前避忌唔講，但都唔理得咁多，我唯一緊張嘅係放咗學之後要去打波，對於李 Sir 講咩，講過咪算，念尼實在多餘。