變成女鬼既我，剩返30日要出POOL！: （二）心願

「爸、媽！」我衝去父母旁邊大喊。
 
阿媽燒緊陰司紙，阿爸就迎接緊來賓。
 
「我仲未死㗎……哎呀！」我執起地上既紙，正係阿媽燒既陰司紙。
 
采欣低頭飲泣，卓琳則紅著眼眶望前方。
 
「冇可能㗎……一定係發夢……」我比眼前既景象嚇親。
 




「你講，點樣先可以離開呢個夢呀！」我瞪大雙眼，扯住黑袍人件衫講。
 
「我係陰間使者，專處理凡間去唔到中轉站既靈魂。劉淽澄，你有咩心願係未完？」
 
「即係我真係噎死左？」
 
「一般情況下，靈魂已知自己死亡，會被我地帶去中轉站。你係一直接受唔到，似乎心願未了，導致我地陰間收唔到通知，所以我地先係餐廳揾到你。」
 
我嘗試打自己一拳，真係冇痛楚……
 




「最重要係你有咩心願未完？」
 
「點解你咁執著我有咩心願未完？有都唔關你事！」
 
「如果一個月內，執念無法消散，靈魂就會開始崩壞，到時你就唔再係普通鬼，而變成惡鬼會危害人間，所以你要諗到底有咩事令你執念咁重。」
 
「咁我冇心願，直接跟你走咪得囉！」
 
「一般鬼執念唔深，我當然可以即刻帶走，問題你執念勁到，我唔可以即刻帶走你。要心無雜念既靈魂先可以投胎，而帶住執念既你會污染靈魂，導致無辦法投胎。」
 




「我點知咩執念！咩心願喎！」
 
「執念未必一定係心願，但大多數鬼既執念，都會連住一件未完成既事，所以我先問你有咩心願未完成。」
 
「咩執念同心願呀！You ask me, I ask tree!」我不屑講。
 
「一鞠䩑，二鞠䩑，三鞠䩑，家屬謝禮。」
 
我回頭一望，係楊燦炫、成柏傲，仲有鍾健樂。
 
鍾健樂一嚟到靈堂，我對眼就冇離開過佢。
 
阿樂佢眼紅紅，似乎喊過嚟。
 
一方面唔想佢喊，另一方面因為佢為我而喊，就覺得自己係佢心中都有一席之位。




 
鍾健樂體育細胞非常好，係中一個陣已經就嶄頭露角。
 
我同佢都係同一個社，真正同佢接觸，係我地中三做左幹事開始。
 
同阿樂傾偈既時候，佢好明白女仔諗咩，對女仔又細心又温柔，同埋做運動既佢實在太耀眼，令我不知不覺間，好想接近佢。
 
阿樂對人人都係一樣態度，身邊女同學都估唔到佢有冇鍾意既人，只係情人節個Ig story 令我不禁諗到底佢係咪有女朋友。
 
不過佢同好朋友楊燦炫行得好埋，令人一度懷疑佢係咪Gay，曾經我更一度將楊燦炫列入我既情敵之一。
 
至於成柏傲，因為鍾意做運動，所以同阿樂好投契，好多時候級中運動比賽都會見佢地組隊出賽。
 
唔知點解成柏傲同楊燦炫睇落風馬牛不相及，但佢地3個人成日一齊玩，出晒名FD。
 




聽講阿樂想讀CU體育系，為左同佢同一間U，我就下定決心努力讀書。
 
「你既心願同呢個高大既男仔有關？」使者問。
 
「嗯⋯⋯等等先，你點知？」我驚訝地問。
 
「你望到佢望出晒神。」
 
「你有方法幫到我？話晒你使者喎，實有法力啦！」我輕輕掂佢既黑袍。
 
「劉淽澄，使者職責唔包幫人追男仔。你要自己了結個心願先可以成功離開。」使者行過幾步，完全唔想同我有任何接觸。
 
「咁你又係咁問我有咩心願？講完你又唔幫我！到時我變惡鬼，第一個揾你！」
 
「過左3月14日，你都未完心願，到時變成惡鬼，我會親自嚟消滅你，你既靈魂將會灰飛煙滅，冇得再投胎。」




 
「咁你點知我完成心願？」
 
 使者彈指，我手上突然出現一條紅繩。
 
「呢條係記錄時間同記憶既紅繩，每黑一度，代表一日過去，直到最後一格黑晒。當你達成心願，佢就會發光，我自然會知道。」
 
「條繩會唔會失靈唔發光㗎？」
 
「我地未試過呢個情況。劉淽澄，我要講既野就係咁多，仲有其他客，先行一步。」使者憑空消失，只剩下我一個在原地。
 
「搞錯呀！講晒自己想講既野就走！冇品！」我跺跺地抱怨。
 
阿樂、成柏傲同楊燦炫一同離開靈堂。
 




唉，阿樂睇落一臉悲傷，唔通我離世對佢打擊好大？
 
「節哀順變。」楊燦炫同我既父母講。
 
「同學你有心啦！」媽媽回應。
 
「爸、媽，我係到呀！」我係父母面前郁嚟郁去。
 
「點解就冇人睇到我喎！」我激動咁大嗌。
 
楊燦炫突然回頭，剛好同我對上眼。
 
我係鬼，照計應該冇人睇到我⋯⋯