變成女鬼既我，剩返30日要出POOL！: （三）對視

楊燦炫好快轉頭，佢同阿樂講左幾句之後，掠過我旁邊，然後從口袋中，拎出一包紙巾。
 
「唔該晒……」阿媽垂頭收下紙巾。
 
楊燦炫急步前行，拍住阿樂既肩膀。
 
剛才嗰一刻感覺係我錯覺，楊燦炫又點會見到我呢？
 
如果我要完成心願，就係要同阿樂表白，同埋一定有Kiss，我咁大個女都未試過Kiss，唔知係咩感覺呢？
 




只係阿樂有冇女朋友？如果有，我表白，咪會做人第三者？唔係喎，我都死左，仲點介入佢地關係？我淨係想講自己心意，然後離開人間，更何況咁耐以嚟，我地女仔都冇聽過阿樂拍拖。
 
最難係阿樂都睇我唔到，點先可以令佢知道我既存在？
 
冇品既陰間使者淨係講晒最重要既規則，又唔考慮我依家咩身份⋯⋯
 
我只好做「跟尾鬼」，跟住阿樂，點都會有一線「生機」掛？
 
就係咁樣，我由靈堂跟住阿樂返屋企。
 




「唔得啦！好急屎！」阿樂衝去廁所，恰好穿過我既身軀。
 
雖則我依家自出自入，但係我都係停留係廁所門口，比返啲私人空間比阿樂！
 
紅線逐漸黑多幾度，除左去廁所，我就睇住阿樂温書、打機、食飯，生活非常枯躁乏味。
 
至於女朋友一事，佢同好多女仔都有傾一兩句，反而同楊燦炫傾得最多偈，令我都唔肯定佢係咪真係有拍拖。
 
依家做鬼可以隨時隨地見到阿樂，感覺比以前了解多左佢，就好開心！
 




我默默將手放係阿樂肩膞上，卻換嚟佢陣陣乞嚏。
 
冇幾耐阿樂換衫，拎左啲書同notes就出門。
 
阿樂前往附近既Starbucks。
 
「阿炫！唔知點解最近成日個人覺得好凍，明明今日廿幾度，我要著到勁厚先夠暖！」鍾健樂搓住手講。
 
我係隔離不斷吹氣落鍾健樂手中，希望佢對手暖啲。
 
阿樂牽起阿炫既手，講：「哇～你對手暖好多，簡直係人肉暖包！」
 
果然楊燦炫係我競爭對手，枉我仲諗住想同佢混熟，不過佢都唔理人，就算啦！
 
楊燦炫立即縮開手並講：「阿樂，你買杯熱飲暖下身。啱啱出嚟，凍係正常。」




 
阿樂離開座位，我跟隨離開時，卻被一個人拉住手腕。
 
我轉身一望，正係低頭温習既楊燦炫。
 
「你搞夠阿樂未？」楊燦炫抬頭，與我對視。
 
原來靈堂外面既對視，並唔係巧合。
 
「你⋯⋯睇到我？」我呆愣原地問。
 
我係人間3日，一直都自出自入，第一次有人見到我，仲要係摸到我。
 
「你話呢？」楊燦炫反問。
 




「你知唔知因為你係咁癡住阿樂，佢先發冷？最好笑係你頭先係咁吹氣落佢隻手，越吹佢就越凍。」佢冷笑講。
 
「我真係唔知⋯⋯」我垂下頭講。
 
「依家知就得。」楊燦炫目睹我手腕上既紅線，略為皺眉。
 
「如果我唔完成我既心願，我就唔可以離開凡間，靈魂會灰飛煙滅，仲會變成惡鬼，遺害人間。呢條紅繩係提示時間，限期係3月14日。」我逼不及待，一口氣講晒紅線既事。
 
望住少許發黑既紅繩，我不禁浮躁不安。
 
「咁你想點？」楊燦炫木無表情問。
 
「只要你令鍾健樂見到我，我同佢表白，完左出Pool既心願，你自然功成身退，我呢一世都會好多謝你！」
 
「原來你⋯⋯」楊燦炫欲言又止。




 
「嗯？」
 
「On9，呢一世你都完左，想點多謝我？」
 
「即係你肯應承幫我？」
 
「我只係唔想多一隻惡鬼。」楊燦炫露出不耐煩既模樣。
 
「麻煩？」
 
佢講到好似平時對唔少鬼魂，特別係惡鬼。
 
「阿樂返嚟，你坐我隔離，仲有你唔好再跟住阿樂。」楊燦炫細聲講。
 




我默默坐係楊燦炫隔離，睇住佢地温書。
 
「果然出嚟見朋友，温書效率都快好多！飲完野個人都暖晒！」阿樂展現燦爛既笑容講，接住講：「阿炫，下次再約！」
 
楊燦炫點點頭，並揮手。
 
我默默跟隨佢回家，過程中我地都不發一言。
 
臨到門口，楊燦炫係書包拎左塊黑蚊蚊既野。
 
「你係我屋企，就要戴住佢，唔可以除落嚟。」楊燦炫叮囑。
 
「咩嚟㗎！咁樣衰！我唔戴！」我仔細一睇，個舊野黑中透點青，頭頂係雞冠⋯⋯係黑雞！
 
「黑雞呀！」我向後退一步，楊燦炫卻緊捉我既手。
 
「乜黑雞？係墨翠。你想死可以唔戴。」楊燦炫直接將墨翠掛落我條頸到。
 
「我開門。」話畢，我感受到陣陣寒風，屋內既擺設更讓我大吃一驚。