變成女鬼既我，剩返30日要出POOL！: （二十六）答案（上）【楊燦炫視角】
楊家隔幾年就要搬一次屋，主要時間會影響地方既陽氣同陰氣，今次係搬去九龍灣，個到陽氣較重，有助驅魔師儲陽氣打惡鬼。
我著上新校服，望住鏡入面既自己，嗰一隻特別既綠眼，便戴起黑色眼罩出門。
由細到大，好多人都會問我，右眼係有咩病，定係失明？有人亦都唔會問，而係選擇背後議論。
我踏入陌生既中學，學生以奇怪既目光打量著我，進入3B班房後，由於其他人已佔後排位置，因此我只能坐在班房門口最前排既座位。
不久，兩個男生氣喘吁吁到班房門口。
「Oh no! Bro～There’s no space～」背住Adidas斜背包男生講。
「阿傲，你坐我後面個位，我坐前面就得。」文青男生講。
「That’s great! New classmate! How are you?」
我要應“I’m fine. Thank you and you? ”嗎？
隔左數秒，男生放下斜背包在座位旁邊講：「My name is Justin Shing. You can call me Justin.」
佢係外國返嚟，定係交換生？但佢望落係亞洲人樣，喺主流學校讀書，應該聽得明中文？
「阿傲，你咪玩新同學啦，嚇親人啦！我叫鍾健樂，佢叫成柏傲。你叫咩名呀？」鍾健樂微笑問道。
「我叫楊燦炫。」
「Bro～You looks so cool! 你個眼罩係邊到買？」成柏傲凝視著我。
「我講完，你係咪戴？」我木無表情地說。
「Of course！」成柏傲興奮地回答。
「深水埗鴨寮街51號。」我急速說完。
聽到就聽到，聽唔到就算，反正冇預過佢會聽到。
「Bro～Sorry! 你可唔可以講得Slowly啲？」
「阿傲！」鍾健樂撞左成柏傲手臂一下。
「Please！！！！」成柏傲雙手合十，一臉誠懇求我。
「同學早晨～我係你地今年3B既班主任Miss Wong⋯⋯」
成柏傲只好閉上嘴巴，我終於耳根清靜，希望Miss Wong快啲調位。
「暫時呢一個月你地就咁樣坐住先，之後我先再同你地調位！」Miss Wong離開，便是小息。
「阿樂！小賣部！」話畢，成柏傲仲係班上叫埋數個男同學，一同去小賣部。
仲以為呢個人會繼續問眼罩，好彩已經冇左呢回事。
班房門口有個笑容甜美既女生，正在東張西望，我立即低頭睇書。
「你就係3B班個插班生？」佢問。
我繼續睇書，目的無視佢既問題。
如果呢度唔係學校，我一早帶上藍牙耳機，與世界隔絕。
「喂！」佢用手擋住我本書既內容。
我抬頭一看，女生睥住我。
感覺唔知喺邊到見過佢？也許係人有相似？
「我知你聽到㗎喎！」話畢，佢行入班房，揾左其他女生，傾左幾句就企返喺我隔離。
「原來你係阿樂隔離位！我叫劉淽澄，你幫我同阿樂講聲，社長話今日放學Meeting改去Mini Hall。」
「我同鍾健樂唔熟，你下個小息再嚟揾佢。」我冷冷地說。
「乜你咁麻煩㗎！拿！當係報酬！點解你戴住眼罩？」劉淽澄將提子糖放喺我枱面。
果然人人都會問既問題，呢個女仔又點會例外？
「我會幫你轉達說話。」
「失明定眼疾？你另一邊眼冇問題？」
我繼續睇書，無視佢既說話。
「Miss Wong～咁多通告既！」劉淽澄搶去Miss Wong一半既通告，幫佢拎去枱面。
「Aria如果你喺我呢班就好！我就冇咁辛苦！」
劉淽澄指向我個邊講左幾句，然後就離開班房。
Miss Wong 行左過嚟，講：「唔好意思，我啱啱Aria 講先知你係插班生，如果你有咩需要，可以同我講，我可以同學校安排。」
「冇需要。」我繼續睇書。
我望住枱上既糖，心諗：呢個女仔真係多管閒事！
小息後鍾健樂返嚟班房，我複述返劉淽澄既說話，然後拎住粒提子糖，放落佢張枱並講：「粒糖比埋你。」
「多謝！」鍾健樂立即開嚟食。
所謂既報酬就係我最憎既糖，出奇地鍾健樂收到糖好開心，睇嚟佢好鍾意食糖。
數月過去，晚上我喺附近荒地遇上惡鬼，通常惡鬼出沒既地方，大機會存在生命力東西，當我消滅惡鬼後，草叢中發現有堆啡色野貓蜷縮成一團。
我跑到屋企，問父母：「我見到近啟德個邊有個荒地，個邊有成五隻貓。」
「我知你諗咩，我地最近搬完屋，開支太大，五隻實在應付唔到。」阿媽無奈地講。
阿爸喺雪櫃拎左盒牛奶，就返左入房。
我拎左盒牛奶去餵貓，希望佢地唔會餓死。
翌日，我放學便前往荒地準備餵貓，卻聽到有聲音，便躲在牆後。
「波波你唔好搶奀B啲野，講好左一貓一份，你遲啲唔係叫波波，係肥波！睡公主唔好掛住瞓，起身食野啦！拿！奶茶同咖啡就啱啦！永遠都唔會爭野食！」
係隔離班個位多管閒事既女仔？估唔到佢連空地既貓都管埋。
我小心翼翼探出頭，只見佢温柔撫摸著貓咪毛髮，幫佢地梳緊毛。
睇嚟放學唔洗咁急餵野食，我決定夜晚先出動。