變成女鬼既我，剩返30日要出POOL！: （二十五）夢（5）
「阿炫，你試下感應魔靈喺邊？我諗小炫依家一定喺佢隔離。」
阿炫閉上眼睛並講：「左邊。」
「咁行啦！」我拖住阿炫既手行，直到見到魔靈、小炫同小葵。
「小炫，頭先既事係我既錯！魔靈，對唔住！」
「女朋友，佢叫純真姐姐。」小炫疑惑地講。
「女朋友？」阿炫問我。
「我一陣再同你解釋！」我同阿炫講完，望向魔靈講：「我覺得佢好似我之前識既鬼，佢係十惡不赦既惡鬼，專捉小朋友同貓。」
小炫驚恐望向魔靈，不自覺摸住小葵，向旁邊揶向一步。
「小炫，想唔想知點解姐姐會同大個既你拍拖？」
「想！」小炫興奮跑過嚟我既旁邊，並牽起我另一邊既手。
「估唔到你氹細路都有一手。」阿炫微笑，我同樣微笑。
「我地10分鐘內要跑到對面山坡，你準備好未？」
「可以！女朋友，講得故事未啫！」小炫途中不斷嚷著。
為左令小炫安靜，我便講：「大個既你幫左我好多事，姐姐咪對你心動囉，所以同你表白。」話畢，我垂下頭，並頭髮撥到耳後。
「即係你主動追我？睇嚟你好鍾意我！」小炫興奮說。
「咁係因為⋯⋯」我腦部努力運作。
「因為你同我，都係愛貓之人。」阿炫突然插口。
「嗯？」我望向阿炫。
「因為咩呀？」小炫再次搖晃我既手。
「我同你都鍾意貓。」我立即回道。
「你地都成日傾貓，傾傾下我都鍾意左你？」
突然一堆惡鬼出現係我地面前。
「你地唔好咁天真，呢個夢境係我創造，我又點會咁輕易比你地離開我既夢境？」魔靈既聲音正在夢境迴響。
下一秒，惡鬼上前帶走小炫，並在我們視線範圍下攻擊佢。
「救命呀！呀呀呀呀呀！！！！！！」小炫被惡鬼用樹枝劃破身軀。
「點解會咁？」阿炫跪坐地上。
「意外就係呢到發生？」我問，阿炫點點頭。
我回想起佢之前同我講過既意外既事。
樹枝無情劃破小炫右眼後，眼窩血流成河。
小炫心想：唔通自己就會被惡鬼殺死，就死喺呢座山上？
魔露上前，插進小炫眼窩，令小炫痛楚加劇。
突然一道白光出現，「呀！！！！！！！！！」魔靈發出淒厲既喊聲。
「阿炫！剩低交比阿爸同阿媽搞，你執起墨翠，唔好放開佢！」
爸爸舉起手上既木劍，媽媽默默唸著小炫未完成既咒語，二人合力作法。
小炫用僅餘既力氣，執起並緊握墨翠，便昏迷過去。
當小炫復醒後，感覺右眼包下厚厚既紗布。
雖然小炫感覺右眼已失明，但佢摘下紗布後，才發現原來右眼既世界，同普通人並不一致。
右眼既世界，係以綠色為主色，而普通鬼魂係透明偏白，執念越重，鬼魂就越白，猶如真人，反之亦然，透明既鬼魂代表好快就離開人間；而惡鬼飄發著黑霧，黑霧越廣代表強度越高。
以往小炫只係睇到所有鬼，但睇唔到佢地既執念同實力重強度，最重要係依家既佢，仲可以感應到鬼既數量同位置。
小炫唔習慣雙眼視野不一，唔習慣別人異樣看待自己眼睛既目光，更唔習慣自己同魔靈有連結，因此佢選擇戴上眼罩過活。
除左眼罩，阿炫身上仲多左個護身符，正係墨翠，放在阿炫背包裏，以備魔靈再度侵襲。
「阿炫，我喺到，結局會唔同㗎！」話畢，我衝上前抱住小炫，用身上墨翠力量驅散惡鬼。
惡鬼唔似預期被墨翠驅散，反之惡鬼上前攻擊我。
「哈哈哈哈⋯⋯我就係鍾意你夠天真！你唔係以為同一招就會有用？」魔靈笑道。
我感覺全身皮膚快要撕破。
「女朋友⋯⋯你冇事呀嘛？」小炫鳴咽地說。
「魔靈，你復仇對象係我，你唔好搞阿澄！」阿炫高呼。
「留係呢個夢越耐，一個鐘內靈魂就會越嚟越弱，最後就會被我吸食，不過依家睇嚟一個鐘都唔洗～」
「最近你有冇揾過未婚夫？」阿炫開口。
突然惡鬼停止攻擊，我同小炫躺在樹葉中。
「呢個人邊個嚟㗎？我頭先一直都見唔到佢既！」小炫問。
「你唔係睇唔到阿炫咩？」
「頭先惡鬼冇再搞我地之後，我就突然睇到大個既我。」小炫回答。
「你睇下，大個既你幾型～」我向小炫講。
「大個既我真係好鍾意你！你睇下，佢個樣幾心急！」小炫望向阿炫。
「佢⋯⋯三代同堂。」魔靈久違開口。
「你同我好清楚知道，鬼係冇可能同人一齊。」我講。
「就算你收集左100個靈魂上到身，又可以去到幾時？」阿炫講。
魔靈呆愣數秒後便哈哈大笑，抹去眼角既淚水，說：「唔咁做，我絕對無辦法完成心願離開人間。𡃁仔，憑你既能力無可能消滅我～」
眼前世界逐漸不穩，我拖住受傷既身軀，潛步在魔靈身後。
我將惡鬼磨銳既樹枝，趁魔靈不留神既時候，用力插到魔靈既頭部。
「𡃁妹，下次再見～到時你一定冇咁好彩！！哈哈哈！！！」
魔靈灰飛煙滅，我亦躺在地上，再無力站起。
「阿澄，你點？」阿炫跑到我旁邊。
「就算仲有時間，我都驚走唔到⋯⋯睇嚟我以鬼身份又死多次⋯⋯哈哈⋯⋯」
「女朋友！大個既我！個邊有道白色窿窿！」小炫大喊。
阿炫趕快將我放在背部，邊跑邊講：「阿澄你撐住，一定出到去，你都仲未完成心願！」
「你唔好再怪自己害死小葵⋯⋯頭先我見到佢上左雙重彩虹橋⋯⋯」
「你休息下，唔好再講野住！」
「未來女朋友⋯⋯你要撐住呀！」小炫鳴咽地喊著。
「雙重彩虹橋⋯⋯雙重幸福⋯⋯其實我同小炫講既野⋯⋯係真⋯⋯我好似鍾意左你⋯⋯」如果依家既我唔講，恐怕之後未必可以講到。
「阿澄，你都未聽到我既回答，唔好瞓呀！」我背緊阿澄，用盡全身力氣衝向眼前既白光。