《我個老友從未來穿越返嚟，話我會愛上一個Kam女》: 001

Sorry，雖然我知呢樣野好荒誕，但當真實咁發生係我身上嘅時候，係會O撚曬咀。 我唔知有幾多人相信我講嘅嘢，你哋唔信都唔緊要，當故仔咁聽啦。 是咁的，件事係琴日發生的，我到依家都唔知信唔信好，但我又講唔出有咩毛病⋯⋯可能真係太過荒誕。 琴日一返到學校，班上面唔係好多人嘅姐，我算係比較早返嗰個，琴日唔洗早會企操場乜乜剩剩，所以我都係直接上課室。 一入到去，唐師兄就喊曬口咁走埋嚟⋯⋯唔知做乜鳩架，我呆咗架。 心諗：咩事啊？喊乜鬼啊？ 「你⋯⋯你咩料啊？」我諗住推開佢衝埋嚟嘅擁抱，男人老狗唔好咁老尷啦。 「嗚⋯嗚嗚⋯⋯太好啦⋯⋯你仲係度⋯嗚⋯⋯」唐師兄抽泣住咁同我講。 我見佢好似真係喊得好犀利，好彩班上又無其他人，如果唔係實有人以為我地係咪搞gay！！ 「你做乜春啊???」我用力咁推開佢嘅纏綿，大熱天時痴埋嚟，熱到傻啊。 「我仲以為你……嗚…」我望真啲，好似唔對路，佢好似堅認真喎。 「咩啊？咩以為我咩啊？」我皺住眉頭問。 「嗚嗚……無事啦！都係無事啦。」然後唐師兄就係門口推開我，走撚咗去廁所。 唔知係咪我聽錯？我聽到唐師兄最後去廁所前，低頭喃喃自語咗一句：「你無事就好。」 我無事就好？我可以有咩事？ 我帶住滿頭問號入返課室。 其實我只係一個好普通嘅中學雞，但接住落嚟嘅事，超乎我嘅想像，為我枯燥嘅中學生活增添一頁色彩。 唐師兄係我小學同學嚟，我哋本身小學都好老友㗎啦，會一齊打機，一齊放學去食雪糕同上對方屋企。 細細個我同唐師兄一齊入同一間小學，入同一班，我哋兩個嗰日返學都喊到仆街，要唔願返學到家長都入埋嚟學校，我哋兩家人就係校務處度，又鬧又氹我哋兩個。 就係咁，係搞到我呀媽都識埋唐師兄呀媽，到依家佢兩個都仲會拎呢件事出嚟講笑。 相識之後，傾下傾下，原來我哋又係住同一幢嘅樓上樓下，但我哋係要轉電梯，一唔係就行樓梯。住公屋或者居屋都會明，1樓去到10幾樓係兩部電梯，然後10幾至20幾又係另外兩部電梯，我就住30幾樓，唐師兄就住10幾樓，所以我哋成日去對方屋企都要轉電梯。 我哋有時屋企人忙，湊唔到，就會去對方屋企度，所以我哋人生大部分時間都係一齊。 而唐師兄個人就生人唔生膽，成日怕呢樣怕嗰樣，郁啲都會嚇親，但我又好撚鍾意睇佢被嚇嗰個樣，真係唐唐地咁㗎，哈哈哈哈。 所以今日佢無啦啦咁嘅反應，我係小嚇親，但又唔奇怪囉！我點知佢又俾啲咩嚇親啊？或者又唔知自己係度驚啲咩啊？ 唐師兄去完廁所返入嚟，個人又無咩事啦喎，又正正常常咁，所以又係我諗多。 然後去到放學嗰陣，唐師兄行過嚟，一臉嚴肅咁望住我，我真係忍唔住想笑你明唔明！ 佢係一個咁搞笑嘅人，然後突然好嚴肅咁行過嚟，講咗句好嚴肅嘅嘢：「一齊走啊，我有啲嘢想同你講。」 我成日都唔明，搵到機會講咪講囉，係要專登咁樣約人講都好。 「咁去老地方食啲嘢？」我提議道。 我哋嘅老地方，就係麥記。 細細個成日叫屋企人帶去食老麥，生日Party又人有我有咁想係老麥度搞，依家去到中學，有時放學都會去食個雪糕仔，虛度下時光。 「點啊，有咩事要同我講啊？」我食住個麥璇風，心情愉快地問佢。 「嗱！你聽……聽完之後唔好驚訝，我……我自己……到依家都未係好接受到，同埋未適應到發生緊咩事。」唐師兄自己都講到口窒窒咁。 「咩事啊，你發生咗咩大件事啊？我會唔知？」我潷一啖雪糕擺落口。 「我係由未來穿越返嚟。」唐師兄用佢滑稽嘅樣，嚴肅嘅神情望住我。 我啱啱個雪糕擺落口，差啲嘔返出嚟。