《我個老友從未來穿越返嚟，話我會愛上一個Kam女》: 016

相傳喺古時，紅豆被稱為「赤豆」，而紅豆多被為補血氣，紅色亦最似血色，好多女仔每月例事，都會補充紅豆水或者紅豆湯嚟補返失去嘅血氣。

而血係陽間最為濃烈，同時係生命之源嚟。所以彌留係靈魂狹縫嘅鬼，最怕現世嘅血，而紅豆最能夠代表血，同時唔難見。

唔好問我點解知，因為全部都係叮噹之後同我講返嘅。

而我老豆依家極為痛苦，但叮噹無諗住停落嚟，不斷地猛攻，係咁將啲紅豆灑落我老豆身上。

未幾，我老豆就抵受唔住，暈厥過去。





呀媽嚇到六神無主，唔知點算咁⋯⋯佢本身都唔知點算㗎啦，見我哋一入到嚟，就一頓操作，依家見我老豆暈咗過去，無動靜，先冷靜落嚟。

但事情仲未完結，一道濕氣由地下傳到去牆邊，然後由牆邊竄到上天花板，天花板再滴返水落嚟，牆身嘅灰起咗一泡，除時會甩落嚟。

「依家點好啊？咁就得啦？」唐師兄問。

即使佢穿越返咗嚟，看似同叮噹好熟，但好似都唔係好熟靈異嘢咁。

「未，依家係逼返一路跟住謙仔嘅靈體出嚟，頭先佢係上咗身呢個男人身上。」叮噹冷冷地答。





叮噹一處理呢啲靈異現象嘅時候，好似換咗個人咁，十分熟手且冷酷、果斷。

同佢平時擔心呢樣、擔心嗰樣，介意人點諗嘅佢，有好大分別。

「終於見到你真身。」叮噹講道。

「下？見到咩啊？」我咩都見唔到。

「我咪話我之前一直都睇唔到佢真身嘅，只係見到一舊黑影嘅？因為係未見到關聯嘅物件或者係人嘅時候，係睇唔清咩狀態㗎。」





「依家見到關聯人物，亦係佢最放唔低嘅人，先至清楚睇到佢真身。」

叮噹係佢書包入面，拎咗把木製嘅短劍，唔係好大把，嬌小玲瓏咁。然後佢將書包拉鏈上嘅叮噹，扣落把劍度，揮舞起上嚟。

「叮噹——叮噹——」一把清脆嘅叮噹聲，伴隨著舞動而響起嚟。

『點解——要咁樣對我——？』腦入面傳入嚟一把聲。

『我做錯啲咩？』我左顧右盼，都搵唔到聲音嘅來源，我望一望呀媽，再望唐師兄，佢哋同我嘅反應一樣，睇嚟佢哋都聽到。

『你識我老豆？』我甚至唔洗開口講，只係諗呢一句，就已經聽到自己內在把聲咁。

『一直陪係佢身邊嘅人係我，點解我一走咗，就第一時間返嚟搵你哋？』

我開始搞清楚，呢隻女鬼就係我老豆帶返嚟，而且佢仲要不在人世。





所以我老豆會返嚟，都係因為呢個女人唔係度啦，佢先至返嚟。

佢係到依家先諗返我哋，到最後佢只不過係諗自己，無人陪先諗返起我哋。

『你係呀彪邊個？』呀媽一臉認真咁思念著，佢唔洗講嘢，把聲自動就咁係腦度播出嚟咁。