《我個老友從未來穿越返嚟，話我會愛上一個Kam女》: 015

「其實我都係睇紙紮舖阿爺留低嘅古籍，加上我自己喺靈魂狹縫嘅書籍，兩者綜合理解返嚟，至於係真定假，我都仲摸索緊，呢個世界實在太多我唔知嘅事了⋯⋯」叮噹忽然又勁謙虛咁講。

我直頭係靈魂衝擊，原來係複雜到咁㗎？同時唐師兄終於出嚟。

「Sor啊，頭先肚痛⋯⋯去埋個廁所先出嚟，哈哈！」佢尷尬地笑笑。

我望住佢手中嘅護身符，背後嘅寒氣瞬間消散。

「佢走咗。」叮噹講。





「咁有效？睇嚟佢真係好怕喎。」我講道。

「因為呢啲符係用現世嘅人體組織整成，加上做埋複雜嘅工序開光，每一步都係用靈體最唔舒服嘅點去完成。」

「人體組織？」

「頭髮或者指甲。」

「咁依家佢走咗，仲洗唔洗去我度？」我都想知接落嚟嘅打算。





「要，解鈴還需繫鈴人，依家要下你新嚟嘅屋企人係咪度先。」

「我又真係唔知條友係咪度喎，如果佢唔係度咁點算？」

「你話佢琴日開始跟住你啊嘛，仲係你屋企停咗成晚，可能佢去咗你都唔出，到時再睇下點搞啦。」

「同埋⋯⋯」叮噹嚴肅咁講，「首先你要知道，我唔係驅鬼師，我唔係電影入面嗰啲識法術，然後可以將佢哋整到魂飛魄散。我只不過係一個引路人，盡可能幫佢哋係靈界引去上一層，如果遇到真係無藥可救嘅人，只好將佢哋踢返落下一層。」

「我成日都覺得叮噹其實係靈異界社工嚟，專門開導啲鬼。」唐師兄半開玩笑咁講。





「成日？」叮噹不解地問。

「無，我口頭蟬嚟，咩都加成日。」唐師兄差啲穿煲，條友真係守唔到祕密⋯⋯大嘴巴嚟。

唔知叮噹睇唔睇得出呢啲穿越嘅怪異嘢呢？同埋如果佢知唐師兄真係穿越返嚟，仲要係我會鍾意佢，佢會有咩反應呢？

跟住叮噹同唐師兄就上咗我屋企。

一打開門，果然如叮噹所講，佢係度。

佢姐係嗰個世界嘅靈體，同埋我老豆，都係同一個空間。

屋企嘅寒流比琴日仲勁咗，入面陰陰暗暗咁，而我媽同嗰個男人都係同一個空間，而我媽係驚到成個人震曬，爬咗上沙發嗰度。

「嘩⋯⋯搞咩？」唐師兄都俾呢一幕嚇親。





「媽，依家係做咩事啊？」我一步步行近佢度，諗住盡量避開呢個怪異嘅男人。

眼前呢個所謂係我「老豆」嘅男人，面色蒼白，額頭同手臂都佈滿青筋，眼珠瘋狂地跳動，成個人勁不自然，神情都好詭異，唔係人類可以做出嘅反應嚟。

「我都唔知啊，頭先仲同佢講得好地地⋯⋯就突然⋯突然變成咁，頭先佢仲發出一把女人聲添！」

我望一望叮噹，想睇下佢知唔知可以點處理。

只見叮噹深呼吸咗一下，然後係佢粉紅色Outdoor書色入面拎咗一個Keroro嘅布袋出嚟，熟練地打開，取出一拃嘢。

跟住叮噹就咁擲落我老豆度。

「嗚啊！！嗚！！！」我老豆被擲中後慘叫一聲。





我望真啲，叮噹頭先擲出去嘅，係紅豆嚟。