《我個老友從未來穿越返嚟，話我會愛上一個Kam女》: 018

聽完叮噹咁講，望住佢錯愕嘅神情，頭先叮噹仲好氣定神閒，依家眉頭深鎖，左顧右盼緊。

連叮噹都驚囉，我有咩理由唔驚？我都想保護佢，但我無咁嘅能力。

『點解？點解？點解？點解？』個靈體不停重複呢兩字，頻率密到好似轟炸咁。

『點解我保唔住佢哋？點解我依家連男人都保唔住？點解要走返嚟？點解啊！！！』

『嗞嗞——唦——嗞——』





一種吵雜嘅音訊直接放入我個腦入面，炸裂到感覺到頭痛添！！

在場所有人，包括老媽、唐師兄同叮噹都露出痛苦嘅表情，雙手摀住個頭。

「屌！好撚頭痛。」唐師兄忍唔住爆出嚟。

『點——點解？點——點解？』聲音開始由明確嘅女人聲，逐漸變做粗獷嘅聲線，越嚟越低沉。

佢係情緒不穩？依家開始要爆了？將咁多年心入面嘅委屈發洩曬出嚟？





然後又再係腦入面傳嚟一陣劇痛。

「做咩事啊？」我抵受唔住呢個痛楚。

「我都唔知，我都係第一次遇到咁，通常化解到佢哋心入面問題嘅根源，就可以幫佢哋決定到究竟係上一層定留係度，定係要再打返落下一層。」叮噹艱苦地擠出呢段說話。

語畢，呢種痛楚就消失咗。

「仔，你無事啊嘛？」呀媽第一時間問我。





「無事，你呢？」

「我都無事，只係我搞唔清楚咩事。」

的確⋯⋯突然間又消失咗，我都一頭霧水。

跟住我聽到一陣喊聲，好短暫。

我依家開始覺得接住落嚟喺呢個空間入面，會發生咩事都唔會奇怪了。

「嘩！！」叮噹嚇到將手上面嘅木劍跌咗落地下，然後用力咁捉住我。

「咩事？」我焦急地問。

我估佢呢把尚方寶劍係諗住用嚟劈鳩個女人嘅，但係佢一下都未揮到出去，就嚇到跌咗落地了。





「我依家知道個靈嬰係邊度了。」叮噹冷靜好個呼吸，再緩緩地講出呢一句。

我頓時心漏咗一拍，呢下真係怯，好似突然間會有嘢喺唔知邊度衝出嚟咁，然後你開始對周邊極度不安。

「係邊？你唔好嚇我喎！」唐師兄都好驚咁行近我哋。

點解唐師兄會驚嘅？照道理計，佢應該係曾經經歷過呢一幕㗎喎？佢嘅反應好似係第一次經歷咁⋯⋯定還是係佢嘅時空，呢件事係無發生到？

不過我依家無時間猜測唐師兄啦，之後先再問啦。

「個靈嬰⋯⋯依家就係嗰個女人後面⋯⋯」叮噹向空氣指住。

「呀爸個二奶？」我毫不客氣地問。





「係，個靈嬰依家係嗰個女人後腦⋯⋯趴咗係度，然後蠶食緊佢個腦。」