《我個老友從未來穿越返嚟，話我會愛上一個Kam女》: 019

我聽到叮噹咁講之後，我成個人向後微微向後傾咗一下！嚇得唔細。

痴媽根，如果係真，個場景係何其恐怖，我連幻想一下都覺得嘔心。

叮噹都似乎想嘔，一臉驚慌同埋反感。

「點解嘅？」唐師兄聞言都毛管戙。

「我都唔知，但依家總算知道第二個靈體係邊，原來一直係後面。」





「你⋯⋯你要唔要執返把劍先？」唐師兄出嚟搞笑。

「你把嘢係用嚟做咩㗎？」我順勢問道。

「妖！我用嚟嚇退佢㗎咋，唔係諗住擊殺佢哋㗎！」叮噹唔耐煩咁講，專心咁望住前面。

佢呢一下唔耐煩個樣、個語氣，加上佢個高度，十足十小薯茄嘅童童⋯⋯當然，我唔可以講出口啦。

「我都係第一次遇到呢個情況，理論上，靈嬰好少會有行動，因為佢對呢個世界一無所知，連最基本嘅善惡都未分辨到。」





「但我依家睇到佢隱約有啲不安，佢好依賴媽咪，所以一直抱係嗰個女人背後。」叮噹一邊講一邊彎低身執返把劍。

經叮噹一講，我又開始理解到。

靈嬰反噬呀媽後腦，望落似殘忍，背後其實係極度嘅不安同渴望。

佢從未被降生、冇姓名、冇身份，淨係知道呀媽係佢唯一嘅依託。

『係呀媽唔好⋯⋯搞到你咁痛苦⋯⋯』斷斷續續嘅聲音又喺腦份面響起。





「你無做錯到啊⋯⋯」叮噹開聲講道。

『你唔好驚，我係度陪你。』女鬼無回應到叮噹嘅說話，徑自不停係度講，不停係度自責。

我唔知蠶食到咩程度，但感覺越嚟越唔理智，好似就嚟爆炸咁。

「呢啲都係意外，無人想㗎。」叮噹呢個靈異社工又再次上線。

『媽咪唔會由你自己，你想要就攞去啦，媽咪會俾曬所有嘢俾你。』

我未到嗰個年紀，我未能夠體會到做人父母嘅感受係點，但至少我睇到呢個女鬼對成為媽咪，係一早有好曬覺悟。

雖然我對大陸人唔係話咁有好感啦，唔會鍾意自己老豆返大陸包二奶囉，但係對於佢嘅遭遇，只不過係愛一個男人，同埋想成為一名母親。

就有啲心痛佢，呢個唔關身份事，而係獨立一個人嚟睇。





「你冷靜少少先，依家慢慢bb蠶食緊你嘅意識，如果一味再咁樣俾佢繼續落去，你就會魂飛魄散㗎啦，你咁辛苦爬上嚟第19層，就化為烏有。」叮噹緊張起上嚟。

「你幫bb改咗名未啊？bb叫咩啊？」叮喵問。

叮噹咁樣一問，個女鬼就有所回應。

『我⋯⋯未啊，諗住問埋親生老豆，bb應該叫咩名好，佢已經叫我落咗佢，所以我都未有時間幫佢諗叫咩名。』雖然睇唔到女鬼，望唔到佢表情，但淨係聽都知佢傷心⋯⋯

「咁依家幫佢諗一個名好無啊？」叮噹軟化地繼續講，「可以俾佢有一個身份，有名有姓咁係呢個世界存在過，都未至於咁不安。」

「可能佢嘅靈魂係下一層上嚟嘅時候，滿心期待可以降生係呢個世界，但係最後不但降生唔到之餘，仲要連一個名都無，感覺⋯⋯」

「好似係呢個排斥佢咁，亦更加唔知何去何從，唔知會唔會又落返下一層度，所以先咁極度不安。」叮噹推測著。





空氣靜咗落嚟。

『咁叫佢李梓柔，好無啊？』忽然地，女鬼嘅聲線都平和咗好多，都溫柔咗落嚟。