《我個老友從未來穿越返嚟，話我會愛上一個Kam女》: 020

「當然可以啦，個名都好好聽。」叮噹都溫柔咁講。

但當聽到女鬼幫靈嬰起名嘅時候，我猛地醒起，呢個靈嬰其實係我細妹？

照佢哋咁講，似乎係女仔嚟。

？？？？？？？

「咁佢係咪姐係我同父異母嘅細佬妹？」我忍唔住開口問道。





我依家先留意到呢樣嘢⋯⋯佢同我係同父異母嘅細妹關係⋯⋯

我誓估唔到呢件事，係可以同我有關係，雖然唔係親近嘅血緣關係，同埋唔算太有感情，但唔知點解，當察覺到嗰一下，個心好似暴擊咗一下咁。

叮噹同唐師兄震驚地轉個頭地望住我，想睇下我有咩反應。

『係喎，姐係柔柔都有個哥哥？』女鬼好似一個媽媽般興奮，呢種狀態我間唔中都會見到我呀媽都會有，就係佢係出面啲街坊、親戚、老師聽到有關任何我嘅消息，都會係咁嘅狀態。

係有啲興奮同埋自豪，然後每次我都尷尬到想即刻走人。





可能因為我從來無細佬妹，細細個都有幻想過如果有個細佬妹陪住自己，會係點。

屋企嘅寒氣忽然又再返返嚟。

跟住我感受到我腳下有陣寒意，涼浸浸，帶點濕濕地嘅感覺。

「佢無再蠶食呀媽，個靈嬰依家爬到你腳邊，就咁係度攬住你腳邊。」叮噹平靜地講。

「我諗，佢真係想搵到存在係呢個世界嘅證明，同埋有人認可佢呢個身份。」





「其實佢都係一隻痴人精嚟。」叮噹蹲低，就咁蹲係我腳邊，我估係望住佢啦。

奇怪嘅係，本來有寒意嘅腳邊，感覺到一股暖意。

『柔柔，你下次要搵個好人家啦。』女鬼不捨咁講。

『我想改柔柔呢個名，係想呢個世界可以多一分溫柔，我人生路上都遇唔少啲奇奇怪怪，又充足惡意嘅人，尤其是係大陸生存更加多難關⋯⋯』

『但係都多謝你，俾咗呢一份溫柔我⋯⋯』

跟住我隻腳就感受唔到任何感覺了。

我隻腳當然仲郁到啦，無感覺唔係無咗知覺。

但叮噹講，靈嬰已經由一舊細黑影縮細成一個光亮嘅球體，越縮越細，直至消失為止。





及後，我都有幻想過，如果柔柔順利出世，又係咪一件好事呢？我哋會有朝一日相遇，然後得知我哋係同父異母嘅兄妹？定還是會一直互不相干咁生活，從來唔出現係大家生活入面呢？

對於呢件事，我多咗幾分傷感。

同時對我老豆又多咗幾分憎惡。