《我個老友從未來穿越返嚟，話我會愛上一個Kam女》: 021

『嗚嗚⋯⋯嗚⋯⋯』靈嬰離開之後，留低女鬼一個獨自哭泣。

「柔柔放低佢嘅牽掛，你放唔放得低自己嘅執念呢？」叮噹咩都無做，就咁盤膝坐係地下。

『我？放低彪哥？』

「係，承認佢嘅過去，承認佢係呢邊嘅家庭，承認佢兩邊都愛過⋯⋯」叮噹認真而低沉地講。

「唔洗逼佢一定要喺你哋兩個家庭揀出一個比較重要。」





『點解唔可以要佢揀？』女鬼聽完個情緒又再次激動起上嚟。

我、唐師兄同埋呀媽三個已經默默地圍埋一齊，係角落靜靜地聽住佢哋兩個嘅對話，我望住一旁嘅媽咪，佢有啲慾言又止。

叮噹嘅情緒好平穩，即使經歷過頭先柔柔嘅事件後，都可以調整自己個情緒。

「咁揀到之後呢？如果佢揀咗佢哋，你會點？如果揀咗你，你又會點？」

『如果揀咗我重要啲，證明嗰段時間我唔係白過，呀彪係真係愛我囉。』我見到我間屋嘅物品有啲晃房，啲相架同埋花樽都搖咗一搖。
『揀咗佢哋，我同柔柔就係俾人拋低嗰個！』





「其實你覺得自己係一個二奶，插手咗人哋嘅家庭，自己個身分好似變咗個衰人咁姐？你亦都唔想自己背負住衰人呢個身分離開，我講得啱唔啱？」叮噹用平靜嘅語氣，講出呢段好狠嘅說語。

⋯⋯⋯⋯

最怕空氣突然安靜。

『我⋯⋯邊有⋯⋯』女鬼個語氣心虛到，已經唔洗解釋任何嘢。

「都呢個時候，唔洗再自己呃自己，直接面對內心唔得咩？」我呀媽突然出聲。





「喂，媽⋯⋯」我唔想佢捲入去，我本能地捉住佢隻手，但俾佢鬆脫咗。

「仔，呢個始終都係要自己面對，妹妹仔已經好好，幫我出手啦，我覺得自己係時候要面對返自己嘅過去。」呀媽似乎都做足心理準備了。

「我知你聽到，雖然我同你隔咗兩個世界，但係我哋嘅身份都係一樣。就係我哋都係人哋嘅呀媽⋯⋯就算無咗另一半，我哋都需要為咗仔女，堅持落去。」呀媽行過去叮噹隔離，坐落嚟。

「我同你，邊個重要啲，或者咁講，我同你係呀彪心入面邊個重要啲，都否認唔到你哋一齊生活過嘅時光。」

「我哋只不過係呀彪唔同嘅時間線出現嘅人，我先過你出現咁解，係佢遇上你嘅時候，我同呀彪已經結束，我嘅世界得返謙仔一個。」

「咁多年收工最期待嘅就係返到屋企見到謙仔，佢會等我陪佢玩、煮飯俾佢食；至於離開咗嘅男人，我一刻都無再諗起過，就算佢依家返嚟，我都唔想佢打破我哋依家嘅生活。」

「唔你每一段過咗去嘅感情，都需要被再次打開。佢返嚟唔代表住對我哋仲有感情，只不過想有人陪，想遲下有人照顧佢。」





『如果佢仲愛住你呢？』

我自己理解唔到呢種愛情，直到生命最後一刻，仲執著愛嘅輸贏同高低。

「如果係愛，就唔會一走了之，如果係愛，就唔會你走咗之後，依家先返嚟，如果係愛，就會一開始一齊面對人生所有難關。做逃兵唔係愛。」

喺一旁嘅我，好訝異呀媽竟然可以咁清醒，但轉個念頭，呀媽應該係捱過女鬼嘅心態，先至睇得開。