《我個老友從未來穿越返嚟，話我會愛上一個Kam女》: 046

因為之後就係度搖下搖下了，叮噹驚到即刻收起笑容，用力咁捉住我手臂，成個人震咗一震。

「啊！！！」叮噹發出一把幾高音嘅女聲。

見到佢捉實我同埋佢驚嘅樣，我心入面係有點暗爽，嘻嘻！

纜車吊住咁搖咗幾下，就fing咗出去，隨即佢就「嘩——嘩——嘩——」。

當下嘅我諗，搵到一個陪你咁有反應嘅人，其實幾開心。





我係見證住叮噹由驚嘅一瞬間，見到下面嘅風景同高度之後，即刻勁開心、勁興奮。

「你睇下啊，啲人越嚟越細粒啊！」

「鬼唔知咩？」我笑佢大驚小怪。

「好似你咁細。」佢意有所指。

「你又知？」





「我話你對眼。」

我唔敢肯定我哋之間係咪成日有曖昧嘅氣氛，但可以肯定我哋嘅空氣都充滿住開心。

纜車去到一半，慣性地停係半空，我以為叮噹會驚，佢反而一臉淡然咁望住窗外個大海，掛住一個滿足嘅笑容。

佢望住海，我望住佢。

我想架纜車一直咁樣停係度，好似時間可以就咁係度停住一樣。





「好舒服啊！」纜車再次啟動。

「陣間返嚟要唔要搭返嚟啊？」我問道。

「梗係要啦！仲洗問嘅？」

「可以唔搭㗎，有架快啲列車搭返去，睇你試唔試囉。」

「真係㗎？」

「啊⋯⋯好想試啊，但係又想再搭多次啊⋯⋯」佢就好似啲細路女咁，一入樂園就喚起佢嘅童真。

「你陣間再諗下，不如你驚下陣間埋站搖唔搖好過啦，哈哈哈！」