《我個老友從未來穿越返嚟，話我會愛上一個Kam女》: 045

「玩完再睇啦！」佢對眼已經全部都係玩啲刺激嘢，好好地咁放肆一番。

望住佢開心嘅樣，我選擇投降。

沿路去纜車嘅途中，已經好有萬聖節嘅氣氛，我見到已經有鬼屋擺咗係度，出面啲工作人員已經係度扮鬼扮馬。

係排緊纜車嘅時候，我趁機問叮噹：「頭先你見到啲鬼屋驚唔驚啊？」

「唔驚啊，不過我都見到好多黑氣係附近，可能俾嗰啲嚇親多過係真人嚇親。」叮噹笑道。





「咁可能要你保護下我啦，哈哈！」

「死啦你。」

有叮噹係度一打一鬧，排隊啲時間好快過。後尾諗返起，我好似反而enjoy同叮噹排隊玩game嘅時間，因為可以同佢傾更加多之餘，有時都會同佢玩下啲小遊戲。

當我哋排隊越前，見到個纜車埋嚟，叮噹見到好興奮，已經見到條友係度心心眼。

但係佢再見到啲纜車駛出前，會搖晃幾下先再出去，佢就驚起上嚟⋯⋯





「做咩啊？你頭先唔係話唔驚，好興奮玩機動遊戲嘅咩？依家搭個纜車反而驚起上嚟？」我有點哭笑不得。

原來條友得把個殻，同得把口？

「我驚搖⋯⋯我唔驚衝落去，但係驚搖嚟搖去。」叮噹瞬間無咗頭先興奮開心嘅心情，即刻收起晒。

好快就到我哋，我見佢仲未準備好咁，仲驚緊。

「唔洗驚，陣間我上先，到時我會捉住你上去，唔怕嘅呢。」我收起笑意，安慰佢。





「真係？」叮噹擔心地重複問。

「係呢，放心啦，一下就上到纜車㗎啦。」

講完呢句，職員哥哥就問我哋幾多個人，我哋比咗個yeah嘅手勢。

哥哥俾咗個空嘅纜車箱我哋，佢都好識做，唔安排我哋同人「搭枱」，直程俾個「卡位」我哋。

個纜車箱到面前，我一野跳上去，喺我後面嘅叮噹有啲不知所措。

我伸出手，示意叮噹拉住我，俾佢借力。

叮噹毫不猶豫拉住我手，一鳩嘢躍入纜車箱，我哋坐定定後，見佢開心笑咗一陣，之後就笑唔出。