電話唔見咗慘L過做雞: Ch.7-做返廖小圓

而家，我喺一間便利店做店長。工資唔高，但夠生活。阿晴剛升上大學，成績仲幾好（雖然佢成日都係呢個厭世樣）。

陳大文仲係揸小巴，晚晚收工返到屋企，有好餸食，有湯飲。佢間中仲會寫吓嘢，有時寫到半夜。我唔會睇佢寫咩，但我知道，佢寫嘅嘢入面，有我。

我哋冇結婚，因為我覺得冇必要。我哋就係咁樣一齊生活，平淡，但好幸福。

嗰部曾經差啲毀咗我所有嘅舊手機，我早已換咗。入面嗰啲客人號碼同對話，全部一清而空。而家我部電話入面，只有陳大文同阿晴嘅相，仲有我哋一家人嘅日常。

但係，平淡並唔代表完美。





有啲夜晚，我仲係會發噩夢。我會夢見以前啲客，夢見嗰間劏房，夢見自己仲喺度等緊門鐘響。我會嚇醒，成身汗。陳大文會攬住我，細細聲同我講：「冇事喇，你而家喺屋企，你安全喇。」

我會攬返佢，攬到好實。

我唔會再覺得自己污糟。但係，我亦都唔會忘記自己做過啲咩。呢啲經歷，係我嘅一部分。冇咗呢啲經歷，就冇而家嘅我。

阿晴有冇懷疑過我做咩？我唔知。佢從來冇問過。但係有一日，我哋兩個坐喺梳化度睇電視，佢忽然間同我講：「媽，多謝你。」

我問佢多謝咩。





佢話：「冇咩。只係想講。」

然後佢望住我，望咗好耐。嗰種眼神，唔係一個十七八歲嘅女仔應該有嘅眼神。嗰種眼神入面有好多嘢——有感激，有戥我心痛，有理解，仲有少少我睇唔透嘅嘢。佢冇再講落去，只係慢慢將個頭挨落我膊頭度，繼續睇電視。

我望住佢，忽然之間覺得，呢個女仔，可能乜都知。但係佢選擇唔講，選擇用佢嘅方式去保護我。就好似我咁多年嚟用我嘅方式去保護佢一樣。

我出街仲係好低調，牛記笠記、帽同口罩。但唔係因為驚俾人認出我嘅過去，而係因為我已經習慣咗。

做一個普通人，其實好幸福。





阿輝…佢係我人生嘅一部分。我唔會忘記佢帶俾我嘅傷害，但係我亦都唔會再俾佢影響我嘅將來。因為而家，我有陳大文。

佢而家應該唔知喺邊度，做緊啲咩。但係冇所謂喇。一個人嘅路，係自己揀嘅。佢揀咗嗰條路，我揀咗我嘅路。

而我揀咗嘅路，係同一個小巴佬一齊，平平淡淡咁過日子。

呢個，就係我嘅故事。

一個由「Circle」做返「廖小圓」嘅故事。

（全文完）