當太陽降落時: 太陽與地球
「呯！」
「張承赫！」
「你條友仔啊！睇小你一陣都唔得嘅，係都要我搵白板檫掉你先肯醒係咪啊！吓！」原來係教數學科嘅陳sir，啱啱我因為被催眠而瞓着咗，所以佢而家好嬲，面色通樣望住我。
未介紹自己，我叫張承赫，我阿爸由細細個開始已經離家出走，而我阿媽喺我小二嗰一年因為一次車禍，長期變成咗植物人，所以我自從小二開始，就係我阿媽個朋友屋企嗰度住。
咁啱得咁蹺，我阿媽個朋友個女同我同年出世，所以由細細個開始我哋已經同班到而家，話佢係青梅竹馬？唔太似，話佢係我阿妹？好似太親近，由細到大，我哋一齊笑，一齊喊，有時我都會問自己係唔係鍾意佢，但係再諗多兩諗，自己又真係唔夠膽確定。
講返正題，冇錯，我喺上數學堂嗰陣瞓着咗，而喺我面前嘅陳sir，成塊面紅色，好似想隨時攞把刀殺咗我咁樣，唔怪得佢成世人都溝唔到女。
「咳，陳sir，你咁樣就唔啱啦，根據《教育規例》第 279A 章第 58 條規定，「教員不得向學生施行體罰」你知唔知你啱啱將個黑板擦掉落我度已經可以觸犯呢條法例，我其實係可以隨時報警架！」
「咁你唔好訓咪得囉！你自己睇吓你啲成績先啦！成坺屎咁，都唔知你點讀書，你下年升唔到班嘅話你就唔好喺我面前喊啊，我掉你都係為你好咋。」
黐線，當自己係我老竇咩，講埋啲咁嘅嘢。
「嗱⋯⋯嗱⋯⋯嗱⋯⋯你唔好亂講喎，我升中學到而家從來都未喊過，你咁樣好侮辱我喎，如果我溝唔到女為你試問啊。」
「⋯⋯」陳sir嬲到塊面谷到成隻憤怒鳥咁。
「做咩咁嘅樣啫，我講事實咋嘛，我真係可以隨時告你上庭㗎。」我站起來，跟他對峙。
我看到全班看着我竊竊私語，偷笑。
「你！你放學過嚟教員室搵我，抄報告書！連續一個禮拜，如果唔係你冇得走！」陳sir彷彿就好似一部隨時爆炸嘅計時炸彈，為免令到佢喺課室爆炸，我都係唔好再惹佢。
但係我偏偏就係鍾意反抗。
「我放學仲要同我哋學會啲兄弟去夾band，跟住仲要去演出啊！邊有時間留喺度同你寫咩垃圾報告書啊！」
「練結他？演出？」陳Sir聽完冷笑咗一聲，「張承赫，你唔好喺度俾藉口我。你個咩垃圾搖滾學會，平時成班人冇正經嘢做、又冇成績搞出嚟！我同你講，你個學會嘅成績，就同你張數學卷一樣，通通都係垃圾！你哋呢班人根本就冇救！」
黐孖筋，我個學會仲要你管？
「你講還講，唔好攞我對Band隊嚟講好啲喎，對Band係我同佢哋三個辛辛苦苦，用咗兩年砌出嚟，我哋用咗幾多心血你邊會明啊，死賤種！」
陳sir聽到呢番說話之後，眼神有些少緩和，但係我仍然隱約感受到佢嘅怒火。
「叮——噹——叮——噹」正當我準備講下一句嘅時候，落堂鬧聲響起咗，同時間，3A班嘅陳心柔，亦都係我嘅所謂「青梅竹馬」喺走廊度出現，佢對住我笑⋯⋯
唔知點解，喺嗰一刻，我嘅心就好似被暖化咗，我唔知點解會咁樣，明明我就唔鍾意佢，但佢望住我笑嗰吓我心入邊嗰把火就好似被救熄咗咁樣。
陳sir望住我，搖咗兩下頭。
「各位同學，落堂。」陳sir低咗呢句之後就頭也不回咁樣走咗……
但我唔知道嘅係⋯⋯我嘅生命⋯⋯已經開始悄悄改變
時間嚟到放學，最後我都係死死氣，咁樣去咗教員室度抄報告書，期間陳sir不斷喺我隔離念經，成個過程簡直就係折磨⋯⋯
「你呀，而家唔好好讀書，大個冇老細要你㗎，你再係咁，搵唔到工㗎，想當年阿Sir我都好似你咁，但係後來俾一位良師點醒咗，我發憤向上，先至可以企到距離面前做老師⋯⋯」黐孖筋，而家咩年代啊？個個都搞自由創業㗎啦⋯⋯我大個就話俾你知，我靠彈結他都可以搵到食啊⋯⋯
呢個時候，我嘅「青梅竹馬（？）」就出現咗喺走廊，佢望住我抄報告書同埋比陳sir念經嘅樣，好似見怪不怪咁樣，笑咗一笑就走開咗。
但佢隔離嗰位男仔好快就引起咗我嘅注意，佢叫羅永謙，3A班嘅數學天才，基本上科科都係滿分，每年都係全級第一，體育又好叻，好多女仔都鍾意佢，我同佢相比簡直就係一粒微不足道嘅塵埃，同埋一個到處發光嘅鑽石。我嘅「青梅竹馬」——陳心柔，亦都係3A班嘅學生，佢哋兩個拍埋一齊，簡直就好似天注定嘅情侶，唔知點解，明明我唔係鍾意佢，但係睇到呢一幕，我個心都忍唔住喇住喇住。
陳sir放我走嘅時候，已經係五點，我心諗：瀨嘢⋯⋯今日仲要去演出……
當我上到音樂室嘅時候，貝斯手——風無極就大叫：「各位！我哋熱烈歡迎我哋嘅大結他手！張𠄘赫！」
鼓手郭俊謙攞住支鼓棍，指住我：「陳sir又話你啲咩啊？你明知佢係個炸彈仲要特登惹佢，你真係好嘢！」
「你仲好意思講！下次我真係要收你哋錢，做咗場咁好嘅戲俾你哋睇，仲要搞到我自己要去抄報告書，我覺得我自己真係仁慈……」講到呢度，我突然記起陳心柔同埋羅永謙喺走廊個樣，嗰一刻，我嘅笑容慢慢消失。
「咩料啊？個樣突然間咁認真嘅？」鍵盤手程日朗問我。
我冇應佢，反而自己攞起我支結他，嗰一刻，我唔知我到底發生咗咩事，嗰種情緒好難以形容，我插支線入去個音箱度，再將粒旋鈕扭到破音，然後好大力咁樣攞塊Pick掃咗一下。
「嗚——— 」現場發出咗好大，亦都好哽耳嘅聲音。
「嘩……你咩料啊？走去玩distortion?｣風無極用一種好驚愕嘅表情望住我。
我都冇理到佢，自己一個彈起Ado嘅《うっせぇわ》
最冷靜嘅程日朗即刻跟住我，然後郭俊謙同風無極亦都跟住我，音樂室就好似拆天咁咁嘈，喺彈完呢首之後，我哋又彈咗好多首，結果彈彈吓就去到下晝六點，風無極望到個鐘，突然鬼叫：「我阿媽叫我6:00要返到屋企……死啦今鋪⋯⋯」
「咁今日仲去唔去開show？」程逸朗問。
「咁梗係唔去啦……我阿媽遲早打爛我支bass啊……」
「既然係咁，今日就散！」我好大聲咁講。
走出音樂室門口，我見到我最想見到，亦都最唔想見到嘅人。
佢係陳心柔。
「你⋯⋯做咩喺度？」
妖⋯⋯張𠄘赫⋯⋯你做乜嘢啊⋯⋯
陳心柔手上拎住幾本書，可能因為我突然開門？佢呆咗幾秒，但係隨即又笑返。
「冇⋯⋯我啱啱去完自修室做功課，跟住又聽到呢度好嘈，想睇吓你走咗未，未走嘅話一齊返屋企囉～」
「哦⋯⋯我哋啱啱練完，咁⋯⋯一齊返屋企？」我刻意避開佢嘅目光。
「好啊。」佢好爽快應承咗。
到學校門口，我哋一直都冇講過嘢，我同佢都一齊睇緊IG，偏偏就冇話題。
其實我唔想睇IG，我想同你傾偈……
「Billy啊。」佢好似讀穿咗我心思咁，率先打破沉默，Billy其實就係我嘅英文名，但係由細到大都冇乜人叫我Billy，唯獨佢係例外。
「咩事？」
「其實下年都揀科啦，不如你試吓少啲同陳sir嗌交，多啲溫書啦……」
「咪又係聽佢廢噏幾句……是但啦，我呢啲咁嘅人注定讀唔到書㗎啦
「你唔好成日咁啦，」突然，佢好似諗起咗啲嘢，隻眼發晒光咁「啊！係呀，今日羅永謙喺自修室同我做功課嗰陣答咗我好多我唔識嘅問題，你學吓佢啦，我覺得其實你OK 㗎。」
羅永謙。
聽到呢個名，我心入邊又有一種莫名嘅痛苦，我諗返起今朝佢哋喺教員室門口嘅互動，不由自主咁有種想流眼淚，但係又流唔出嘅感覺。
「佢喎……邊有可能追到啊……」
「我唔係咁嘅意思……」佢似乎聽得出我嘅語氣裏便有少少「吃醋」嘅成份。
「冇嘢啊，我隨口噏咋嘛。」我加快腳步，夕陽照射底下，搞到我好想喊。
我不禁諗起陳奕迅嘅《葡萄成熟時》
「但見旁人談情何引誘
問到何時葡萄先熟透
你要靜候 再靜候
就算失收 始終要守
日後 儘量 別教今天的 淚白流
留低 擊傷你的石頭 從錯誤裡吸收
也許 豐收 月份尚未到 你也得接受
或者 要到你將愛釀成醇酒 時機先至熟透」
「做咩行咁快啫！」
「肚餓啊！快啲返屋企食飯！」