當太陽降落時: Billy

「你哋返嚟啦！快啲食飯啦！」返到屋企之後，陳心柔嘅阿媽——陳姨姨笑笑口咁笑我哋。



相比之下，我完全笑唔出。



「Billy仔做乜嘢啊？笑吓啦。」陳姨姨應該係望到平時好開朗嘅我突然之間唔笑。







「阿媽，佢今日又俾陳sir罰留堂，唔開心就梗㗎啦。」陳心柔一如以往，每當我留堂就會同陳姨姨告狀。



「唉⋯⋯唔緊要啦，嚟食咗飯先啦。」







「我唔肚餓，返房先。」其實我肚餓，但係我唔想望住陳心柔，一望到佢，就會有一種奇怪嘅感覺。



「喂喂喂！你啱啱先話肚餓所以沖返嚟㗎喎！」



「突然間又唔肚餓啊！」







「呯——」我好大力閂埋咗對門。



閂埋對門之後，我忍唔住瞓喺對門度，喊咗出嚟……



「Billy ！你冇嘢啊！真係唔食？」門外嘅陳心柔不斷大力拍門。



「有得佢啦！佢肚餓會自己出嚟搵嘢食㗎啦！」陳姨姨喺廚房大嗌。







但係我都冇應佢哋，自己一個坐喺門前喊，眼淚滴到落地下。



我唔明，呢個到底係咩感受⋯⋯



明明我就唔係鍾意佢，我只係當佢係阿妹，點解會出現呢種咁奇怪嘅感受⋯⋯







好難頂⋯⋯



我望住部電話，打開咗Spotify，咁啱睇到最頂嗰度有一首陳奕迅嘅《粵語殘片》推薦咗俾我，於是我就撳咗呢首歌。



我聽聽下，喊得更大聲，雖然未至於出面都聽到，但係近三年喊得最犀利就係呢次。



第二日起身，原來我仲坐咗喺門口，耳機入邊仲播緊《粵語殘片》，我嘅心情亦都平靜返好多，但係隻眼喊到腫晒……









「屌⋯⋯」我嗱嗱臨起身去沖涼。





當我沖完涼之後，已經係七點，陳姨姨同心柔已經醒咗，今日係星期六，估唔到佢哋咁早醒。



「嘩……太陽由西邊升起囉……居然唔係我叫你起身？」陳心柔扮到好驚訝。







「係唔係唔俾呀？琴晚打機打通宵唔得嘅？」



「又打機……」，「快啲過嚟食早餐！死白卡！」



白卡……



佢對我好好，甚至熟到可以隨便鬧我，將所有醜態暴露喺我眼前，因為可能已經當咗我係兄弟，但因為咁，我同佢之間有一種難以捉摸嘅界線。



我到底係真係鍾意你？定係單純只係享受呢種關係？



相信呢個世界冇人知道。



「喂……陳心柔。」但係呢刻我忍唔到。



「做乜春啊？」



「如果我話我鍾意你，你會點？」我扮到好輕鬆咁問佢。



「打你一巴囉！」



「你都幾好笑個喎……」打我一巴……即係唔鍾意我？



「你識我嗰陣話要做一世兄弟㗎嘛！」



「又係喎……」屌……我當時點解會講啲咁嘅嘢……



「做咩咁問？係唔係鍾意我！」



「黐線！邊個會鍾意你？」



「切！」佢又喺度扮嬲。



「唔講咁多，我約咗佢哋去彈結他！」



講完之後，我即刻跑走咗。