橙皮、橙汁、橙籽: Ch.2-廣州仔

嗰陣，我喺一間中型物流公司做文員。

做物流之前，我做過唔少嘢。餐飲樓面、廚師、主任、cafe水吧、甜品師，總之同食有關嘅，我大部分都撈過。我份人做嘢好認真，唔鍾意求求其其。就算係洗杯，我都會洗完再抹到冇水漬先放返好。啲人話我挑剔，我話呢個叫基本要求。

點解會轉行做物流文職？因為我想學多啲嘢。做餐飲嗰陣，成日對住個廚房，但係我發現，一間舖頭要成功，唔單止要好食，仲要識管理、識計數、識睇市場。所以我走去做物流文職，想學吓後勤運作、供應鏈管理嗰啲嘢。
我好清楚自己想做咩。開一間屬於自己嘅舖頭，做自己嘅品牌。

喺公司入面，我認識咗周仔。

周仔係廣州人，花名叫「廣州仔」。佢大我幾歲，人生經歷豐富到可以出書。佢喺廣州開過零售店，執咗。嚟到香港，又開過一間外賣快餐店，又執咗。最後同我一樣，做咗打工仔，入咗呢間物流公司。





「喂，阿橙，你知唔知我呢世人最叻係咩？」
佢有一日喺pantry同我講。

「咩呀？」我問。

「執笠。」佢笑住講，但係笑容有啲苦澀。

我忍唔住笑咗出嚟。





「你唔好笑呀，我係認真嘅。」佢話。「我開過兩間舖，兩間都執。但我唔覺得自己失敗。我學到嘅嘢，比任何MBA都多。」

我望住佢，忽然覺得，呢個人好有意思。

我哋開始熟絡起嚟。放工會一齊食飯，食飯會一齊傾計，傾計會傾到唔捨得走。我哋傾嘅，全部都係夢想——開舖頭、做品牌、點樣做得有特色、點樣做出一間真正屬於自己嘅餐廳。

「阿橙，我睇好你。」周仔有一晚食飯嘅時候好認真咁同我講。「你份人做嘢認真，有要求，但又唔會死板。你係做餐飲嘅料。」

「我都睇好你。」我話。「你夠膽搏，人脈廣，又有經驗。我哋如果一齊做，應該有得諗。」





就係咁，我哋開始認真傾開舖嘅事。

傾咗三個月，做咗好多research，最後，我哋決定：辭工，去廣州開一間家庭餐廳。