橙皮、橙汁、橙籽: Ch.3-不存在的異地人

決定辭工嗰日，我個心好亂。

我辭咗份穩定嘅工，要去一個唔熟悉嘅城市，開一間唔知會唔會成功嘅舖頭。呢個決定，喺好多人眼中，係好傻嘅。但係我同自己講：阿橙，你唔試，你永遠都唔會知。

周仔比我更加灑脫。佢話：「我已經試過失敗兩次，唔爭在多一次。更何況，今次有你。」

我哋去咗廣州，開始搵舖位。

搵咗好耐，最後喺一條唔算旺但係有少少人流嘅街，搵到一個地舖。個舖位唔大，但係四四方方，好實用。我哋決定用佢嚟做一間「家庭餐廳」——早上賣台式飲品、蛋糕、港式小食早餐，夜晚就做燒烤啤酒。





「呢個設計好。」周仔話。「日頭賺女人錢，夜晚賺男人錢。早晚都殺。」

「你講到好似開賭檔咁。」我笑住講。

「做生意就係咁㗎啦，阿橙。」佢拍咗拍我膊頭。「你估真係開善堂咩？」

舖位搵好之後，就開始裝修。我哋兩個乜都親力親為——設計、買料、監工、埋數。周仔成日話我「挑剔」，但係佢知道我嘅挑剔係啱嘅。一間舖頭嘅細節，就係佢嘅靈魂。

「你睇吓呢個燈光。」我話。「要暖色，唔好太白。太白會令到啲嘢食望落去好假。」





「得得得，你話事。」周仔投降咁講。

搞掂晒裝修之後，就係最麻煩嘅一環——
登記做負責人。

喺內地以港人身份辦個體戶手續極度麻煩，要審批好耐……我同周仔都唔係當地人。周仔雖然係廣州出身，但係佢嘅戶籍已經遷咗去香港，唔符合資格。

「點算？」我問。

周仔諗咗好耐，然後話：「我老婆個細佬，佢係廣州人。可以搵佢掛名做負責人。」





「信唔信得過？」我問。

「佢份人傻更更咁，但係心地好。我老婆話佢最聽佢話。」周仔話。「而且佢對做生意完全冇興趣，淨係想搵個名義出嚟幫吓手，順便逗份人工。」

我突然間諗到個主意：「既然要佢掛名，不如將我哋兩個都隱藏喺後面，用另一個身份去幫佢做嘢。」

「咩意思？」

「即係，佢係枱面嘅老闆，我同你係背後嘅『老闆嘅親戚同朋友』。我係周仔識得嘅朋友，專程過嚟幫手；你係佢姐夫。呢個身份，可以解釋到點解我哋兩個成日喺舖頭出現，又唔使解釋啲錢邊度嚟。」

周仔聽完，笑到眼都瞇埋：「屌，阿橙，你果然係做策劃嘅料！」

我後嚟先知道，周仔老婆個細佬，叫陳皮。





佢三十一歲，大我兩年。喺廣州做緊一份銀行嘅後勤，人工唔高，但係穩定。佢份人，表面上傻更更，成日笑笑口，好似對乜都冇所謂咁。但係有啲嘢，你睇耐咗就會發現——佢唔係傻，佢只係唔想出聲。

佢有車，有樓，有廣州戶口。全部都有。

佢架車係白色Benz。舊款，二手，但係Benz就係Benz。

我嗰陣連車牌都冇。每日返舖頭，行路、搭巴士、有時踩共享單車。

嗰陣我冇諗咁多。我只係覺得，呢個世界有人有Benz，有人冇車，好正常。我冇諗過，呢個差距，會同我有任何關係。

我當時唔知道，一個「有Benz」嘅男人，同一個「連車都冇」嘅男人之間，喺一個十九歲女仔嘅世界入面，差距有幾大。