橙皮、橙汁、橙籽: Final-甜酸苦辣

而家，我四十歲。

我喺香港做緊物流文職，每日返工放工，對住電腦打單。公司有個後生女同事，成日問我做咩唔結婚，我通常笑笑口話「搵唔到」。佢唔知，我唔係搵唔到，我係唔想再搵。

周仔同佢老婆留咗喺廣州，日日都過住啲慢活生活，其實都幾羨慕佢。我哋間中都會聯絡，但係好少再提以前嘅事。

有陣時，我會諗起阿蚊。

我會諗起佢嗌我「橙哥哥」嗰把聲。我會諗起佢整蛋糕俾我食嗰個樣。我會諗起佢喺雨入面同我講「你係我遇到最好嘅人」。





我會諗起嗰條名牌頸鏈，諗起嗰套護膚品，諗起嗰束不死花。

我會諗起嗰個用一百蚊人仔摺成嘅紅色心心。

我會諗起佢當時望住個心心嗰個笑容。

然後，我會諗起CCTV嗰個畫面。

呢啲嘢，全部都好矛盾。
好想永遠記住，同時好想將呢段回憶忘記。





我唔知我仲嬲唔嬲佢。

我淨係知道，佢改變咗我。

我份人到依家仲係咁鬼認真，但係我唔會再將所有嘢都放喺一個人身上。
我唔會再咁天真咁，相信一個人。

我夢想過創一個品牌，過一種嚮往嘅生活。





但係而家，我寧願平淡。

平淡，至少唔會再痛。

有陣時，我會經過一啲家庭餐廳，見到入面嘅人食緊飯、笑緊、傾緊計。

我會企喺出面望一陣，然後繼續行。

而家我喺香港，依然冇車。

有時收工，我會企喺巴士站等車。見到啲後生仔揸住架Tesla經過，我會諗起陳皮架白色Benz。

但我已經冇乜感覺。

因為我終於明白，一架車，唔會令你成為一個更好嘅人。




只會令你成為一個「有車嘅人」。

而嗰個「有車嘅人」，最後都係要喺廚房入面，被一個CCTV鏡頭先可以「留低」一個女人。

我呢？

我至少有一個故事。

我唔知我仲會唔會再創業。

但係我知道，如果有一日我真係再試，我唔會再俾任何人有機會傷害到我。

因為我學識咗一樣嘢：

夢想，係要付出代價嘅。




而愛情，就係最昂貴嗰種。

（《橙皮、橙汁、橙籽》全文完）

後記：本人感想

呢個故事，係我嘅往事。

你問我有幾多係真，有幾多係假，我唔會答你。
因為回憶呢樣嘢，本身就係真假難分。

我只可以講
有啲嘢雖然係9up
但講嗰陣係有少少痛。





但係9up完，我好似好咗少少。

因為我終於可以將呢件事，由一個「傷口」，變成一個「故事」。

多謝你咁有耐性睇到呢度。

有人問我，究竟係「廚房佬」定係「掛名老闆」？

我覺得唔重要。
因為有啲真相，寫出嚟會太痛。

痛到連我自己都頂唔順。

一架Benz、一個戶口、一層樓——呢啲嘢，我全部冇。





我淨係得一個故事。

而呢個故事，淨係俾你睇。

多謝你。