都會錡思妙想ING: 7. Week 5(1) 扮抑鬱的一碗麵
上莊又搞唔掂,問完Lecturer都聽唔明佢嗡乜春。咁我可以點做呢?
對我嚟講,就係「扮」抑鬱。
睇到呢度你又會問:「Tony,乜抑鬱呢種狀態都有得扮出嚟咩?」
當然有!
星期一朝早未上堂之前(因為我喺Add-drop period 期間調咗啲堂過去星期一,咁其他日子就有多啲時間做自己嘢)我去咗主校園買咗一杯凍咖啡,坐喺張凳之後就一個神情呆滯。毫無意義地碌手機,然後放慢飲咖啡嘅速度。加上平時夜瞓就搞到我個樣顯老。各種因素加埋一齊造就咗一幅好似因為創業失敗而破產嘅中年男人坐喺星巴克到望咗手提電腦想搵Freelance接Job但係乜嘢都接唔到嗰種絕望感出咗嚟。
之後就去咗上堂,上完堂之後我就去咗國際都會嗰度是但搵間餐廳食飯,咁行行吓就見到有個寫住「麻辣燙」既餐廳。之前做過調查發現呢間嘢係大陸菜,諗住佢個價會比較親民。當我一入到去,叫咗碗菌菇湯底麵嗰陣時,就等咗十幾分鐘啦,個待應就咁遞碗麵過嚟,然後再送埋張收據。
跟住我一睇就發現,就算扣埋折扣都要比成72蚊。問題係,你碗麵又唔係大過人,裏面啲麵食幾口就食完。跟住啲配料就只係得兩塊豆乾,一條腸仔,少許肉丸同埋兩條西洋菜,然後你同我講成碗嘢要比咁多錢!你碗面鑲咗黃金喺上面呀?
唉,其實價錢唔貴嘅話,我埋得你係咩牌子姐?
人哋都係想落堂之後出吓街唞下氣順便搵啲好西嚟食吓。
點知計過度過,始終都係賽馬會校園嗰邊啲嘢比較好食同埋價錢比較平。咁我點解唔去嗰邊叫嘢食?真係搵自己笨!
至於點解會有嗰篇關於女權/母權嘅post出現呢?咁係因為我食完麵返學校圖書館嗰時幻想,如果嗰間嘢裏面啲職員全部都係女僕既話,姖哋會對我碗麵施展魔法,令到我碗麵變得彈牙,而且個湯底會因為充滿愛而變得鮮甜!咁我嗰72蚊起碼都比得順氣啲呀,係唔係先?