都會錡思妙想ING: 8. Week 5(2) 失控(1)
喺9月30號朝早,我喺Threads 見到一幅咁樣既post。
「其實Tony考Dse考得唔差啊,喺考衰咗科通識姐。點解佢要咁執著紅磚大呢?」
我睇到呢到,個腦裏面開始經歷一場風暴。
「喂!Tony ,乜你唔係話你已經接受咗進入唔到紅磚大學,要接受喺都大讀書嘅事實咩?」
我原本都係咁諗,但係我個腦不受控制地飛曬啲畫面出嚟。
如果我當初入到紅磚大學嘅話,我第一個會報既Major會係資訊與科技,跟住我應該會報埋傳意設計。咁樣我就可以去學埋點樣去畫自己想畫嘅動漫角色。然後順便可以學吓點樣做Vtuber。喺呢段大學生涯裏面,我應該會參加埋大學生創業比賽,嘗試上莊。同一班前輩後輩共同度過美好青春大學4年生活。跟住會喺紅磚大學都搵同IT相關既Part-time 同埋Internship 嚟做。如無意外既話我應該會係今年就已經喺紅磚大到畢咗業,喺大公司到搵到一份萬幾至兩萬蚊既IT工。
又或者可以用紅磚大嗰4年時間學習點樣去做一個Vtuber,可以每晚抽一個鐘頭去開直播,喺呢個過程裏面學JFFT咁。打機,陪觀眾傾計/聆聽佢哋嘅心事去開導佢哋。有時又會唱吓歌去表現自己嘅歌喉。
甚至乎,如果我當初衰咗DSE之後讀一年IVE再考返入去紅磚大學嘅話,我諗我而家都應該準備緊篇大學畢業論文。
但結果係,我聽從咗家人去咗讀高級文憑,喺HKDI嗰度控制唔到自己就爆發咗嗰單性騷擾女同學事件,跟住我要退學。入去西九龍校園嗰度又因為控制唔到自己就出咗句:「我一定會freeride你哋」既呢句名言。Year1 Sem 1 考試嗰陣意外失準搞到我要Defer成年先喺嗰度畢到業。
然後喺西九龍校園畢業之後,我又因為GPA唔夠所以升唔返去心目中既紅磚大。而走去入非8大既都大到讀書。
我!真!係!接!受!唔!到! 自己嘅青春就咁樣過咗去,更加接受唔到嘅係呢四年我喺現實世界嗰度累積返嚟嘅主要係體重,成日用把口話想減肥又减唔到。
諗到呢一刻,我覺得自己成個人真係完全陷入抑鬱狀態。