我喺路邊撿到個18歲醫科女返屋企⋯: Ch3.小魚

佢叫小魚。
全名Karen Yu，係內地嚟香港讀大學嘅學生，讀緊醫科，十八歲。佢父母唔係有錢人，但係好想個女有出息，所以辛苦儲錢供佢嚟香港讀書。
「我嚟咗香港三個月，一直都好哋哋。」佢坐喺樓梯級上面，一邊抺眼淚一邊講。「但係上個禮拜，我阿媽打俾我，話阿爸突然間病咗，要好多醫藥費。佢哋話…話之後可能冇辦法再供我讀書。」
佢停咗一停，然後繼續講。
「我唔想放棄。我唔想返去。我知如果我返咗去，我就永遠都冇辦法再做醫生。」佢把聲愈嚟愈細。「所以我去咗做…做兼職。」
「咩兼職？」我問，雖然我已經估到。
佢沉默咗好耐，然後好細聲咁講：「我聽人講，做雞好快可以搵到錢。所以我去咗租咗一間房，試吓做一日。但係…我唔知原來租間房要咁多錢，我嗰日得一個客，賺嘅錢仲少過租金。我而家連食飯都冇錢。」
佢講完，又喊咗出嚟。
我望住佢，個心唔知點解好唔舒服。
呢個女仔，佢只係一個十八歲嘅細路女。佢離開父母，一個人嚟到香港，面對住一個完全陌生嘅環境。冇朋友，冇依靠。而家仲要面對經濟問題，搞到要去做雞。




呢個世界，真係好撚殘酷。
「你今晚有冇地方住？」我問。
佢搖咗搖頭。
我吸咗一口氣，然後做咗一個連我自己都覺得瘋狂嘅決定。
「我屋企有間空房，你可以暫時住喺我度。」我話。
佢望住我，對眼瞪到好大。
「不過先講明。」我即刻加咗一句。「租金唔使俾，但係你要幫手做家務。打掃啦、洗衫啦、煮飯啦，當係抵租。我唔係包養你，亦都唔會對你做任何嘢。你當我係一個…呃…包租公啦。」
佢望住我，沉默咗好耐。
然後，佢忽然笑咗一下。係嗰種好感激、好開心嘅笑容。
「多謝你⋯大哥哥！係呢⋯我應該點稱呼你？⋯」佢細細聲講。




小魚跟我由深水埗行返去我嘅大角嘴屋企。
沿途我地行得好慢，佢有陣時變到好靜，吞吞吐吐欲言又止咁。但有時又會問我好多嘢，主要都係問收留佢會唔會增添麻煩之類。
小魚係一個好女仔嚟，最少由我同佢講第一句說話開始，就覺得係咁，佢起碼個款唔似係騙子先。
因為，我覺得喊同眼淚可以係假。
但嗰種無助、驚恐嘅表情係冇得扮嘅。