我喺路邊撿到個18歲醫科女返屋企⋯: Ch2.街邊嘅女仔

嗰晚，我去深水埗一幢唐樓搵人按摩。
你唔好誤會，我唔係去叫雞。我去搵嘅係一個六十幾歲嘅大媽，叫陳師傅，佢係正宗嘅推拿師傅，以前喺中醫館做過，手法一流。我成日腰酸背痛，一個月會去搵佢一兩次。如果你想喺嗰度扯旗，我諗好難——陳師傅個樣似足你小學嗰個訓導主任，佢一用力，你只會痛到大叫，完全唔會有任何生理反應。
我行到唐樓樓下，準備上去嘅時候，見到一個女仔踎喺樓梯旁邊。
佢個子嬌小，長頭髮，化咗淡妝，個樣幾甜，但係佢塊面好多淚痕，對眼紅晒，成個樣好無助。佢著住一件好簡單嘅T恤同牛仔褲，隔籬放住一個細細嘅行李喼。
正常嚟講，我係唔會理呢啲嘢嘅。呢個年頭，街上面咁多騙案，你唔知邊個係真係需要幫忙，邊個係扮可憐呃錢。我份人咁Hea，最怕就係惹麻煩上身。
但係，唔知點解，我喺佢身邊行過，上咗幾級樓梯，又停低咗。
我回頭望咗佢一眼。
佢踎喺度，個樣好似一隻俾人遺棄嘅貓仔咁，好細粒，好孤獨。街上面人來人往，冇人理佢，冇人望佢一眼。
我企咗喺度，掙扎咗大概十秒。
「你唔好理啦！萬一係詐騙呢？」我把聲喺個心入面響起。




但係，另外一把聲又講：「屌，萬一人哋真係有事呢？」
我吸咗一口氣，行返轉頭。
「小姐，你冇事呀嘛？」我問。
佢抬起頭望住我，對眼好驚慌，好似一隻受驚嘅小動物咁。
「我…我冇事。」佢細細聲講，但係佢把聲明顯唔係冇事。
「你喺度做咩呀？咁夜一個女仔喺街邊，好危險㗎。」我話。
佢望住我，沉默咗一陣，然後忽然喊咗出嚟。