我喺路邊撿到個18歲醫科女返屋企⋯: Final.final.王hea與小魚

新床褥送咗嚟嗰日，我同小魚一齊鋪床單。
佢好認真咁拉平每一個角，我就喺旁邊hea住睇。
「你幫手啦。」佢話。
「我幫緊手啦——精神上。」我話。
佢用枕頭扑咗我一下。
夜晚，我哋第一次一齊瞓喺張新床褥上面。
小魚好快就瞓著咗。我望住佢，望住佢嘅側臉，望住佢微微上翹嘅嘴角。
忽然之間，佢皺起咗眉頭，身體開始震。
「唔好…唔好蝦我…」佢細細聲講，把聲好驚慌。
佢發緊惡夢。




我即刻攬住佢，好細力咁拍佢背脊。「冇事嘅，冇人會蝦你。為哥哥喺度。」
佢慢慢咁放鬆落嚟，眉頭亦都鬆開咗。佢冇醒，只係本能咁挨咗過嚟，挨入我懷抱入面。
我攬住佢，望住天花板。
我知道，佢嘅傷口，唔會因為同我一齊就即刻好返。被凌霸嘅陰影、做雞嘅經歷、俾人歧視嘅日子——呢啲嘢，會跟住佢好耐好耐。
但係，我可以陪住佢。
佢發惡夢嘅時候，我可以攬住佢。
佢唔開心嘅時候，我可以聽佢講嘢。
佢驚嘅時候，我可以話俾佢知「冇事嘅」。
呢個，就係我嘅角色。
只係一個會喺佢需要嘅時候攬住佢嘅男人。




——————
有一晚，我同小魚行街，
唔覺意咁經過深水埗嗰幢唐樓。
我冇出聲，佢都冇出聲。
我哋只係一齊望咗果幢樓一眼，然後繼續行。
過咗一陣，小魚忽然捉住我隻手。
「多謝你。」佢細細聲講。
「多謝咩？」我問。
「總之係多謝你啦。」佢笑住講。
「哇你答得咁hea嘅，喺度扮我呀？」我自己都笑咗。




佢冇答我，只係捉實我隻手，繼續行。我望住佢嘅側臉，忽然之間，我明咗佢想講咩。
佢多謝我嗰日見到佢踎喺路邊喊，冇袖手旁觀。
多謝我嗰日撳咗嗰個門鐘，知道咗佢嘅秘密之後，冇嫌棄佢。
呢啲說話，佢唔需要講出口。
因為愛情嘅野，
你hea，佢唔會hea。

（全文完）