我喺路邊撿到個18歲醫科女返屋企⋯: 番外篇2：白兔仔勇氣日記

我記得果日係距離小魚畢業仲有半年，某日嘅星期五嚟。
返工果度我有太多年假，公司迫我今日「清假」。小魚去咗返學，我就喺屋企hea。連續三日假就Hea足第三日，hea到連我自己都頂唔順。於是下晝開始就執吓嘢，咪搵啲嘢嚟做吓咁囉。
執拾到咁上下，行過小魚間房發現冇關門，一推門就見到有本嘢已經跌咗喺地下度，於是我入房幫佢執返放好。就發現本嘢封面原來都幾可愛，一隻白兔仔嚟。隻兔仔仲要嗌住「有勇氣就有蘿蔔！」嘅口號。
我覺得幾有意思，諗都冇諗就打開嚟睇吓。

九月十五日 晴

今日係我住喺為哥哥屋企嘅第三日。
我仲係好驚。
驚佢會突然間話唔俾我住，驚佢會趕我走，驚佢會同其他男人一樣，對我有其他要求。




但係佢冇。佢放咗條新毛巾喺我房門口，仲寫咗張紙仔：「呢條毛巾係新嘅，你用啦。雪櫃有飯，肚餓就叮嚟食。我返工，夜晚先返。」
佢連見我都冇見。
佢係特登避開我嘅，因為佢唔想令我唔舒服。
從來冇人咁樣對我過。
以前，所有人都係諗住點樣可以喺我身上攞到著數。蝦我嗰班人，佢哋想攞我啲錢、攞我嘅尊嚴；學校啲同學，佢哋想抄我功課、想我幫佢哋出頭；有啲男仔，仲想要⋯我嘅身體。
但係為哥哥，佢咩都冇問我攞過。
佢淨係話：「幫手做家務啦，已經夠。」
呢個世界上，真係有咁好嘅人？

十月三日 陰





今日返學嘅時候，有個同學問我：「你喺邊度住㗎？」
我話：「親戚度。」
佢問：「咩親戚？」
我唔知點答。我唔可以話係一個中年男人收留咗我，因為佢哋一定會亂諗。
我好驚。
驚佢哋知道我嘅過去，知道我做過一日雞，知道我俾人凌霸過，知道我嘅屋企冇錢。
我驚佢哋會歧視我，會好似以前啲人咁笑我、蝦我。
為哥哥話過，我唔使驚，呢度係我屋企。但係，呢度真係我屋企咩？我只係一個寄居嘅人，我只係一個負累。
我成日都覺得，自己唔值得被幫。





（王Hea 已經聽到鎖匙同開門聲，即刻拿拿聲將本「兔仔日記」放返好喺小魚書枱上，之後就出返大廳）
（以下仲有三篇王Hea冇睇到）

十一月二十日 雨

今日為哥哥病咗。佢發燒，燒到卅九度。
佢仲要死撐話「冇嘢」，話「食粒藥就得」。我叫佢去睇醫生，佢話：「睇醫生好貴喎，我Hea住等佢好返啦。」
呢個男人，真係好Hea。
但係我好擔心佢。
我用我學緊嗰啲醫學知識，幫佢探熱、幫佢敷毛巾、煲咗碗粥俾佢食。
佢食咗一啖，然後話：「係我食過最好食嘅粥。」
為哥哥真係好鍾意亂講野。
因為我唔識煲粥。
佢竟然食晒成碗。




我望住佢食粥嘅樣，唔知點解好想喊。
從來冇人話過鍾意我煮嘅嘢。以前喺屋企，阿媽成日話我「咩都做唔好」；喺學校，啲人話我「除咗個樣咩都唔識」。
但係為哥哥，佢話佢鍾意。
碗粥應該係好難食，但佢都食晒。
呢個男人，係咪傻㗎？

三月八日 晴

今日係婦女節，學校有活動，但係我冇參加。
因為我冇朋友。
嚟咗香港咁耐，我仲係冇朋友。我唔識點樣同人傾計，唔識點樣融入群體，唔識點樣俾人知道我嘅諗法。我驚，驚佢哋知道我真實嘅樣之後，會好似以前嗰班人咁，笑我、蝦我、話我「大陸妹」。
為哥哥成日話：「你咁好，點會冇人鍾意你？」
佢唔明。佢唔明俾人凌霸過嘅感覺。好似成個世界都係敵人，你唔知邊個係真心，邊個係假意，邊個會喺背後捅你一刀。
為哥哥係第一個，我肯定係真心嘅人。
但係，得佢一個，夠嗎？





六月二日 雨

我做咗一個決定。
阿爸病情突然惡化，醫生話需要一筆較大金額。學費同其他開支又加價，下年差唔多要多交成萬蚊。
我兼職嘅錢根本唔夠。
我諗咗好耐，諗起以前做過「果份工」一日。
其實我好驚，好憎嗰種感覺。
但係，如果咁樣可以快啲湊夠錢……
我知，為哥哥知道咗，一定會好嬲。
我亦都知，佢一定會話我傻，話我唔應該咁樣做。但係，佢唔知道，佢對我嚟講，
係值得用任何方式去報答嘅。
我冇其他嘢可以俾佢。
我嘅身體，係我唯一覺得自己「有價值」嘅嘢。
至少，我自己係咁樣覺得。




（如果儲夠醫藥費同學費之後仲有剩餘想買一個最好嘅電鬚刨俾為哥哥。佢成日都唔記得剃鬚。）