我好似鍾意咗隔籬team主管⋯: Ch4.被迫OT嘅會議

有一日，公司開咗個好重要嘅會議。
我嗰team同王Hea嗰team都要留低開會，搞到大家都要加班。
開會嘅時候，我終於有機會近距離觀察王Hea做嘢嘅樣。
老闆講咗個好模糊嘅大方向，好多人都聽唔明，舉手問問題。王Hea冇出聲，只係喺度寫嘢。
我偷偷望咗佢一眼，見到佢張紙上面畫滿晒圖表同流程，全部都係佢對老闆個方向嘅理解同執行方案。
到佢講嘢嘅時候，佢企咗起身，用好平淡嘅語氣解釋佢嘅諗法。佢嘅思維好清晰，每一個步驟都好有邏輯，連老闆都聽到點晒頭。
我望住佢，忽然之間，覺得佢好型。
佢講完之後，坐返低，又變返嗰個hea爆嘅樣。佢抺咗抺眼，打咗個呵欠，好似啱啱冇發生過任何事咁。
會議完咗之後，大家開始執嘢走。我鼓起勇氣，行過去同佢講嘢。
「喂，王Hea。」我叫佢。




佢抬起頭望住我，對眼有啲攰：「嗯？」
「你頭先講得幾好喎。」我話，扮到好自然咁。
「哦，多謝。」佢話，然後繼續執嘢。
「喂，不如一齊食晚飯呀？」我問。
我呢世人第一次主動約男人食飯。
佢望住我，沉默咗一秒，然後話：「唔啦，我返屋企食。」
我成個人呆咗。
「哦…咁好啦。」我話，扮到冇嘢咁。
「嗯，拜拜。」佢話，然後拎起佢個袋就行咗出去。
我企喺度，望住佢嘅背影，成個人都未反應到。




我第一次食檸檬。

佢拒絕咗我。佢竟然拒絕咗我！

返屋企食？邊有人返屋企食飯㗎？
聽講佢一個人住咋喎，返去食咩？食自己？

個心好煩躁。

之後連續幾日，我都故意喺茶水間同電梯口製造偶遇。佢見到我最多只係點頭，語氣依然平淡。有一次我甚至特登問佢「今日又唔記得剃鬚？」，佢只係摸吓下巴，回咗句「係呀」，就走咗。




我開始有啲惱怒，又有啲不甘。佢究竟係真係冇感覺，定係根本冇將我放喺眼內？