搶婚: 第六章
某天，陳小姐（吳生的老闆，亦即是我們部門的主管）叫了我進她的房間。
「阿駿，你入黎我地公司都一段時間喇，工作上有冇啲咩困難﹖」為什麼陳小姐會忽然問我這些問題﹖難道我有地方出了錯，對公司做成了損失所以要把我革職﹖這些問題圍繞了我半秒，但已不容再想下去，只好見一步行一步。
「幾好呀，同事都對我好好，啲野都上哂手。」只差未有自誇工作表現好好，你們公司沒有我會不行等等。
「唔，呢層JAMES都有同我講過，佢話你學野都好快。」聽到陳小姐這樣說，我就覺得更奇怪了，那她叫我進來到底是說甚麼呢。
「唔知你有冇聽人講過，公司最近打算開發一個新既品牌，令到我地啲客對公司繼續保持住新鮮感，唔好流去其他競爭對手度﹖」陳小姐繼續說。
「所以公司已經租埋下面十二樓其中一個寫字樓，開條新TEAM，人呢，就喺宜家咁多個部門入面抽調過去。」
「你想我過去幫手﹖」我問道。
「係，我覺得你係我地部門入而最適合既一個。呢啲機會好難得架，而且多數會比其他同事更快升職，始終幫公司開一個新品牌係大PROJECT。」陳小姐好像想游說我同意她的說法。
「我可唔可以考慮一下﹖」我問道。
「個機會都幾難得，你有咩需要再考慮﹖」
「我始終係新入黎公司，有好多野都未學識，我唔知自己做唔做得黎。」其實我的答案是，我不捨得離開現在的工作環境，及不捨得SHERRY。「你有咁既諗法都岩既，你好好考慮吓啦。我星期三就要覆總公司，你星期二答我啦。」
「唔該哂，陳小姐。」星期二，即是我有24小時去考慮。
「咁咪好囉，呢啲機會真係唔係人人有架。你上位喇阿駿。」SHERRY邊說邊喝著她手上的STARBUCKS。對，我選擇了請SHERRY飲我平常不太喜歡喝的STARBUCKS去告訴她這件事，貪它座位比較舒服。
「即係你都覺得我應該去呀﹖」我問。
「梗係啦，有得升唔升，罪大惡極呀你。」
「調位咋，邊有得咁快升丫懶叻。」
「差唔多啦，好快架喇如果你過左去。人人都係咁講既。」
「咁我走左咪冇得一齊食飯﹖」我比較直接地入正題。
「車，樓上樓下之麻，又唔係去邊，要食飯一定食到架。」SHERRY好像毫不擔心。但大家都知道，這類型的似近還遠的分別，只會令兩個人漸漸的疏離。
「咁又係。」聽罷SHERRY的意見，我想我都是作出一個常人認為正路及簡單的決定好了。
「咯、咯。」「COME IN。」
「唔好意思呀陳小姐，阻唔阻你﹖」我說。「唔阻呀阿駿，你搵我有事﹖」
「我諗我都係會接受呢個新既挑戰。」
「GOOD，年青人係要有冒險既精神先得架，咁我一陣會同番總部講，應該下個月就會調過去架喇。」
「唔，唔該哂。」
走，為什麼我有一種酸酸溜溜的感覺﹖我只是由同一大廈的廿七樓調到十二樓而已，就有永遠都不能再見一班好同事，及SHERRY，的感覺。這不捨得的情感，是對工作﹖對一班同事﹖還是只對SHERRY一個﹖
「升，你點睇呢檀野﹖」我問完後一口氣喝掉半杯啤酒。我跟阿升在銀行工作時認識，其後一同到了證券行打工。在我離開後的半年，他亦轉了公司。雖然如此，我們仍有定時的聯絡，亦樂於把自己不會跟其他人的秘密說出來，一是因為大家都是守得秘密的人；二是大家都不會轉彎抹角。「你擺明鍾意人啦你，咁明顯，佢有冇仔架﹖」對，我就是喜歡這份直接。
「有呀，上次問左喇。但我真係鍾意左佢﹖」我再次問到，雖然答案已經越來越明顯。
「係呀煩，你所有既表面證供已經出賣左你，你諗吓點樣同你條女交代啦，唔好攪到一獲泡咁呀。」
「如果你真係鍾意人，就快快手攪掂而家嗰個去追人啦。」阿升繼續說。
「但係而家嗰個又冇咩唔好，如果因為我鍾意左另一個而唔要佢好似好衰咁。」我再次試圖借阿升去清除我心中的糾結。
「乜你而家覺得你咁樣係對佢好好咩，阿駿哥。其實你個心一早飛左去第二個嗰度架啦，分手係你唯一既選擇。」說罷阿升喝完杯中的啤酒並說要回家「交人」。
阿升走了之後我並沒有離開，坐在酒吧的一角我回想剛才阿升的說話，再併對我和SHERRY一直以來的片段及我內心深處的感覺。不知是受阿升的影響還是酒精的作用，我有了以下的結論：
我不想離開SHERRY，我喜歡李碧宜。
雖然清楚了自己的心意，但又想不到方法如何令SHERRY對我都有好感。難度我只可以像《明目張膽》的歌詞般默默暗戀SHERRY，等她和男朋友分手﹖但如果未等到這一刻，她已經要結婚了，我又可以怎麼辦﹖而我，究竟有多少時間﹖解決了一個問題，一百個新的問題立即浮現。我的心很煩，便POST了一段歌詞到FB：
「若我一天公開明目張膽的愛 我怕會讓你太意外
我的愛只願縮到最小 彷彿不存在
就算我最愛你 情願好好遮蓋
我怕揭露了不精彩 拆穿了 總盼望誰在意 蜜月難再
如若你發覺有我在 就結束暗戀的時代
無謂去搏你憐愛 明白叫你太煩的 不是愛」 《明目張膽》何韻詩
我不是在「呃LIKE」，卻出奇地很多朋友從不同途徑問我發生了甚麼事，包括SHERRY。
YEE「攪咩呀你，唔開心呀﹖」
CHUN「冇呀，咁岩聽番首歌覺得啲歌詞OK之麻」
YEE「真係~﹖」
CHUN「係呀~^^」
YEE「好啦咁」「係喎，你仲有一個禮拜就調去十二樓喇喎，啲野執好哂未呀﹖」
CHUN「差唔多架喇，啲野都HANDOVER得七七八八」
YEE「咁就好喇。係呢，你過左去之後我地應該少左機會一齊食飯喇，唔知會唔會唔慣呢﹖」
CHUN「係囉，又唔知啲同事點喎，我應該會唔捨得你地」是你一個而已，我的心俏俏在叫到。
YEE「你好快就會同佢地混熟架啦，到時實唔記得哂我地呀」
CHUN「係呢，你唔好再對我咁好喇。。。」可能受到酒精影響，我對SHERRY的不捨之情都沒有作無謂的掩飾。
YEE「吓。。。你講咩呀，點解咁講既，對你好啲又唔得呀」
CHUN「我驚我會唔捨得你」
YEE「你都對我好好呀，我都會唔捨得你架」
CHUN「其實有冇機會叫陳小姐調埋你過黎呢﹖我想你喺我身邊呀」回想起來，這一句已經很直接說出我的感受，但SHERRY好像不明白或裝作不明白。
YEE「冇啦，我都唔係好似你咁係尖子，佢地點會推薦我丫。不過走係對你好既」
CHUN「邊係喎，你係唔捨得我走﹖」
YEE「係呀，你走左我一定會好悶喇」
CHUN「。。。」
YEE「呀，好夜喇，聽日再講啦，早抖喇~」
CHUN「呀係喎，唔阻你喇，早抖~」
不知不覺，我和SHERRY WHATSAPP到凌晨3時才睡。