搶婚: 第十九章
「喂阿駿哥，你呢排攪咩呀，叫親你出黎都唔出既﹖」電話另一邊所傳來的是THERESA的聲音。
「我呢排忙丫麻﹗」
「你忙乜先，上次見你都成一年前喇喎，使咩玩自閉﹖」
「咁除左做野都要溝女架﹗」
「哦，又係女人呀，得啦，有異性就冇人性架喇，明架喇。」
「點敢呀SA姐，今次有咩玩呀﹖」
「阿貓就黎結婚喇，下星期攪左個易服PARTY睇下你去唔去之麻。」
「嘩你班友玩到咁激呀﹗。。。你預左我先啦，不過可能會早小小走，呢排冇咩心情玩呀。」
「有野唔開心﹖」「到時講啦。」心想，出去玩一下可能可以平衡一下，大不了中途離開便是。
我中三已經認識THERESA，她原是我老友的女朋友，後來他們分手之後反而我和THERESA還有聯絡，我習慣叫她SA姐。而阿貓則是SA姐的好朋友，經SA姐而認識，之前一起玩都是去酒吧喝酒吹水，後來她身體不好所以已經少了出來。雖然見面不多，但我和阿貓其實都頗玩得埋，聽SA姐說阿貓的未來老公也有一點點醋意。想來我還可以說是一個人妻殺手，哈哈﹗
「喂阿駿咁遲架你，入面啲人玩到慶恰恰喇。快啲入黎啦。」SA姐今晚包了一間尖沙咀的樓上吧的VIP房幫阿貓攪易服派對，等她在結婚前有個瘋狂的回憶。我一入房，見到阿貓身旁坐了四、五個面上毫無表情的女生，SA姐說她們是阿貓的姊妹，本來不太想來，只是給阿貓面子才出席一下，不用理會。我看這班女生根本都不屬於這個世界，早就不該叫她們來吧，我也懶得跟她們打招呼。其餘的，有一半以上我也沒有見過，見過的都只是點頭之交。和眾人寒暄一下後，我便拿了支黑牌到VIP房外的吧檯自飲。
SA姐果然是相識多年的老死，一眼便看出我奇怪的舉動。
「做咩偷酒飲呀駿哥﹖」SA姐問。
「冇呀，見支黑牌擺喺入面都冇人飲架啦，我咪幫手飲左佢囉。」
「你有野想講﹖」此時，阿貓在往洗手間途中經過我們，「駿，做咩粒聲唔出自己出左黎呀﹖唔想同入面啲人玩呀﹖」
「唔係呀，不過佢地玩得咁癩，我又冇帶衫黎換，好似好頹之麻，所以咪出黎飲下野咁囉，你地繼續啦，唔使理我架。」
「邊個夠膽喺阿貓我個場話你頹呀，叫佢出黎﹗」看來阿貓的情緒亦開始高漲。
「貓你去左TOILET先啦，你出番黎我同你一齊入去啦。」我說。待阿貓走了之後，SA姐說「入去攪掂班友仔我地再出黎飲過啦。」，我對著她笑而不語。過了一會，阿貓亦出來了，「行咯阿貓，阿駿話今晚佢幫你頂哂啲酒呀﹗」SA姐對著阿貓笑咪咪的說。我真的拿SA姐沒有辦法，我根本沒有說過要幫阿貓頂，不過反正都來了，不要讓大家掃興好了。
「真既阿駿﹖」阿貓問。「係呀貓，你唔使驚俾人對呀今晚﹗」
「多謝你呀阿駿﹗」阿貓興奮地說著並撲到我的身上摟著我的頸。
我輕輕的推開阿貓，她卻繼續撓著我的手。SA姐只是笑著，並沒有出手阻止的意圖。和女主角親密地回VIP房，結果只得一個，一眾狗公也會自動過來敬酒和猜枚玩骰。幸好我和SA姐都是飲得之人，加上我們同阿貓一隊玩遊戲贏多過輸，頂酒的情況也可說是可控的範圍內。狗公們見我們遲遲都不落下風，而自己卻越飲越多，都慢慢地各自散去。只餘我、SA姐及阿貓坐在一角。
「駿，你今日唔開心呀﹖」阿貓問道。
「冇呀，做咩咁問既﹖」
「頭先見你玩骰嗰陣好狠咁，平時既你都唔係咁既。」
「哦，你諗多左喇。」我答道。
「佢情困呀阿貓。」SA姐八掛地把我同阿宜的事情簡單地告訴了阿貓，我亦沒有阻止她，因為多聽一個快要結婚的人的意見我覺得無妨。我看著今晚穿了白雪公主裝的阿貓，雖然面頰已變得泛紅，卻仍然細心地聽取SA姐的講解，在不明白的時候更會提出提問。雖然我跟SA姐所說的不多，但她憑由細到大對我的認知及女人天生說故事的能力，十之八九都說對了，亦說得十分生動。
「貓，如果你係個女仔你會點諗我﹖」我問。
「我要放棄既野太大喇，原本我係PLAN好左結婚同將來，但如果同你一齊你係咪一定會娶我丫﹖一個肯定既結局換一埋UNCERTAINTIES喎，同埋我都唔知你有幾真心。」
「我咁樣都唔真心呀﹖」
「女仔唔係咁諗架阿駿，你要個女仔好信得過你覺得同你一齊你唔會出去偷食，唔係玩玩吓咁係要時間同經歷架。」阿貓說。
「喂，你同阿宜講你今晚去邊架﹖」SA姐大叫。
「去同FRIEND飲野囉。我冇野要呃佢呀。」
「SHIT，你個死蠢明唔明架，你而家成點鐘都未走呀，如果我係個女仔都會覺得你係個仲係未玩夠既麻甩他啦。」阿貓加一句。
「你快啲落去打個電話俾佢話你返到屋企先啦。」
「咁夜佢可能訓左喇。」
「可能等你所以未訓呀，快啲啦。我陪你落去喇。」
說著，阿貓便推著我到酒吧樓下的橫街打電話給阿宜。
「駿﹖你喺邊呀﹖」
「我啱啱返到屋企樓下呀。有冇嘈住你訓呀﹖」
「我等你丫麻，你飲左好多呀﹖」此時阿貓把耳朵貼著我的電話一起聽著阿宜的說話。
「唔係呀，我好開心你等我呀，我返到架喇，你早啲休息啦。」
「我想同你傾多陣呀。。。」
「好呀。」我揚一揚手示意阿貓先上去，她亦識趣地照做。
五分鐘後的VIP房。當我回到去的時候，發覺那批黑口黑面的姊妹及數個朋友都已經走了，另一批喝得面紅耳赤的則見我行開了便圍著阿貓猜枚。我見SA姐一個也可以應付他們便再次拿著黑牌走出VIP房。
「駿。」「SA姐，攪掂班傻仔拿﹖」
「哈哈，你講野幾時變得咁刻薄架﹖」
「阿貓點呀，你留佢喺房冇問題﹖」
「我擔心你多啲呀阿駿。成晚都唔知諗緊乜咁，出黎玩就開心啲丫麻。」
「SORRY呀SA姐，我本身都煩緊我同阿宜時間無多，再聽埋阿貓咁講，我覺得我仲有好多好多野要做，先可以令阿宜悔婚，一諗起就咩心機都冇。」
「黎，今晚玩得開心啲，放低啲唔開心野住先。」說罷便是一杯黑牌到肚。
「多謝你阿SA姐。」我隨即回敬一杯。說著說著，我們兩個人已經喝完一支黑牌，目送一個又一個爛醉的「傻仔」離開，我們也是時候走了。
回到VIP房，只餘小貓三、四隻。應SA姐的要求，我行到阿貓身旁，搭著她的膀頭拍了兩張即影即有，順便在阿貓耳邊輕輕地道謝她送我的意見。旁人望上去就好像我親了阿貓一下，數人同時起哄。我正在回想著和SA姐剛才的對話
「駿，阿貓第一個男朋友就係佢老公，個人係對佢好，但係就唔係好識點錫佢囉。記唔記得我地第一次見阿貓你幫佢飲贏左兩個人之後仲送佢返屋企﹖佢講到而家呀。」
「陳年舊野喇喎，仲記住﹖」
「駿，你就係咁架喇，好多時做左啲野俾人好感都唔知。不過阿貓唔係鍾意你，只係你喺佢個圈子入面係比較似番個男人。。。」
「同嗰班傻仔比呀﹖唔該哂喎。」
「聽我講埋先啦，一陣你送阿貓返去啦，等佢臨結婚前有個開開心心既回憶啦。」
「吓。。。」
「咁你係咪想你口中嗰班傻仔送佢返去丫，阿貓醉醉地喇，落喺佢地手好危險架。」
「好啦，我送佢啦。」
阿貓住在沙田，剛巧與另外兩個「傻仔」同路，萬般不情願下與他們同車，我的條件是我要送阿貓回家。我坐在的士後座的中間，把阿貓安頓在我的右手面。阿貓撓著我的手睡去，而我卻要打醒十二分精神指示司機要怎樣行。在美孚放下兩個「傻仔」轉紅VAN（真希望他們是搭去大埔）後，我們便繼續往沙田進發。阿貓一直睡到下車才醒來，看來已經清醒了許多。
「到喇貓，送到你呢度喇，費時你男朋友見到唔鍾意呀。」
「唔該哂呀阿駿，好多謝你今日出席，我知你呢排都好煩，仲要同SA姐一齊令我開心。」
「傻啦，你結婚麻，當我賀你啦。」
「祝你成功搶到人地老婆返黎﹗」阿貓笑說。
「包唔包括你先﹖」說鬥嘴我一定不落下風。阿貓聽罷，向前行了一步摟著我，合上了雙眼把嘴巴送上。就在兩張嘴唇只有1厘米的距離的時候，我低下頭在阿貓耳邊說「今晚我玩得好開心，祝你幸福快樂。我想搶的新娘只有一個，等我好消息。」
看著阿貓進大廈後我才離去。我想念的，是阿宜。