搶婚: 第二十五章
日子一天一天的過，距離阿宜結婚已經只剩下一個月，而她亦搬到了新居和男朋友一起住，世事都像塵埃落定。我仍有和阿宜見面，惟始終有一道牆在我們中間，使氣氛改變了，沒有了激情，卻多了一片將要離別的傷感。雖然我曾經說過就算阿宜結了婚，只要我們相愛，便可以繼續不理世俗地愛下去，但大家都知道事實並不是如此。平時我們盡量不會提到阿宜快要結婚的事，免得自找沒趣。反而是有時我深夜獨醉時破壞了遊戲規則，向阿宜發放自己的漣漪，索愛不成反而吵了幾句。
「駿，你喺邊呀，返到公司未呀﹖」阿宜很少在早上上班前打給我，而她的語氣很驚慌，顯得事情十分不尋常。
「做咩呀阿宜，係咪有咩事﹖」我小心地答到。
「你幾時返到嚟呀﹖」阿宜再問。
「仲有15分鐘，發生左咩事呀﹖」
「佢知道左﹗」
「知道左﹖」
「係呀。。。我好驚呀而家，你喺邊呀，你過嚟揾我得唔得呀﹖」換著平時，我一定一口答應，但這次我而對阿宜突然的要求卻啞口。
「佢知道左。。。我同你﹖」我想先問清楚。
「唔。。。我地見到面先講啦，喺我地平時去開嗰個公園仔等啦。」
「。。。好。。。你等我，我盡快過黎。」那個公園他平常是給我和阿宜上班時「偷情」用的，現在忽然變得陌生，充滿未知數。
老實說，面對那麼多的未知數，及我和阿宜的事情給她的男朋友知道了，這2件事併在一起令我的不安感倍增，一時不知應怎樣面對。態度上我應該如何﹖要阿宜和她的男友攤牌，從而分手﹖為了她不要再傷心及擔憂，跟阿宜說我會自己消失，及祝她永遠永遠幸福﹖前者太成人之危，後者過不到自己。
第二個問題，阿宜驚慌的語氣是因為她被男友的怪責而很害怕﹖是他在知道之後的反應太激動而嚇怕阿宜﹖還是。。。是他迫阿宜叫我出來。。。三口六面說清楚﹖前2者還好，如果是第3者，很可能會流血收場。
腦內想著一百個不同的情境及應對，腳下的速度卻一點也沒有慢下來。縱然不安，但阿宜有事，哪裡也都要去。前面再轉一個彎便是了，究竟是甚麼胡蘆賣甚麼藥呢﹖不理得那麼多了，五。。。四。。。三。。。二。。。一。。。
一轉彎，只見一個個趕著上班的人經公園走過，未有異樣。仔細搜尋後，才發現阿宜坐在公園的一個暗角處。我行到阿宜身邊，隨即嚇了一跳。見坐在一旁的阿宜容貌十分憔悴，大大的黑眼圈令我懷疑她整晚沒有睡。再行近一點望，阿宜已經發現了我，「駿」。只見她雙眼通紅，眼眶還留有未乾的淚水。
「發生咩事呀BB﹖」我關切地問到。
「尋晚我食完飯。。。臨訓前我睇緊我地D CUBIC MESSAGE，點知忽然有人禁門鐘，咁我咪走出去睇吓邊個囉。。。」
「點知我冇鎖番個電話，我一返入去佢就已經睇緊個電話，塊面黑哂。。。」
「有冇攪錯呀，睇你個電話前有冇問過你架，有啲唔尊重你既私隱喎。」我說。
「唔緊要啦，唔係重點，都發生左。。。佢睇到哂我地D MESSAGE。」
「。。。」我一時想不到如何應對，所有事情來得太快太突然了。
「咁佢有咩講﹖」
「我一見到咁，已經嚇到心都飛埋出嚟，我見到佢好嬲，真係嬲到震哂嗰隻。。。」
「佢一路睇，我就淨係識得企喺度，我FEEL到隻腳有啲震。。。」我一直沒有出聲，只想聽完阿宜的說話。
「直到過左大概十分鐘，佢睇完，望住我。」
「嗰下佢個表情好似想食左人咁呀，而且。。。眼淚開始流出嚟。。。」我越聽越覺得不對路。
「佢放番低個電話，叫我埋去。問我「嗰個係邊個﹖點解你地會有啲咁既MESSAGE﹖係咪就係因為佢你之前話唔結婚﹖」我面對佢一連串問題，一句都搭唔到佢。」
阿宜緊握拳頭，垂下頭，兩行眼淚應聲流出。我攬著阿宜，輕掃她的頭髮，說「唔好咁，冇事架，我地睇吓點樣拆啦。」我的內心其實痛得不得了，我知道，處理得不好這件事會是阿宜和我永別的導火線。
「佢話佢對我咁好，做所有野都係為左我，點解我要咁樣對佢，佢之前以為我婚前恐懼，對我絕對信任，估唔到我會做啲咁傷害佢既事。」「咁咪分手囉。」我心想，但明顯事實並非如此。
「佢話我以後都唔可以見你，同埋叫我唔好做呢份工，就算揾唔到住都冇關係。」最壞的情況已經出現。
「咁你點答佢呀﹖」我口有點震，慢慢地問道。
「可以點喎，我唔應承佢我真係唔知佢會做啲咩架。」
「。。。」「我冇即刻答佢，佢望左我一眼就好似發左癲咁跑去露檯度。我見到咁即刻飛撲過佢捉住佢啦。。。仲整親隻腳添呀。。。你睇下。」阿宜指指她的右腳，確是瘀了一片。此時，我感到有點天旋地轉。
「阿駿。。。阿駿。。。你唔好嚇我呀。。。」我挨在阿宜的膊頭上，頭很暈。
「冇野既，可能我未食早餐，又聽到你尋晚啲野，有啲受唔住者。」
「咁唔好講落去喇。。。」
「咁即係點呀﹖」
「咩即係點﹖」
「咁你係咪唔要我﹖我地係咪以後都唔可以見到對方喇﹖」我和阿宜，兩個人四隻眼，都變得朦朧，都分不清是誰看到誰所以哭了。我們相擁坐著，和外面急步趕上班的人成了強烈的對比。
「BB，我點會捨得唔見你。。。但係我真係冇辦法唔咁講呀，真係會攪出人命架。。。」
「咁我死左去係咪你會喺我身邊﹖」我發悔氣道。
「你唔好再迫我啦，一係我死左去你地兩個都唔好再傷心喇。」
「。。。」又一片寂靜。
「對唔住呀BB，我頭身激動過頭。」道歉過後，我倆都回復平靜，並肩而坐。阿宜應承了她的男朋友以後都不再見我，而工，就因為實際需要，待找到工作後才辭職。
「呼。」我呼一大口氣，心情變得有千斤重。
「我都唔好受。。。」阿宜說。
「我知道，我地既關係唔係正常既男女朋友關係。我同你就算有幾咁愛對方，肯為對方付出幾多都好，始終都冇辦法喺埋一齊，可能係天意掛。」
「駿，你有冇怪我﹖」
「有，如果你冇盡力爭取過就放棄我會怪你。但係我知道BB你已經放棄左好多，喺你既能力入面已經係極限，我又點怪得你呢。係你有冇怪我就真呀﹖」
「吓﹖我怪你﹖」阿宜不解的問道。
「係呀，如果唔係我既出現，你地就可以好開心咁結婚，唔使攪到咁，唔係我，邊有咁多事喎。」「鬼咁我鍾意你咩﹖」阿宜望著我作了一個鬼臉。
「咁我地以後唔好行得咁埋喇，雖然好唔捨得，但係唔好要你難做啦﹗」我說了心裡萬般不情願的說話，可是又不想由阿宜說出口。
「駿﹗」阿宜一頭栽到我的心口處。
「我唔捨得你呀BB，點解個世界要咁喎，點解我咁遲先識你喎。。。」
「冇既，如果我早啲知道我鍾意你，早啲約你出街，可能個故事會唔同呢。」我繼續說，「可能呢個就係我地既故事，無得開花結果的故事。」
過了一會，待眼淚流乾，心情稍為好轉後，我便送了阿宜上樓。說真的，這一日遲早都會到來，卻殺我一個措手不及。