《青梅竹馬的婚禮》: 第一節

「喂？老豆，今晚屋企有冇飯食？」
 
「有呀，快啲返嚟。」
 
我望住窗外嘅傾盆大雨，話：「但依家咁大雨，我唔係好想返……」
 
「大雨就遲啲先返囉，今晚有客人嚟。」
 
「好，一陣見。」我講完之後就Cut咗線。
 




我冇問到客人係邊個，第一、有人嚟屋企作客，身為大仔當然要出現，以示尊重，所以知唔知邊個係客根本影響唔到我要返屋企呢個事實；第二、我真係冇興趣知係邊個。
 
由起程決定返屋企嘅一刻，已經奠定咗我避免唔到呢場災難。有時候對於我唔想知道嘅嘢，我會選擇逃避，所以如果可以俾我再揀一次，我會好堅決咁同老豆講：「老豆，我好眼瞓，今晚我唔返嚟。」
 
一個鐘頭之後，我已經企咗喺屋企門口。入到客廳，我見到賢叔同佢老婆坐咗喺梳化上面。簡單介紹吓，賢叔同我老豆係由細玩到大嘅老死，自從我阿爺過咗身，大陸間祖屋就留咗俾賢叔一家人住。
 
賢叔一見到我，就將手上嘅DVD交俾我，問：「克仔，你識唔識開呢隻碟？你老豆都搞唔掂。」
 
身為毒撚嘅我，當然有返少少電腦常識，於是就將隻DVD放咗入Blu-ray機度。
 




呢個時候老豆喺廚房走出嚟，話：「咦？部藍光機讀到DVD㗎？」
 
我都廢事睬佢，於是轉頭問賢叔：「咦？阿欣呢？」
 
阿欣，呢個故事嘅女主角，我嘅青梅竹馬。
 
「佢冇嚟到呀。」
 
「咁呢隻咩碟嚟？」
 




「阿欣結婚啲片嚟。」
 
結……結婚？
 
註：克仔係假名，嚟自我個英文名Jack嘅後半部份。
註二：對話內容係我啲鄉下話，為咗方便大家閱讀，我會轉換成廣東話。