《青梅竹馬的婚禮》: 第二節

我回想起幾年前仲係中學生嘅我，有一日放學返到屋企，老豆神色凝重咁同我講：「阿爺啱啱去咗……」
 
果一刻我連書包都未放低就跪咗喺地下；而呢一刻我先知道，原來紅事同白事都可以咁撚Surprise！只不過個分別係今次我冇跪喺地下，仲同賢叔講：「係……係咩？阿欣嫁咗？恭喜晒恭喜晒！」
 
講完呢番違背良心嘅說話之後，我只係感到個人好輕、好輕，雙腳好似浮起咗。
 
呢個時候，電視機徐徐播出一段比YouTube低清影像更加低清嘅影像，我見到一部棗紅色嘅四人車、一堆起晒狗牙嘅人、我間祖屋，同埋一段新細明體嘅簡體字旁白，寫住阿欣同新郎哥嘅名。
 
賢姨見到之後好興奮咁話：「接新娘嘞！接新娘嘞！」
 




電視機前嘅老豆，擺出一張期待嘅面孔，靜候住新郎哥騎住隻白馬揸住把寶劍喺架直升機度跳落嚟；而我，只係關心緊著起婚紗嘅阿欣到底係點樣。
 
不久，一條粉腸就喺架車入面踏咗出嚟，一副意氣風發嘅樣子，胸前掛住一朵花。
 
吓？呢條四眼仔就係新郎哥？
 
未等我開口，我老豆已經搶先一步：「咦！阿欣個老公幾靚仔喎！」
 
「Ex色ly！」我立即和應我老豆：「新郎哥真係眉清目秀，仲戴住眼鏡斯斯文文，唔錯唔錯……」





一日入面，我講咗太多大話。
 
唔知點解，我成個腦都諗埋啲無關痛癢嘅問題：唔知大陸結婚洗唔洗俾開門利是呢？
 
驀地，鏡頭一轉，我已經見到阿欣個細佬喺大門收緊新郎哥利是。