《青梅竹馬的婚禮》: 第三節

一封、兩封、三封……就係咁，新郎哥就帶住佢班兄弟殺咗上樓上。
 
望住墨綠油漆早已剝落嘅樓梯，一股親切感不期然咁湧咗上心頭，原來我已經好多年冇返過嚟呢個地方……
 
以前每逢年假，老豆都會帶我返大陸探親，每一次我都係帶住納悶嘅心情坐上喺深圳開出嘅通宵巴士，我相信每個細路喺果個年紀，都會好唔捨得屋企果部電腦：ICQ、彩虹冒險……
 
加上呢一程長達十幾個鐘嘅巴士，冇急屎、冇喺飯盒屙屎，可以話係平平無奇。剩低嘅只有車上旅客嘅鼻鼾聲、一本喺上車之前買落嘅殘體笑話書，同埋一陣微弱、泛黃嘅燈光。一覺醒來，已經到達咗祖屋，中途老豆多數會孭住我去搵的士，有時我仲會瀨埋尿，醒咗果陣已經換好褲。
 
每一次返咗大陸嘅第二朝，都總係會有把充滿稚氣嘅女聲嗌醒我：「克仔，克仔……」
 


我懶洋洋咁張開雙眼，見到阿欣已經坐咗喺床頭，再望一望個鐘，原來已經十二點。
 
「咁大個仔仲瀨尿，冇鬼用呀你，哈哈……」阿欣拍一拍我，然後講：「快啲起身！」
 
梳洗之後，落到二樓，多數都會見到我老豆同賢叔捉緊象棋，而阿欣就會拖住我帶我周圍去玩、買嘢食，就好似一個大姐姐咁照顧我。
 
事實上，佢真係比我大兩歲，亦都高過我半個頭。
 
果陣老豆不斷同我講大陸係好危險，會有拐子佬、飛仔，不過每一次同阿欣去玩，我都覺得非常有安全感。
 


以前從來唔會諗到落Club落Bar、唱K睇戲、行街食飯，一個細路仔嘅世界只係應該有撈蝌蚪、捉波子棋、放炮仗。
 
最後唔洗講，我當然係懷住依依不捨嘅心情回港，每一次回程，我都覺得自己好似甩咗一次拖。
 
不過依家諗返起果陣嘅心情，原來只不過係水逝雲卷；你會覺得悲傷恒久，原來只不過係未到你應該忘記嘅時候。