《一位明星，在自己的「生前喪禮」上死了》: Chapter 2

Chapter 2


三人經過保安，拍電子卡進入到後台。

她們首先到二人的房間，把之後採訪要用的拍攝器材放低。房間跟一般郵輪的無什麼分別，兩張床，有洗手間，有一個小小的圓形玻璃窗，可以望到岸上等候著生前喪禮的一大群粉絲。

「同你地介紹番後台既設施喇。後台係專門為今次生前喪禮而劃出黎既一個範圍，就係正正喺甲板之下既一層全層。

後台有俾 Vincy 同親友以及喪禮司儀既專用休息室，有化妝間、服裝間、茶水間、沖涼房、記者採訪室，仲有個倉庫放晒聽日需要用既物資、道具同器材，所以只有同生前喪禮相關既人員同以及 Vincy親屬朋友先可以出入後台，有嚴格既保安看守，必須要有電子通行證先可以出入，而出入既時間都有紀錄。





你兩位係唯一可以進入後台既記者。陣間傍晚六點，Vincy 會同你地做錄影訪問，咁之前既一整個下午，你地自己參觀下或者留喺房入面休息下喇。

你地可以訪問任何人，但記得訪問既錄影只能夠喺『記者採訪室』進行，絕對唔可以未經我批準而周圍影相及拍片。呢個係保安理由，如果俾我發現到你地喺採訪室以外拍攝，咁就唔好意思要請兩位落船喇。」

Amanda 帶著 Erica 和 Nicole 到記者採訪室門口，好像訓導主任般重申一次在船上採訪的規則。


這時，一個穿著西裝的男人微笑著向三人走過來。





「咦......喂！哈囉， Aaron！今日咁早落黎巡視業務呀，呢個老闆真係夠晒勤力，哈哈。」

「唔好笑我啦，Amanda！我閒人一個，有咩可以做呀，幫唔到咩手。不過，我一出現，我班伙記就會自動自覺爽手啲做嘢。你知喇，聽日就係正日啦嘛，係要睇緊啲既。」

「真係唔話得，出船都不特只，仲要出錢出力出人幫手搞呢個 show，真係多謝晒你！」

「我話晒都同 Vincy 由細玩到大，雖然佢做咗明星之後少咗見面，但都係好好朋友黎，朋友既野無得計既。佢要搞生前喪禮，我又咁啱幫到手，咪出少少力，當幫老朋友了個心願囉。

你都好唔話得啦 Amanda，自從 Vincy 病咗之後，再唱唔到歌，已經無再同唱片公司簽約，而你已經唔算係佢經理人，但你都義務同佢搞咁多嘢，上年做完個吿別演唱會，而家又做埋呢個生前喪禮既統籌，真係好有心。」





「Vincy 呢個女，我由佢入行湊到而家，都廿年喇。我同佢感情好到好似家姐細妹咁，自從佢有果個病......我......」

說到一半，Amanda 的聲音好像有想哭的感覺，

「哎...... 唔好講到呢啲喇...... 係喎，未同你介紹，呢兩位係記者 Erica 同 Nicole，係 Vincy 特別點名邀請上船既記者；

呢位係蔣少，Aaron，應該係人都識唔駛介紹喇，香港船王既孫仔，而家已經接管咗家族既所有郵輪生意，我地而家身處既呢一架『永生號』，就係 Aaron 間公司義務贊助架喇。」Aaron 跟 Erica 和 Nicole 握手，Erica 把自己的名片遞給 Aaron。

「係喎，Aaron 可以同兩位記者介紹下架『永生號』，當幫公司宣傳下都好嘛。」

「哦，可以呀，橫掂我而家至兩點無 appointment，可以帶兩位參觀下『永生號』既。」








「『永生號』係一艘海上巨型骨灰龕場連殯儀服務設施，最多可以安放四十萬個骨灰龕位。

其實，『永生號』大致上跟普通郵輪無乜分別，只係普通郵輪用來住人既房間，喺呢度全部變為一個個安放先人骨灰龕既紀念堂。
另外，甲板既中央位置，係一個超大型既花園，足足可以容納三千人，用作舉行大型喪禮，就例如聽日既生前喪禮。

香港人口老化問題嚴重，地少人多，『先人』要同『生人』爭地起骨灰龕場，真係唔容易架。而家『永生號』就係一個劃時代既大膽構思，將先人安置到海上，騰空返墳場一大片土地用黎起屋，紓緩香港無地起樓既問題，真係一舉兩得。
我地公司而家建造中既仲有『蓬萊號』同『淨土號』，為唔同宗教人士提供海上永久居所，不過因為安全問題船上唔准燒冥鏹同香燭，呢個我地仲諗緊解決方法。『永生號』喺大嶼山有專用既郵輪碼頭，暫時會長時間停泊，就好似果架船上海鮮坊咁，但如果未來有多幾架船，就可能要輪流泊岸啦。

不如我帶你地上甲板個花園睇下呀。工作人員應該差唔多 set 好晒個大台同啲枱枱櫈櫈，我亦可以順便睇下個進度，睇下我啲伙記有無偷懶，哈哈。

係喎！我好有興趣知道點解 Vincy 會咁欣賞你兩位，俾你地做訪問既？
據我所知，Vincy 都算大牌，唔太鐘意接受訪問架喎。」

三人正向著船的甲板方向走，聽到 Aaron 這樣一個問題，Erica 跟 Nicole 相視而笑。





「咪因為佢囉，有得訪問 Vincy ，係佢估中咗謎語既獎品。」Nicole 拍了 Erica 膊頭一下。

「估謎語？」Aaron 不解的望著 Erica。