《一位明星，在自己的「生前喪禮」上死了》: Chapter 7

Chapter 7 



傍晚五點四十五分，跟 Vincy 的訪問快要開始。 

Erica 和 Nicole 已經在訪問室準備就緒。 


「等我一陣，我去化妝先，我個病樣，上電視會嚇死觀眾，哈哈哈。」Vincy 來到訪問室門口，以電腦合成聲音說了一句。 





「慢慢啦，我地唔趕架~」Nicole 大聲回應。 

＊＊＊ 

六時，訪問開始。 

Vincy 的媽媽陳校長表示不介意坐在 Vincy 旁邊一同接受訪問。 

錄影開始。 






「各位，陳詠詩 Vincy 自從患病之後都甚少露面，更加係絕少接受訪問，本人非常感謝 Vincy 肯接受本台既獨家專訪。」 

Erica 向 Vincy 和陳校長點頭致謝。 



「首先，Vincy，我見你要用電腦發聲，其實你而家仲講唔講到嘢？」 





Vincy 望了 Erica 一眼，然後張開了嘴巴，嘴唇和兩頰肌肉非誇張地活動，好像十分吃力的樣子。 

「...... 鳴......咕...吔......鳴......下...咁......」Vincy 以九牛二虎之力，發了這六個含糊的音節。 

「Vincy 係話：『我講嘢會係咁』。」在 Vincy 身旁的母親陳校長即時翻譯。 

「沒錯，我講嘢會係咁，所以都係用番電腦既語音合成代我發聲，會講得快啲，哈哈。物理學家霍金都係有呢個病，所以我都學佢用語音合成。」Vincy 的電腦再次代她發聲。 


＊＊＊

「咁其實 Vincy 既病情而家係咩情況呢？」 

「我讀大學既時候，Facebook 流行過一排 『ALS 冰桶挑戰』，倒頭淋一桶冰水，為ALS病人籌錢同引起關注。我當時都有玩，但無諗過廿幾年之後，自己竟然就係正正患咗呢個病，真係有啲諷刺。 





我點發現自己有呢個病架呢？大約四年前既某一日，我想沖杯咖啡，我明明有用力揸實個杯，點知右手突然之間出唔到力咁，眼白白睇住隻杯跌落地碎晒。我望住地下既玻璃碎片，足足望咗十五分鐘。我果刻好驚，唔明點解隻手會出唔到力。我之後去睇醫生，做咗一輪檢驗，得知我係患有 ALS ，即係肌萎縮性脊髓側索硬化症，俗稱漸凍人症。 

醫生話呢個病，係一個以現時醫學知識同科技無辦法醫治既一個病，病因亦都不明。個病會令到腦部用黎控制肌肉既『運動神經元 (motor neuron)』退化，因而個腦會無辦法將訊息傳到肌肉，再唔能夠令到肌肉活動。 

呢個病，一步一步咁令身上既肌肉再無活動能力。由一開始手腳無力，行路容易跌倒，到後來企都無力企，唔可以再行路，要靠輪椅；手指慢慢郁唔到，揸唔到筷子刀叉，要靠媽媽餵；唔能夠自己沖涼，去廁所，連去完廁所要清潔後面，都要靠媽媽幫手。 

到而家，我講唔到嘢喇；再遲啲，會連吞食物都有困難，要靠插喉。到最後，會連呼吸都無力。 

呢個病叫做漸凍人症，就係因為佢逐漸『冰封』我既活動能力。 
但係，我個腦係全程都一樣咁清醒，思考能力唔會因為呢個病降低或者變得痴呆。呢個就係個病最可怕既地方。 

醫生話，大概四至五年之內，我就會因為呼吸衰竭而死。 

即係話，我由知道有病開始，只有大約四至五年命。」








「咁...... 想請問你有呢個病之後，每一日既生活點樣？」 

「我而家既生活，主要都係喺床上面度過，因為手腳郁唔到，主要都係靠部電腦，用眼睛控制個電腦做我想做既事，例如睇書呀，睇電影，寫 Blog，準備呢個生前喪禮，寫我既自傳等等。 

而我生活既其他大小事情，全部都要靠我最親愛既媽媽。佢要幫我按摩全身，幫我準備我食得到晚食物，餵我餵嘢，幫我準備一大堆藥水藥丸，幫我揸藥膏，幫我沖涼，清理大小便。 

我好想借呢個機會，多謝我媽媽，佢真係好辛苦架...... 我媽媽幾十歲人，仲要咁辛苦照顧我...... 」Vincy 的眼睛溢滿淚水，「......我見到佢老咗好多喇......」 


「傻女，我得你一粒女，得你呢一個親人咋，我唔錫你錫邊個喎......」陳校長眼泛淚光。 
「......如果你... 第時唔係度，我都唔知... 做人..... 有咩意思囉......」陳校長已經泣不成聲。 






Erica 遞了一張紙巾給陳校長抺眼淚。 

陳校長把紙巾撕了一半，首先給 Vincy 抺眼淚，然後才往自己的眼睛抺幾下。 

鏡頭一路拍著這個畫面，但訪問暫停了數分鐘，讓兩位受訪者平伏情緒。 



(待續)