Chapter 10

訪問完結,時間為晚上七時十分。 

Erica 和 Nicole 站起來躹躬,感謝 Vincy 如此認真地回答這次訪問中的問題。 

這時,Amanda 在門外敲門。 

「唔好意思,個訪問完喇呵?Vincy 呀,阿 mi 姐話聽日臨時有事可能要遲一個鐘頭先到。我諗緊好唔好將華仔個致辭既部分提早少少,預鬆啲時間,再唔得就將吹臣果 part 都調早啲,等 mi 姐都到埋,先開紿全部歌手大合唱 Swing 果首《那邊見》,你覺得好唔好?」 





「好,你話事啦,Da 姐,我無所謂。」 


Amanda接著從手上的文件夾中,抽出一張紙,交給 Nicole: 「呀,啱喇,順便俾埋你地參考下,呢一張係聽日既大概 rundown。」 

Nicole 望著張rundown,忽然記起之前想問 Amanda 的問題:「Amanda 呀,我地想問呢,聽日儀式之前,喺甲板咪會有個 cocktail party既,我想請問我地可唔可以去拍攝同採訪下啲來賓?」 

Amanda 想了一想:「都......得既,如果啲來賓肯上鏡就得囉,不過如果人地唔想上鏡,你地唔好騷擾佢地喎。同埋保安理由,最緊要唔好影個台同入口。仲有,當生前喪禮正式開始,就唔可以再拍喇,我地自己會有攝錄機直播。」






這時,Vincy 忽然對 Amanda 說: 

「咦!Da 姐!之前我咪話過好想去睇星星既,一路都無咗件事,不如就今晚上去甲板度睇星星呀!呢度大嶼山南,遠離城市,咁少光害,我地仲要喺海上面,實夠黑睇星星啫!」 

「係喎,好喇,陣間夜啲同你去睇喇。」Amanda 好像逗小朋友般的語氣說。 

「你聽日會好忙架,好多人要應酬,咁夜仲去睇星星,聽日會唔夠精神架。」陳校長對 Vincy 的提議有保留,畢竟她是 Vincy 媽媽,一定最關心 Vincy 的健康。 

「唔緊要啦,媽媽,睇一陣啫!半個鐘喇!最多聽日訓個晏教補番數囉。」 Vincy 好像小孩般對陳校長撒嬌,陳校長只好點頭批准。 






「記者妹妹,你地都黎呀!幫我拍下片都好呀,哈哈,過咗聽日我唔會再上電視架喇,段片好有紀念價值架,你地電視台獨家架。喺自己個喪禮舉行前一晚睇星星,真係好浪漫架啫!不愧係『Artist』,咁都諗到,哈哈」Vincy 自誇。 

「但係...... 我地要趕住 send 段訪問片段番公司,俾同事剪片同加字幕喎...... 老總希望喺夜晚九點可以有少少精華片段出街......」Erica 有些猶疑。 

「唔緊要,睇星星啫,又無咩爆料,唔駛趕住播出街既。你而家 send 咗個訪問番去先,之後今晚上甲板拍我睇星星喇。一於咁話喇!陣間十點,甲板等!」 

陪 Vincy 睇星星計劃已定了,Amanda 望一望手錶,說: 

「都係時候食晚飯架喇。我叫咗餐廳準備晚餐,大家可以去食野先。陳校長,都夠鐘要同 Vincy 番房食野同食藥喇,陳校長我幫你攞晚餐去你地房呀。」 

***

Erica 和 Nicole 到船上的餐廳外賣了兩個晚餐,然後回到房間,把剛剛訪問的片段傳送回電視台,然後打了個電話給老總確認收到。 





Erica 研究著手上的生前喪禮流程: 


4 月1日 Vincy 生前喪禮大概流程: 

13:00-15:30 雞尾酒會。 

16:00 生前喪禮開始。 
16:05 主要贊助商致辭,介紹『永生號』。 
16:15-17:00 三位藝人致辭及唱歌。 
17:00 群星大合唱。 
17:10 兩位藝人致辭及唱歌。 
17:30 粉絲代表致辭及合唱。 

18:00 Vincy 致辭。 




18:15 Vincy 唱歌。 
18:30 瞻仰遺容。 
19:00 生前喪禮完結。」 


Erica 望著其中一個環節,大惑不解:「18:15 Vincy 唱歌?唔係話講野都講唔到,要用電腦語音合成架咩?咁聽日點唱歌?」 

「唔知呢,係咪『咪嘴』播舊片咋?」Nicole 一邊替攝錄機叉電一邊說。



***** 

晚上十點十五分,甲板。 






「遲咗三個字喇,Vincy 咁乖好少遲到架,會唔會有事呀?電話又唔聽。」Amanda 很擔心。 


再過了幾分鐘,Aaron 從電梯邊向跑過來。 

「對唔住呀各位,我地有啲事搞遲咗呀!」 

在 Aaron 後面的,是輪椅上的 Vincy,而推著輪椅的,是 Vincy 的女友 Rosemary。 


「嘩!真係好多星星啊!」Vincy 望到天空上點點繁星,雖然是以無感情的電腦聲音說,但面上仍難掩興奮的心情。 

「大家好,我晏晝有事,啱啱先上船,唔好意思。Auntie 你好。」Rosemary 向大家和陳校長打招呼。陳校長禮貌上點頭微笑回應,但看得出笑得有點勉強。 





「你地三個神神秘秘搞咩呀?」Amanda 問。 

「神神秘秘就梗係秘密喇!聽晚你地就會知架喇!」Vincy 奸笑,眼睛仍然望著天上的星河,看得入神。 




這夜,萬里無雲,加上四周沒有城市燈光,天上竟然看得到平常只有在廣吿特效中出現的星河。再配著陣陣微涼的海風,令各人都心情舒暢。 

「記者妹妹,可唔可以影我睇星星既呢個情景呀?媽媽一路推住我,沿住船甲板既圍欄慢慢行,背景一定要影到啲星星架。」Vincy 提議。 

「等陣!披番件外套先,呢度大風呀。」陳校長從手袋中取出一件外套,披在 Vincy 身上。 

Erica 和 Nicole 放好攝錄機,加了少許燈光,便開始拍攝了。二人彷彿由娛樂記者,搖身一變成為了 Vincy 的 MV 導演,教導陳校長該如何走,往哪個方向燈光最好,步速應該有多快,表情和動作如何自然一點...... 拍攝過程中大家都玩得很開心。
不用拍 MV 的其他人則各自在甲板上閒逛。 




「嘩!碼頭果邊好多人呀!全部都係你啲粉絲黎架,Vincy 快啲過黎睇下喇!」Rosemary 忽然興奮地大叫,向 Vincy 招手。 

大家都走到望向碼頭的方向。 

的確,大批 Vincy 的粉絲在碼頭附近紮營,有些更加向『永生號』這邊搖動發光的燈牌,寫著「我們永遠都愛你,Vincy!」、「Vincy !祝你身體健康,長命百歲!」等支持字句。 

Nicole 見到這個感人的場面,立即用攝錄機攝下這一幕。 

Vincy 知道攝影機正影著自己,以及碼頭上千個支持者。 



Vincy 眼泛淚光,感觸地說:「自從我病咗之後...... 我成日都喺度諗,如果我第時死咗之後...... 我係唔係...... 會變成天上既一粒星星呢?」 

她停下來,傻氣地笑了:「哈哈,我咁紅,唔駛問,一定會變一粒好光好光既星星啫...... 一定係......」 

Vincy 的淚珠沿著面頰流下,陳校長見狀,立刻上前用紙巾抺走淚水。 



「喺我失聲之前,我專登錄咗一首歌,我諗喺今晚呢個咁美麗既星空之下,播黎聽下,一定好『啱mood』 .......」 


Vincy 用眼睛望向上下左右地控制電腦,不久,電腦的揚聲器傳來了音樂。


「當你見到天上星星,可會想起我......」 


是 Vincy 的聲音。是百分百真實的,不是電腦合成的歌聲。 



「可會記得當年我的臉,曾為你更比星星笑得多? 

當你記起當年往事,你又會如何? 
可會輕輕淒然嘆喟, 
懷念我在你心中,照耀過。 

我像那銀河星星,為你默默愛過....... 
更像那柔柔光輝,為你解痛楚。 

當你見到光明星星,請你想,想起我。 

當你見到星河燦爛, 
求你, 
在心中...... 記住我......」 


在音樂襯托下,Vincy 哽咽著,以電腦聲音說:「我好多謝我既歌迷,咁多年來一直咁支持我...... 就算我而家已經唔可以唱歌...... 個樣又病到殘晒...... 都咁支持我......」 

哭得再不能睜開眼睛了,Vincy 停了下來,陳校長再次為她抺眼淚。 

「我可能好快...... 就要離開...... 我希望...... 我既歌迷...... 『求你,在心中記住我』......」 



聽完這樣的深情表白,大家都有點傷感,卻又不敢出聲。Amanda 就在這時打完場: 

「唉!好喇!而家都夜架喇。今晚,大家早啲瞓。聽日,Good Show!!!」 




***** 

既上十一時,Erica 和 Nicole 回到房間。 

正當 Nicole 在浴室洗澡時,Erica 的電話響起了。 

是電視台老總打來。 

「喂?Erica 呀?你地個 Vincy 訪問精華出咗街之後,好大迴響呀!好多傳媒行家都打黎問可唔可以轉播,你地個訪問真係做得好好呀!番到嚟老總一定會好好獎勵下你兩個!」 

老總突然語氣一轉: 

「不過呢...... 我地電視台收到一啲宗教團體打黎,警吿我地,話唔准再播 Vincy 公開支持安樂死果段訪問內容,話 Vincy 作為公眾人物,宣揚安樂死,係教壞細路。 

我地電視台梗係唔理佢喇!我實企硬架,一定要繼續播! 

而家網上有啲反對安樂死既教徒開咗個 facebook event,話聽日會黎 Vincy 生前喪禮度示威抗議,都幾多人 join 咗個 event 架,你地聽日自己小心安全喇,有咩事,記得記得影低佢喇!記得喇!」 
 






--------- 
本回背景音樂: 
明星 - 張國榮 (Leslie Cheung) [live 1997]: 
https://www.youtube.com/watch?v=y5HS3WY3D2s